സിനിമാമേഖലയില് ആണ്-പെണ് ഭേദമില്ലാതെ മിക്ക സെലിബ്രിറ്റികളും നേരിടുന്നതാണ് കാസ്റ്റിംഗ് കൗച്ച്. ചിലര്ക്കത് വലിയ മാനസിക ശാരീരിക വിഷമങ്ങളും ഉണ്ടാക്കാറുണ്ട്. ഇപ്പോള് പലരും തങ്ങള് നേരിട്ട ദുരനുഭവം തുറന്നു പറയാനുള്ള മനസ്സ് കാണിക്കാറുണ്ട്. നിരവധി താരങ്ങള് ഇതിനകം അവര്ക്കുണ്ടായ ദുരനുഭവങ്ങള് തുറന്ന് പറഞ്ഞിട്ടുണ്ട്. അവസരങ്ങള്ക്ക് പകരമായി കിടക്ക പങ്കിടാൻ ആവശ്യപ്പെട്ടെന്ന വെളിപ്പെടുത്തലുമായി എത്തിയവരില് മുതിര്ന്ന താരങ്ങളടക്കമുണ്ടെന്നതാണ് പലരും പറഞ്ഞിട്ടുള്ളത്. ഇപ്പോഴിതാ തനിക്കുണ്ടായ അത്തരമൊരു അനുഭവം തുറന്നു പറയുകയാണ് നടി ചാരു അസോപ. നിരവധി ടെലിവിഷൻ പരമ്പരകളിലൂടെ ശ്രദ്ധനേടിയിട്ടുള്ളതാണ് താരം. രാജസ്ഥാനിലെ ബിക്കാനീറില് നിന്ന് നടിയാകാനുള്ള സ്വപ്നവുമായി മുംബൈയില് എത്തിയതിനെ കുറിച്ച് പറഞ്ഞാണ് ചാരു തുടങ്ങിയത്. ‘‘ബിക്കാനീര് വിട്ടപ്പോള് എന്റെ കണ്ണുകളില് സ്വപ്നങ്ങളേ ഉണ്ടായിരുന്നുള്ളൂ. ഞാൻ ആദ്യമായി മുംബൈയില് വന്നപ്പോള് എന്റെ കുടുംബം മുഴുവൻ എന്നോടൊപ്പം വന്നിരുന്നു. വാടകയ്ക്ക് വീട് കിട്ടി, അവിടെ താമസം തുടങ്ങിയ ശേഷം അച്ഛനും സഹോദരനും പോയി. എന്റെ അമ്മ എന്നോടൊപ്പം നില്ക്കുകയും ഓഡിഷനുകളിലും മീറ്റിംഗുകളിലുമെല്ലാം എന്നെ അനുഗമിക്കുകയും ചെയ്തു. ഇൻഡസ്ട്രിയെ കുറിച്ച് ഒരുപാട് കേട്ടിട്ടുണ്ട്. എല്ലാവര്ക്കും ആശങ്കയുണ്ടായിരുന്നതില് ഓഡിഷനുകള്ക്ക് എന്നെ ഒറ്റയ്ക്ക് വിടാൻ അമ്മ ആഗ്രഹിച്ചില്ല. ഞാൻ ആ സമയത്ത് ഒരുപാട് മീറ്റിംഗുകള്ക്ക് പോയിരുന്നു, അതിനിടെ അറിയപ്പെടുന്ന ഒരു പ്രൊഡക്ഷൻ ഹൗസില് നിന്നുള്ള ഒരു നിര്മ്മാതാവിനെ കണ്ടു. കരാറിലേക്ക് വരെ എത്തി. കാസ്റ്റിംഗ് ഡയറക്ടര് കരാറുമായി വന്നു. പേനയെടുത്ത് കരാര് ഒപ്പിടാൻ പോയപ്പോള്, തനിക്കറിയാവുന്ന കുറച്ച് ആളുകളുമായി വിട്ടുവീഴ്ച ചെയ്യണമെന്ന് അദ്ദേഹം പറഞ്ഞു. അതിന് എനിക്ക് കഴിയില്ലെന്ന് ഞാൻ പറഞ്ഞു. ഞാൻ ചെയ്തില്ലെങ്കില് പുറത്ത് അതിന് തയ്യാറായി പെണ്കുട്ടികള് ഇരിക്കുന്നുണ്ടെന്നാണ് അവര് പറഞ്ഞത്. ആ സംഭവത്തിന് ശേഷം മൂന്ന് ദിവസം എനിക്ക് പനിയായിരുന്നു...’’ ചാരു പറയുന്നു. നിരവധി തവണ അവസരങ്ങള് നഷ്ടമായതിനെ കുറിച്ചും ചാരു അഭിമുഖത്തില് പറയുന്നുണ്ട്.
തന്റെ വ്യക്തിജീവിതത്തില് മുൻ ഭര്ത്താവ് രാജീവ് സെന്നുമായുണ്ടായ പ്രശ്നങ്ങളുടെ പേരില് വാര്ത്തകളില് ഇതിനു മുമ്പ് നിറഞ്ഞിട്ടുണ്ട്. 18 മാസം പ്രായമുള്ള മകളുമായി ഒറ്റയ്ക്ക് ജീവിക്കുകയാണ് ചാരു ഇപ്പോള്. സിംഗിള് മദറായ ശേഷം അഭിനയത്തില് എന്തെങ്കിലും മാറ്റങ്ങള് വന്നിട്ടുണ്ടോ എന്ന് ചോദിച്ചപ്പോള് തന്റെ സാമ്പത്തിക സ്ഥിരതയെ ആശ്രയിച്ചാണ് എല്ലാം എന്ന മറുപടിയാണ് ചാരു നല്കിയത്. സാമ്പത്തികമായി എന്തെങ്കിലും ബുദ്ധിമുട്ടുകള് വന്നാല് മുന്നില് വരുന്ന അവസരങ്ങളെല്ലാം രണ്ടാമതൊന്ന് ആലോചിക്കാതെ തിരഞ്ഞെടുക്കാനാണ് തീരുമാനമെന്നും അവര് വ്യക്തമാക്കി. കൈസാ യെ റിഷത അഞ്ജാന എന്ന പരമ്ബരയിലാണ് ചാരു അസോപ ഇപ്പോള് അഭിനയിക്കുന്നത്.
