മലയാളികളെ ഏറെ ചിരിപ്പിക്കുകയും രസിപ്പിക്കുകയും ചെയ്ത ഒരു സിനിമയായിരുന്നു മോഹന്ലാല് നായകനായ ‘യോദ്ധ’. സിനിമയിലെ ‘പടകാളി ചണ്ഡി ചങ്കരി’ എന്ന് തുടങ്ങുന്ന ഗാനം ആ ചിത്രത്തിലെ ഹിറ്റ് ഗാനങ്ങളില് ഒന്നാണ്. മോഹന്ലാലും ജഗതി ശ്രീകുമാറും തകര്ത്തഭനയിച്ച ഈ ഗാനരംഗം ഏ.ആര്. റഹ്മാന്റെ സംഗീതസംവിധാനത്തില് പിറന്ന ഒരു ഗാനം കൂടിയാണെന്ന പ്രത്യേകത കൂടിയുണ്ട്. പല വേദികളിലും പല ഗായകരും ഈ ഗാനം പാടി കൈയടി നേടിയിട്ടുണ്ട്. ഇപ്പോഴിതാ ഈ ഗാനം പാലക്കാട് സ്വദേശി ശരണ് തന്റെ ഹാര്മോണിയത്തിലൂടെ വായിച്ചു ശ്രദ്ധ നേടിയിരിക്കുകയാണ്. വളരെ ചുരുങ്ങിയ സമയം കൊണ്ട് കൊണ്ട് വൈറല് ആയ ഈ വീഡിയോ ചെര്പ്പുളശ്ശേരിയിലെ വരമ്പ് കൂട്ടായ്മ സംഘടിപ്പിച്ച സായാഹ്ന സംഗീതപരിപാടിയുടേതായിരുന്നു. നിരവധി പേര് ഷെയര് ചെയ്ത ഈ വീഡിയോ എ.ആര്.റഹ്മാന്റെ ശ്രദ്ധയില്പ്പെടുകയും അദ്ദേഹം ഈ വിഡിയോയ്ക് അഭിനന്ദിച്ചു പോസ്റ്റിടുകയും ചെയ്തു. ശരണ് തന്റെ മാന്ത്രികകൈയിലൂടെ ഈ ഗാനം പ്ലേ ചെയ്തപ്പോള് കാണികള് നിറകൈയടിയോടെ സ്വീകരിച്ചു. ഗായകനും സംഗീതസംവിധായകനുമായ പിതാവ് സുധീഷ് ശേഖറും ഒപ്പം ഉണ്ടായിരുന്നു. ‘‘വരമ്പിലെ മഴത്താളത്തിൽ വിരലുകൾ കൊണ്ട് വിസ്മയം തീർത്ത് അപ്പു...ഉളള് നിറക്കുന്ന വരമ്പിരുത്തം...’’ എന്ന ക്യാപ്ഷനും നല്കിയാണ് ഈ വീഡിയോ ഇന്സ്റ്റഗ്രാമിലൂടെ പങ്കിട്ടിരിക്കുന്നത്.
പ്ലസ്ടു വിദ്യാര്ഥിയായ ശരണ് അച്ഛന് സുധീഷിന്റെ പാത തന്നെ പിന്തുടര്ന്ന് സംഗീതത്തിലേക്ക് എത്തിയതാണ്. കുട്ടിക്കാലത്തു തന്നെ സംഗീതത്തിലേക്കെത്തിയ ശരണ് ഇലക്ട്രോണിക് കീബോര്ഡിലും ഹാര്മോണിയത്തിലും പ്രാവീണ്യം നേടിയിട്ടുണ്ട്. താളത്തിന്റെ മാസ്മരികത തീര്ത്ത ശരണിന്റെ ഹാര്മോണിയം വായന സമൂഹമാധ്യമങ്ങള് നിറഞ്ഞ കൈയ്യടിയോടെയാണ് ഏറ്റെടുത്തത്.
