ചങ്ങനാശേരി തൃക്കൊടിത്താനത്ത് ക്ഷേത്രക്കുളത്തില് കുളിക്കാനിറങ്ങിയ വിദ്യാര്ത്ഥി മുങ്ങി മരിച്ചു. ചങ്ങനാശേരി തൃക്കൊടിത്താനം മണികണ്ഠ വയല് സ്വദേശി ആദിത്യ ബിജുവാണ് മരിച്ചത്. വൈകിട്ട് മുന്നരയോടെ ക്ഷേത്രക്കുളത്തില് കൂട്ടുകാര്ക്കൊപ്പം കുളിക്കാന് ഇറങ്ങിയപ്പോഴാണ് അപകടമുണ്ടായത്.
അതിനിടെ സംസ്ഥാനത്ത് മഴക്കെടുതിയില് ഇന്ന് മരണം മൂന്നായി. തിരുവനന്തപുരം ആര്യനാട് കുളത്തില് വിദ്യാര്ത്ഥി മുങ്ങിമരിച്ചു. മലയടി നിരപ്പില് വീട്ടില് അക്ഷയ് ആണ് മരിച്ചത്. പാറശ്ശാലയില് വീടിന് മുകളില് വീണ മരക്കൊമ്പ് വെട്ടിമാറ്റുന്നതിനിടയില് കാല് വഴുതിവീണ് ഗൃഹനാഥന് മരിച്ചു. ചെറുവാരകോണം ബ്രൈറ്റ് നിവാസില് ചന്ദ്രനാണ് മരിച്ചത്.
സംസ്ഥാനത്ത് ഒരാഴ്ചക്കിടെ മഴക്കെടുതിയില് മരിച്ചവരുടെ എണ്ണം പതിനൊന്നായി. ഇന്നലെ കോഴിക്കോട് ജില്ലയില് കാണാതായ രണ്ടു പേര്ക്കായി തെരച്ചില് തുടരുകയാണ്. എറണാകുളത്തും അപ്പര്കുട്ടനാട്ടിലും നൂറുകണക്കിന് വീടുകള് ഇപ്പോഴും വെള്ളത്തിലാണ്.
