മാര്ക്കറ്റിംഗ് കമ്പനിയായ ഗ്രോത്തിക്കിന്റെ സ്ഥാപകന് യുഗാന്ഷ് ചൊക്ര വ്യത്യസ്തമായി തന്റെ ശ്രദ്ധയില്പ്പെട്ട ഒരു സിവി കഴിഞ്ഞ ദിവസം ലിങ്ക്ഡിനില് പങ്കുവയ്ക്കുകയുണ്ടായി. ഒരു സ്ത്രീയുടെതായിരുന്നു ഈ സിവി. 'ഏറ്റവും സത്യസന്ധ്യയായ സ്ത്രീ' എന്ന് വിശേഷിപ്പിച്ചു കൊണ്ടാണ് യുഗാന്ഷ് ചൊക്ര ഈ സിവി സാമൂഹിക മാധ്യമത്തില് പങ്കുവെച്ചത്. തന്റെ വര്ക്ക് എക്സ്പീരിയന്സായി 13 വര്ഷക്കാലം വീട്ടമ്മയായിരുന്നുവെന്നാണ് അവര് ചേര്ത്തിരുന്നത്.
ഒരു വീട്ടമ്മ എന്ന നിലയില് തന്റെ വിലപ്പെട്ട കഴിവുകള് ഉയര്ത്തി കാട്ടി കൊണ്ടായിരുന്നു ആ സ്ത്രീ 13 വര്ഷത്തെ തന്റെ അനുഭവ പരിചയത്തെ ന്യായീകരിച്ചത്. തന്റെ ശ്രദ്ധയില്പ്പെട്ടതില് വച്ച് ഏറ്റവും സത്യസന്ധമായതും ആകര്ഷണീയവുമായ സിവി എന്നായിരുന്നു യുഗാന്ഷ് ചൊക്ര ഇതിനെ വിശേഷിപ്പിച്ചത്. താന് ഇത് ഇഷ്ടപ്പെടുന്നതിനുള്ള കാരണവും അദ്ദേഹം വ്യക്തമാക്കി. തന്റെ സോഷ്യല് മീഡിയ പോസ്റ്റില് അദ്ദേഹം കുറിച്ചത് ഇങ്ങനെയായിരുന്നു; ''ഒരു കുടുംബത്തെ നിയന്ത്രിക്കുന്നത് ഒരു യഥാര്ത്ഥ ജോലിയാണ്, അത് വിലകുറച്ച് കാണാന് കഴിയില്ല.
20 % സ്ത്രീകള് മാത്രമാണ് പ്രൊഫഷണല് ജോലി ചെയ്യുന്നത്. കുട്ടികളുള്ള ദമ്പതികള്ക്കിടയില് വീട്ടുജോലി പങ്കാളിത്തത്തിലെ ലിംഗ വ്യത്യാസം ഏറ്റവും വലുതാണ്. ഇതൊരു യഥാര്ത്ഥ ജോലിയാണ്, ഒരു കുടുംബത്തെ നിയന്ത്രിക്കാന് ഒരാള് ചെയ്യേണ്ട ജോലിയെ വിലകുറച്ച് കാണാനാകില്ല.' അദ്ദേഹം ഇതിനൊപ്പം സിവിയുടെ ചിത്രവും പോസ്റ്റ് ചെയ്തിരുന്നു.
