സുഖസൗകര്യങ്ങളും ആഡംബര വാഹനങ്ങളും വീടുകളുമൊക്കെയുണ്ടെങ്കിലും ജീവിതത്തില് താന് സംതൃപ്തയല്ലെന്ന് അമേരിക്കന് യുവ സംരംഭക. യുഎസ് ആസ്ഥാനമാക്കി പ്രവര്ത്തിക്കുന്ന ജെസീക്ക മാഹ് ആണ് സോഷ്യല് മീഡിയയിലൂടെ ഇത്തരമൊരു വെളിപ്പെടുത്തല് നടത്തിയിരിക്കുന്നത്.
ഒരു ഫിന്ടെക് കമ്പനിയുടെ സ്ഥാപകയാണ് ഇവര് ചെറിയ പ്രായത്തില് തന്നെ സ്വന്തമായി ഒരു ബിസിനസ് എന്ന ആഗ്രഹത്തില് നിന്നും കാലക്രമേണ കെട്ടിപ്പടുത്തതാണ് ഇപ്പോഴുളള ബിസിനസ് സാമ്രാജ്യം. ഇവര് ഇന്ന് ലോകമെമ്പാടുമുള്ള സംരംഭകര്ക്ക് മാതൃകയും പ്രചോദനവുമൊക്കെയാണ്. എന്നാല്, പ്രൈവറ്റ് ജെറ്റുകളും ആഡംബര വാഹനങ്ങളും അടങ്ങുന്ന സുഖസൗകര്യങ്ങളും മറ്റുമുണ്ടെങ്കിലും താന് ജീവിതത്തില് സന്തുഷ്ടയല്ല എന്ന് വെളിപ്പെടുത്തിരിക്കുകയാണ് ഈ യുവതി.
പുറമേ നിന്നു നോക്കുമ്പോള് മറ്റുള്ളവര്ക്ക് അസൂയ തോന്നിപ്പിക്കുന്ന ജീവിതമാണ് തന്റേതെങ്കിലും താന് ആഴ്ചയില് 60 മണിക്കൂറോളം കഠിനമായി ജോലി ചെയ്യാറുളളതായി ഇവര് പറയുന്നു. തന്റെ നേട്ടങ്ങള് നഷ്ടപ്പെടാതിരിക്കാനുളള പോരാട്ടത്തിലാണ് താന്. ആ പോരാട്ടത്തിനിടയില് തന്നെക്കാള് വലിയ നേട്ടങ്ങള് കരസ്ഥമാക്കിയവരുമായി താന് സ്വയം താരതമ്യം ചെയ്യാറുണ്ടെന്നും അത് പലപ്പോഴും തന്നെ അസ്വസ്ഥയാക്കുമെന്നും മറ്റുള്ളവരുമായുള്ള താരതമ്യം എപ്പോഴും ഒരാളുടെ സന്തോഷത്തെ കവര്ന്നെടുക്കുമെന്നും അവര് വെളിപ്പെടുത്തി.
ജെസീക്ക മാഹ് സോഷ്യല് മീഡിയയിലൂടെ സ്ക്രോള് ചെയ്യുന്നത് നിര്ത്തണമെന്നും തന്റെ ഫോളോവേഴ്സിനെ ഓര്മ്മിപ്പിച്ചു. കാരണം അത് സന്തോഷത്തിലേക്ക് നയിക്കില്ലെന്നും ആരും തങ്ങളുടെ അരക്ഷിതാവസ്ഥയും സ്വകാര്യ വെല്ലുവിളികളും സോഷ്യല് മീഡിയയില് പ്രദര്ശിപ്പിക്കുന്നില്ലെന്നും അവര് ചൂണ്ടിക്കാണിച്ചു.
