ഐസ്ക്രീം പ്രേമികള്ക്കായി വ്യത്യസ്തമായ ഒരു വിരുന്നൊരുക്കി ബംഗളൂരുവിലെ ഒരു ഐസ്ക്രീം പാര്ലര്. ദേശീയ ഐസ്ക്രീം ദിനാചരണത്തോടനുബന്ധിച്ചാണ് ഇവര് ഇത്തരത്തില് മനോഹരമായ ഒരു ആശയം നടപ്പിലാക്കിയത്. ക്യാഷ് കൗണ്ടറിലെത്തി ഐസ്ക്രീം ആവശ്യമുള്ള ആളുകള് 'രണ്ട് ചുവട് നൃത്തം വെച്ചാല് ഒരു സ്കൂപ്പ് ഫ്രീ.' ഇതായിരുന്നു ഐസ്ക്രീം പ്രേമികളെ കാത്തിരുന്ന സമ്മാനം.
ജൂലൈ മാസത്തിലെ മൂന്നാമത്തെ ഞായറാഴ്ചയാണ് എല്ലാ വര്ഷവും ദേശീയ ഐസ്ക്രീം ദിനമായി ആചരിക്കുന്നത്. ഈ വര്ഷം ജൂലൈ 16 -നായിരുന്നു ഇത്. ബംഗളൂരുവിലെ 'കോര്ണര് ഹൗസ് ഐസ്ക്രീംസ്' ആണ് പണത്തിന് പകരം ഡാന്സ് കളിക്കുന്നവര്ക്ക് സൗജന്യമായി ഐസ്ക്രീം സ്കൂപ്പുകള് വിതരണം ചെയ്ത് ഐസ്ക്രീം ദിനാചരണം നടത്തിയത്. ഇവര് തങ്ങളുടെ ഇന്സ്റ്റാഗ്രാം പേജിലൂടെയായിരുന്നു ഐസ്ക്രീം ദിനാചരണത്തിന് മുന്നോടിയായി ഇത്തരത്തിലൊരു പ്രഖ്യാപനം നടത്തിയത്. നിരവധിയാളുകളാണ് ഇത് ശ്രദ്ധിക്കപ്പെട്ടതോടെ കോര്ണര് ഹൗസ് ഐസ്ക്രീംസില് എത്തിയത്.
സൗജന്യമായി ഐസ്ക്രീം വേണ്ടവര്ക്ക് ക്യാഷ് കൗണ്ടറിലെത്തി പണം അടയ്ക്കുന്നതിന് പകരം ഒരു ഡാന്സ് കളിക്കണമെന്നായിരുന്നു നല്കിയിരുന്ന നിര്ദ്ദേശം. ഇങ്ങനെ ഡാന്സ് കളിക്കുന്നത് പാര്ലറിനുള്ളിലെ സിസിടിവി ക്യാമറകള് ഉപയോഗിച്ച് ചിത്രീകരിച്ച് അവര് ഇന്സ്റ്റഗ്രാമില് പങ്കുവെച്ചു. പ്രായഭേദമന്യേ തങ്ങളോട് സഹകരിച്ചവരോട് സന്തോഷമുണ്ടെന്ന് കോര്ണര് ഹൗസ് ഐസ്ക്രീംസ് പ്രതിനിധികള് സാമൂഹിക മാധ്യമങ്ങളിലൂടെ പ്രതികരിച്ചു.
