തിരുവനന്തപുരം മൃഗശാലയിൽ പുതുതായി എത്തിച്ച ഹനുമാൻ കുരങ്ങ് കൂടിന് പുറത്ത് ചാടി. അക്രമ സ്വഭാവമുള്ള വിഭാഗത്തില്പ്പെട്ടതായതിനാല് പ്രദേശത്ത് ജാഗ്രതാ നിർദ്ദേശം നൽകി. മറ്റന്നാൾ പുതുതായി എത്തിച്ച മൃഗങ്ങളെ സന്ദർശകർക്ക് കാണാനായി തുറന്ന് വിടുന്ന ചടങ്ങ് നടക്കാനിരിക്കെയാണ് സംഭവം നടന്നത്. ഇതിന് മുന്നോടിയായി പരീക്ഷണാടിസ്ഥാനത്തില് കൂട് തുറന്ന് പരീക്ഷണം നടത്തിയപ്പോഴാണ് കുരങ്ങ് ചാടിപ്പോയത്.
പുതിയതായി എത്തിയ മൃഗങ്ങളെ കൈകാര്യം ചെയ്യുന്നതിൽ മൃഗശാല അധികൃതർക്ക് ഗുരുതര വീഴ്ച സംഭവിച്ചുവെന്നാണ് പ്രാഥമിക കണ്ടെത്തല്. ഹനുമാൻ കുരങ്ങിന് 15 ദിവസത്തെ കോറന്റൈൻ വേണമെന്ന നിർദ്ദേശവും പാലിച്ചില്ലെന്നാണ് ലഭിക്കുന്ന വിവരം. ജീവനക്കാർ തിരച്ചിൽ ആരംഭിച്ചു.
