ഇന്സ്റ്റന്റ് ലോണ് ആപ്ലിക്കേഷന് തട്ടിപ്പുകളില് മുന്നറിയിപ്പ് നല്കി കേരള പോലീസ്. ആപ്പുകള് വഴി ലോണെടുത്ത് തലയിലാകുന്നതിന് മുമ്പ് അറിഞ്ഞിരിക്കേണ്ട കാര്യങ്ങളെക്കുറിച്ചുള്ള മുന്നറിയിപ്പ് നല്കിയാണ് കേരള പൊലീസ് രംഗത്തെത്തിയിരിക്കുന്നത്. ലോണ് ലഭ്യമാകുന്നതിനുള്ള മൊബൈല് അപ്ലിക്കേഷന് ഇന്സ്റ്റാള് ചെയ്താല് തന്നെ നിങ്ങള് കെണിയില് ആയി കഴിഞ്ഞെന്നാണ് പോലീസ് പറയുന്നത്.
ഫോണിലെ ഡാറ്റകള് ആപ്പിലൂടെ തട്ടിപ്പുകാരുടെ കയ്യിലെത്തുകയും അതിനോടൊപ്പം ഫോണിലെ ഗ്യാലറിയിലുളള ഫോട്ടോയും മറ്റും പലതരത്തില് എഡിറ്റ് ചെയ്ത് മറ്റ് കോണ്ടാക്ടുകളിലേക്ക് അയച്ചുനല്കുകയും ചെയ്യുന്നു. ഇവര് ഈ ഫോട്ടോകള് ദുരുപയോഗം നടത്തുമെന്നും ഫേസ്ബുക്ക് കുറിപ്പിലൂടെ പോലീസ് മുന്നറിയിപ്പ് നല്കുന്നു. ഇത് കൂടാതെ ഫോണില് മറ്റു സ്വകാര്യവിവരങ്ങള് സേവ് ചെയ്തിട്ടുണ്ടെങ്കില് അതും തട്ടിപ്പുകാര് കൈവശപ്പെടുത്താന് സാധ്യതയുണ്ടെന്നും മുന്നറിയിപ്പില് പറയുന്നു.
കേരള പൊലീസിന്റെ കുറിപ്പിങ്ങനെ
ശ്രദ്ധിക്കണേ ഇന്സ്റ്റന്റ് ലോണ് എന്ന വാഗ്ദാനത്തില് തല വെയ്ക്കാന് തീരുമാനം എടുക്കുന്നതിന് മുന്പ് ഇക്കാര്യങ്ങള് നിങ്ങള് അറിഞ്ഞിരിക്കണം. ലോണ് ലഭ്യമാകുന്നതിനുള്ള മൊബൈല് അപ്ലിക്കേഷന് അതില് പറഞ്ഞിരിക്കുന്ന നിര്ദേശങ്ങള്ക്കനുസരിച്ച് ഇന്സ്റ്റാള് ചെയ്താല് തന്നെ നിങ്ങള് കെണിയില് ആയെന്നാണര്ത്ഥം. കാരണം ആ ആപ്പിലൂടെ നിങ്ങളുടെ ഫോണിലെ ഡാറ്റ തട്ടിപ്പുകാരുടെ കയ്യിലെത്തും. മാത്രമല്ല, നിങ്ങള്ക്ക് ലഭിക്കുന്ന തുകയ്ക്ക് ഭീമമായ പലിശയായിരിക്കും തട്ടിപ്പുകാര് ഈടാക്കുന്നത്. പലിശയുള്പ്പെടെ ഉള്ള തുക തിരിച്ചടയ്ക്കുന്നതില് വീഴ്ച വരുത്തിയാല് നിങ്ങളുടെ ഫോണില് നിന്ന് തന്നെ കൈക്കലാക്കിയ നിങ്ങളുടെ ഫോട്ടോയും മറ്റും പലതരത്തില് എഡിറ്റ് ചെയ്ത് നിങ്ങളുടെ തന്നെ ഫോണില് ഉള്ള കോണ്ടാക്ടുകളിലേക്ക് അയച്ചുനല്കി അപകീര്ത്തിപ്പെടുത്തും. ഫോണില് മറ്റു സ്വകാര്യവിവരങ്ങള് സേവ് ചെയ്തിട്ടുണ്ടെങ്കില് അതും തട്ടിപ്പുകാര് കൈവശപ്പെടുത്താന് ഇടയുണ്ട്. ഇനിയും ഇന്സ്റ്റന്റ് ലോണുകള്ക്ക് പിന്നാലെ പായണം എന്ന് തോന്നുന്നുണ്ടോ?
