മലയാളത്തിലെ പഴയകാല നായികമാര് ഒത്തുകൂടുന്ന ചിത്രങ്ങളെല്ലാം ആരാധകര് ആവേശത്തോടെ ഏറ്റെടുക്കാറുണ്ട്. മലയാള സിനിമയിലെ പ്രിയപ്പെട്ട നായികമാരായ മേനക, അംബിക, വിന്ദുജ, കാര്ത്തിക, ജലജ, മഞ്ജു പിള്ള, ശ്രീലക്ഷ്മി, ചിപ്പി, സോന നായര് ഒന്നിച്ചുള്ള ഒരു സൗഹൃദ ഗ്യാങ്ങുണ്ട്, അതിന്റെ പേരാണ് ലൗലീസ് ഓഫ് ട്രിവാൻഡ്രം. ഇവര് ഒരുമിച്ചു കൂടുന്നതിന്റെ ചിത്രങ്ങള് പലപ്പോഴും സോഷ്യല് മീഡിയയിലൂടെ ആരാധകരുടെ മുന്നിലെത്താറുണ്ട്. ഇപ്പോഴിതാ ഇവര് ഒന്നിച്ച് ഒരു അമ്മ വീട്ടില് എത്തിയതിന്റെ ചിത്രങ്ങളാണ് സോഷ്യല് മീഡിയ വഴി ശ്രദ്ധിക്കപ്പെടുന്നത്. തിരുവനന്തപുരത്ത് സ്ഥിതി ചെയ്യുന്ന വഞ്ചി പുവര്ഫണ്ട് അമ്മവീട്ടിലെത്തിയ താരങ്ങള് അമ്മമാര്ക്കായി ഉച്ച നേരത്തെ ഭക്ഷണവും ഒരുക്കിയിരുന്നു. സമ്മാനമായി ഇവര്ക്ക് പുതിയ വസ്ത്രങ്ങള് നല്കിയ ശേഷമാണ് അവര് മടങ്ങിയത്. ‘‘തിരുവനന്തപുരത്തെ അമ്മവീട്ടിൽ ഭവനരഹിതരായ അമ്മമാരോടൊപ്പം ഞങ്ങളുടെ പ്രിയപ്പെട്ടവർ തിരുവനന്തപുരത്തെ മനോഹരമായ ഒരു ദിവസം. അവരോടൊപ്പം വളരെ രുചികരമായ സദ്യ കഴിച്ചു. അവരുടെ പാട്ടുകൾ ആസ്വദിച്ചു...അവരുടെ വേദനാജനകമായ കഥകൾ കേട്ടു..ഞങ്ങൾ ഈ ദിനം അവിസ്മരണീയമാക്കി.അമ്മമാർക്കുള്ള പ്രാർത്ഥനകൾ.അത് ഞങ്ങൾക്ക് വലിയ അനുഗ്രഹമായിരുന്നു.’’ എന്നാണ് ചിത്രവും വീഡിയോയും പങ്കിട്ട് മേനക സുരേഷ് കുറിച്ചത്. ‘‘അമ്മമാര്ക്കൊപ്പം ഒരു ദിവസം, വഞ്ചി പുവര്ഫണ്ടില്, ലൗലീസ് ഓഫ് ട്രിവാൻഡ്രം..’’ എന്ന് സോന നായരും കുറിച്ചു. താരങ്ങളുടെ പ്രവൃത്തിയെ അഭിനന്ദിച്ച് ധാരാളം കമന്റുകളാണ് ചിത്രങ്ങള്ക്കു താഴെ നിറയുന്നുണ്ട്.
താരങ്ങളായ മേനക, അംബിക, കാര്ത്തിക, മഞ്ജു പിള്ള, ശ്രീലക്ഷ്മി, വിന്ദുജ, സോന നായര്, ചിപ്പി, ജലജ എന്നിവര് ഒരുമിച്ച് കൂടിയതിന്റെ ചിത്രങ്ങള്
കുറച്ച് ദിവസങ്ങള്ക്കു മുൻപ് മേനക പങ്കിട്ടിരുന്നു. ആ ചിത്രം ഏറെ വൈറലായിരുന്നു. സിനിമ - സീരിയല് മേഖലകളില് ഇവരില് പലരും ഇപ്പോഴും സജീവമാണ്. ‘‘ലൗലീസ് സംഘത്തോടൊപ്പം ഹൊറൈസോണില് വച്ച് നല്ലൊരു ഉച്ച ഭക്ഷണം കഴിച്ചു. ഒരുപാട് നല്ല ഓര്മകളും സന്തോഷവും പങ്കിട്ടു. വീണ്ടും കാണാം ലൗലീസ്,..’’ എന്നാണ് മേനക ചിത്രത്തിനൊപ്പം കുറിച്ചത്. എന്റെ ഏറ്റവും പ്രിയപ്പട്ട നായികമാര്, മനോഹരമായ ചിത്രം തുടങ്ങിയ കമന്റുകളാണ് ചിത്രത്തിനു താഴെ നിറഞ്ഞത്. 1980 കാലഘട്ടത്തില് മലയാള സിനിമയില് നിറഞ്ഞു നിന്ന താരങ്ങളോട് പ്രേക്ഷകര്ക്ക് ഒരു പ്രത്യേക സ്നേഹമുണ്ട്. ഇവര് ഒന്നിച്ച് സോഷ്യല് മീഡിയയില് പ്രത്യക്ഷപ്പെടുന്ന ചിത്രങ്ങളെല്ലാം അതിവേഗം വൈറലാകും.
