ഇന്ത്യന്‍ സൂപ്പര്‍ലീഗിലെ വമ്പന്മാരായ കേരള ബ്ലാസ്റ്റേഴ്സ് പ്രതിരോധനിരയിലെ വമ്പന്‍ താരത്തെയും വിറ്റതായി റിപ്പോര്‍ട്ട്. കഴിഞ്ഞ സീസണ്‍ മുതല്‍ ബഗാന്‍ നോട്ടമിട്ടിരിക്കുന്ന യുവതാരത്തെ വന്‍ തുകയ്ക്ക് മോഹന്‍ബഗാന്‍ അവരുടെ നിരയില്‍ എത്തിച്ചതെന്നാണ് റിപ്പോര്‍ട്ടുകള്‍.
ഐഎഫ്ടി ന്യൂസ് മീഡിയയാണ് ഇക്കാര്യത്തില്‍ ട്വീറ്റ് ഇട്ടിരിക്കുന്നത്. അഞ്ച് വിദേശതാരങ്ങളടക്കം ടീം വിട്ട ബ്‌ളാസ്‌റ്റേഴ്‌സ് അഴിച്ചുപണിയുമായി ഈ സീസണില്‍ കളത്തിലിറങ്ങുന്നതിന്റെ സൂചനയായിട്ടാണ് യുവതാരത്തെയും ഒഴിവാക്കിയത്. കഴിഞ്ഞ രണ്ടു സീസണുകളായി ബ്‌ളാസ്‌റ്റേഴ്‌സ് പ്രതിരോധനിരയിലെ ഫീയര്‍ലെസ്സ് കോംബോയിലെ യുവതാരം കൂടി വിട്ടതോടെ ബ്‌ളാസ്‌റ്റേഴ്‌സിന് പ്രതിരോധം അഴിച്ചുപണിയേണ്ടി വരും.
നേരത്തേ പ്രീതം കോട്ടാലിനെ വെച്ച് ഒരു സ്വാപ് ഡീലിന് ബ്‌ളാസ്‌റ്റേഴ്‌സിന് താല്‍പ്പര്യം ഉണ്ടായിരുന്നു. യുവതാരമായി ബ്ലാസ്റ്റേഴ്സ് കൊണ്ടുവന്ന ഹോര്‍മിപാമാണ് ബഗാനിലേക്ക് പോകുന്നത്. അതേസമയം ക്ലബ്ബ് ഇക്കാര്യത്തില്‍ ഔദ്യോഗിക സ്ഥിരീകരണം നടത്തിയിട്ടില്ല.
കഴിഞ്ഞ രണ്ടു സീസണായി സൂപ്പര്‍കപ്പും ഡ്യൂറന്റ്കപ്പും അടക്കം 38 കളിയാണ് മഞ്ഞക്കുപ്പായത്തില്‍ താരം കളിച്ചത്. ക്രൊയേഷ്യന്‍ മാര്‍ക്കോ ലെസ്‌കോവിച്ചിനൊപ്പം മികച്ച പ്രകടനം കാട്ടി ബ്‌ളാസ്‌റ്റേഴ്‌സ് ആരാധകരുടെ പ്രിയ താരമായും ഹോര്‍മിപാം മാറിയിരുന്നു.
സായ് ഫുട്‌ബോള്‍ അക്കാദമിയില്‍ നിന്നും 2018 ല്‍ മിനര്‍വ പഞ്ചാബിനൊപ്പം പന്തു തട്ടിത്തുടങ്ങിയ ഹോര്‍മിപാം ഇന്ത്യന്‍ ഫുട്‌ബോളിലെ ലൈം ലൈറ്റിലേക്ക് പെട്ടെന്ന് ഉയരുകയായിരുന്നു. ഇന്ത്യന്‍ ആരോസില്‍ ലോണില്‍ എത്തിയ താരം ഹീറോ ഐ ലീഗില്‍ ഗോകുലം കേരളയ്ക്ക് എതിരേയായിരുന്നു അരങ്ങേറിയത്. 2019 - 20 സീസണില്‍ റൗണ്ട്ഗ്‌ളാസ് പഞ്ചാബ് എഫ്‌സിയ്ക്കായും താരം കളിച്ചു.
Comments