കുട്ടികള്ക്ക് നല്കുന്ന ഭക്ഷണത്തില് എപ്പോഴും കരുതല് ഉണ്ടായിരിയ്ക്കണം. പ്രോട്ടീനുകള് നിറഞ്ഞ ഭക്ഷണമായിരിയ്ക്കണം അവര്ക്ക് നല്കേണ്ടത്. കുട്ടികള്ക്ക് നല്കുന്ന ഭക്ഷണങ്ങളില് പ്രധാനമാണ് പാല്. പാല് കുടിച്ചാല് കിട്ടുന്ന ആരോഗ്യ ഗുണങ്ങളെക്കുറിച്ച് എല്ലാവര്ക്കുമറിയാം. കാല്സ്യം, പ്രോട്ടീന്, വൈറ്റമിന് ഡി തുടങ്ങിയ പോഷകങ്ങളുടെ ഒരു പ്രധാന സ്രോതസ്സാണ് പാല്. എന്നാല് പാല് കുട്ടികള്ക്ക് കൊടുക്കുമ്പോള് അതിനോടൊപ്പം കൊടുക്കരുതാത്ത ചില ഭക്ഷണങ്ങള് ഉണ്ട് അവ എന്തൊക്കെയാണെന്ന് നോക്കാം...
മുന്തിരി - മുന്തിരിയോടൊപ്പം കുട്ടികള്ക്ക് പാല് കൊടുക്കരുത്. മുന്തിരിയുടെ അമ്ല സ്വഭാവവും അവയില് അടങ്ങിയിരിക്കുന്ന ഉയര്ന്ന അളവിലുള്ള വിറ്റാമിന് സിയുമായി സമ്പര്ക്കം പുലര്ത്തുമ്പോള് പാലില് അടങ്ങിയിരിക്കുന്ന പ്രോട്ടീന് ദൃഢമാകാനുള്ള പ്രവണതയാണ് ഇതിന് പിന്നിലെ കാരണം. ഇവ ഒരുമിച്ച് കഴിച്ചാല് ദഹനനാളത്തിന്റെ അസ്വസ്ഥത, വേദന, വയറിളക്കം എന്നിവ ഉണ്ടാകാം.
സിട്രസ് പഴങ്ങള് - പാലിനൊപ്പം ഒരു കാരണവശാലും സിട്രസ് പഴങ്ങള് നല്കാന് പാടില്ല. ഓറഞ്ചും നാരങ്ങയും പോലുള്ള സിട്രസ് പഴങ്ങളില് ഉയര്ന്ന അളവില് ആസിഡ് അടങ്ങിയിട്ടുണ്ട്, ഇത് പാലിലെ പ്രോട്ടീനുകള് കട്ടപിടിക്കാനും ദഹിപ്പിക്കാന് ബുദ്ധിമുട്ടാനും ഇടയാക്കും. ഇത് വയറുവേദന, തുടങ്ങിയ ദഹന പ്രശ്നങ്ങള്ക്ക് കാരണമാകും.
തണ്ണിമത്തന് - തണ്ണിമത്തനില് അടങ്ങിയിരിക്കുന്ന ആസിഡ് പാലിലെ പ്രോട്ടീനുകളെ പരസ്പരം ബന്ധിപ്പിക്കാന് ഇടയാക്കും. അതുകൊണ്ട് പാല് കട്ടപിടിക്കുകയും പുളിപ്പിക്കുകയും ചെയ്യാം, ഇത് ദഹനസംബന്ധമായ അസ്വസ്ഥതകള്ക്കും മറ്റ് അനുബന്ധ പ്രശ്നങ്ങള്ക്കും കാരണമാകും. അതിനാല്, ഈ ഭക്ഷണങ്ങള് ഒരേസമയം കഴിക്കുന്നത് നല്ലതല്ല.
ഉപ്പിട്ട സ്നാക്സ് - രക്ഷിതാക്കള് കുട്ടികള്ക്ക് പാലും ഉപ്പുരസമുള്ള ലഘുഭക്ഷണങ്ങളും നല്കുന്നത് ഒഴിവാക്കണം. ഉപ്പിട്ട സ്നാക്സുകള് നിര്ജ്ജലീകരണത്തിന് കാരണമാകും, ഇത് പാല് ദഹിപ്പിക്കാന് ശരീരത്തിന് ബുദ്ധിമുട്ടുണ്ടാക്കും. ഇത് ദഹനസംബന്ധമായ പ്രശ്നങ്ങള്ക്കും ശാരീരിക അസ്വസ്ഥതകള്ക്കും കാരണമാകും.
