ലംബോര്ഗിനി ഉറൂസ് S ലക്ഷ്വറി സ്പോര്ട്സ് എസ്യുവി സ്വന്തമാക്കി ക്രിക്കറ്റ് ഇതിഹാസം സച്ചിന് തെന്ഡുല്ക്കര്. ആഢംബരത്തിനും കസ്റ്റമൈസേഷന് ഓപഷനുകള്ക്കും മുന്ഗണന നല്കി ഇറ്റാലിയന് ബ്രാന്ഡ് പുറത്തിറക്കുന്ന കാറാണ് ഇത്. കാറിന് 4.18 കോടി രൂപയാണ് എക്സ്ഷോറൂം വില വരുന്നത്. ഈ മോഡല് സമാനതകളില്ലാത്ത ഡ്രൈവിംഗ് എക്സ്പീരിയന്സാണ് ഉടമകള്ക്ക് സമ്മാനിക്കുന്നത്. പുതിയ ലംബോര്ഗിനി ഉറൂസ് S കാറില് സച്ചിന് സഞ്ചരിക്കുന്നതിന്റെ ദൃശ്യങ്ങള് സോഷ്യല് മീഡിയയില് വൈറലാണ്.
4.0-ലിറ്റര് ട്വിന്-ടര്ബോചാര്ജ്ഡ് V8 എഞ്ചിനാണ് ലംബോര്ഗിനി ഉറൂസ് S-ന് കരുത്തേകുന്നത്. ഈ എഞ്ചിന് 666 bhp പരമാവധി കരുത്തും 850 Nm പീക്ക് ടോര്ക്കും പുറപ്പെടുവിക്കുന്നു. പെര്ഫോമന്സ് നോക്കിയാല് വെറും 3.5 സെക്കന്ഡില് ഈ കാര് പൂജ്യത്തില് നിന്ന് മണിക്കൂറില് 100 കിലോമീറ്റര് വേഗത കൈവരിക്കും. 8-സ്പീഡ് ഓട്ടോമാറ്റിക് ട്രാന്സ്മിഷനിലൂടെ നാല് ചക്രങ്ങളിലേക്കും അനായാസമായി പവര് കൈമാറുന്നു. ഇത് മൂന്ന് ഓഫ് റോഡ് മോഡുകളും വാഗ്ദാനം ചെയ്യുന്നു. വിവിധ ഭൂപ്രദേശങ്ങളില് സുഗമമായ യാത്ര ഉറപ്പാക്കുന്നതിനായി സബ്ബിയ (മണല്), നീവ് (സ്നോ), ടെറ (മഡ്) എന്നിവയാണ് ഉറൂസ് S-ല് സജ്ജീകരിച്ചിരിക്കുന്ന ഓഫ്-റോഡ് മോഡുകള്.
സച്ചിന്റെ ഗരാജിലെത്തുന്ന ആദ്യത്തെ ലംബോര്ഗിനി കാര് ആണ് ഇത്. പോര്ഷെ കയെന് ടര്ബോ പേലുള്ള അടിപൊളി മോഡലുകള് ഇതിനോടകം സച്ചിന് സ്വന്തമാക്കിയിരുന്നു. പോര്ഷെക്ക് പുറമെ ബിഎംഡബ്ല്യു ബ്രാന്ഡിനോടും സച്ചിന് ഒരു പ്രത്യേക ഇഷ്ടമുണ്ട്. ബിഎംഡബ്ല്യു 7- സീരീസ് Li, ബിഎംഡബ്ല്യു X5M, ബിഎംഡബ്ല്യു i8, ബിഎംഡബ്ല്യു 5-സീരീസ് എന്നിവയുടെ ഏറ്റവും പുതിയ മോഡലുകള് അദ്ദേഹം സ്വന്തമാക്കിയിരുന്നു. ബിഎംഡബ്ല്യു ഇന്ത്യയുടെ ബ്രാന്ഡ് അംബാസഡര് ആകുന്നതിന് വര്ഷങ്ങള്ക്ക് മുമ്പേ തന്നെ ബിഎംഡബ്ല്യു X5M ഇറക്കുമതി ചെയ്ത് ജര്മന് കാറുകളോടുള്ള തന്റെ ഇഷ്ടം സച്ചിന് പരസ്യമാക്കിയിരുന്നു.
