സംവിധായകനും നിര്മ്മാതാവും അഭിനേതാവുമൊക്കെയായിരുന്ന ഫിറോസ് ഖാന്റെ മകനും അഭിനേതാവുമായ ഫര്ദ്ദീന് ഖാന് ബോളിവുഡ് സിനിമകളില് നിറഞ്ഞു നിന്നൊരു കാലമുണ്ടായിരുന്നു. പക്ഷേ ഫര്ദ്ദീന് ഖാനെ വെള്ളിത്തിരയില് നിന്ന് കാണാതായിട്ട് വര്ഷങ്ങളായി. എങ്കിലും ഇപ്പോഴും താരത്തിന്റെ ആരാധകരുടെ കാര്യത്തില് ഒട്ടും തന്നെ കുറവുകളില്ല. അഭിനയത്തില് നിന്നും വിട്ടു നില്ക്കുമ്പോഴും സോഷ്യല് മീഡിയയില് സജീവമാണ് താരം. എല്ലാ വിശേഷങ്ങളും താരം അതിലൂടെ പങ്കിടാറുണ്ട്. കുറച്ചു നാളുകളായി താരത്തിന്റെ പേര് മാധ്യമങ്ങളില് നിറയുന്നത് വ്യക്തിജീവിതത്തിലെ ചില പൊരുത്തക്കേടുകള് വഴിയാണ്. ഫര്ദ്ദീൻ ഭാര്യ നടാഷയുമായുള്ള വിവാഹബന്ധം അവസാനിപ്പിക്കാൻ പോകുന്നുവെന്നതിന്റെ പേരിലാണത്. രുവരും അകന്നാണ് കഴിയുന്നതെന്നും വൈകാതെ വേര്പിരിയുമെന്നുമാണ് അടുത്തിടെ ബിടൗണ് മാധ്യമങ്ങള് റിപ്പോര്ട്ട് ചെയ്തത്. പതിനെട്ട് വര്ഷങ്ങള് സുഖത്തിലും ദുഖത്തിലും ഒരുമിച്ച് നിന്നവര് എന്തിന് ഇത്രയും വര്ഷങ്ങള്ക്ക് ശേഷം പിരിയാൻ ഒരുങ്ങുന്നുവെന്ന വാര്ത്തയാണ് ആരാധകരില് വിഷമണമുണ്ടാക്കുന്നത്. അതിനു പിന്നാലെ ഇപ്പോഴിതാ പാപ്പരാസികളോട് ചൂടായതിന്റെ പേരില് വീണ്ടും ഫര്ദീന് വാര്ത്തകളില് നിറയുകയാണ്. കഴിഞ്ഞ ദിവസമാണ് മക്കള്ക്കൊപ്പം ഷോപ്പിങ് കഴിഞ്ഞ് കാറില് കയറാൻ എത്തിയ നടാഷയും ഫര്ദ്ദീനും മാധ്യമങ്ങള്ക്ക് മുമ്പില്പ്പെട്ടു. കുടുംബത്തോടൊപ്പമുള്ള തന്റെ ചിത്രങ്ങള് പാപ്പരാസികള് ക്ലിക്ക് ചെയ്തതില് ഫര്ദീൻ അസ്വസ്ഥത പ്രകടിപ്പിക്കുക മാത്രമല്ല പരുഷമായി പെരുമാറുകയും ചെയ്തു. വീഡിയോ വൈറലായതോടെ എന്തിനാണ് ഫര്ദ്ദീന് മോശമായി പെരുമാറിയത് എന്ന സംശയത്തിലാണ് ആരാധകര്. എന്നാല് ഒരു കൂട്ടര് ഫര്ദീൻ ഖാന്റെയും കുടുംബത്തിന്റെയും ഫോട്ടോയും ചിത്രങ്ങളും വന്നതോടെ ഇവര് പിരിയുന്നില്ല എന്ന ആശ്വാസത്തിലുമാണ്.
പ്രശസ്ത നടി മുംതാസിന്റെ മകളാണ് നടാഷ. ഒരു വര്ഷത്തോളമായി ഇവരുടെ താമസം രണ്ടിടത്താണ് എന്നാണ് അടുത്തിടെ ടൈംസ് ഓഫ് ഇന്ത്യ റിപ്പോര്ട്ടില് പരാമര്ശിച്ചത്. ഏറെ നാളത്തെ കാത്തിരിപ്പിന് ശേഷമാണ് ഇവര്ക്ക് കുഞ്ഞുണ്ടായത്. ഇരട്ട കുഞ്ഞുങ്ങളെ ഗര്ഭാവസ്ഥയില് വെച്ച് നഷ്ടപ്പെട്ടിരുന്നു. അതിനു ശേഷം ഡയാനി, അസേറിയസ് എന്നീ മകനും മകളും ഇവര്ക്ക് ജനിച്ചു. ഫര്ദ്ദീൻ കുറച്ചുകാലമായി ബോളിവുഡില് നിന്ന് വിട്ടുനില്ക്കുകയായിരുന്നു. ‘‘എന്റെ അച്ഛൻ മരിച്ചതിന് ശേഷം എനിക്ക് കുറച്ച് സമയം ആവശ്യമായി വന്നു. ഞാൻ പ്രയാസകരമായ കാലത്തിലൂടെ കടന്നുപോവുകയായിരുന്നു. 2009ല് എന്റെ അച്ഛൻ മരിച്ച് ഏതാനും മാസങ്ങള്ക്കുശേഷം എനിക്ക് ഒരു ചെറിയ ആരോഗ്യ ഭയം ഉണ്ടായിരുന്നു. പിന്നെ നടാഷയും ഞാനും ഒരു കുടുംബം വേണമെന്ന് വളരെ ആഗ്രഹിച്ചു. കുട്ടികളുണ്ടാകുന്നതില് ഞങ്ങള് വെല്ലുവിളികള് നേരിട്ടു. അതിനാല് ഞങ്ങള്ക്ക് ഐവിഫ് സ്വീകരിക്കേണ്ടി വന്നു..’’ എന്നാണ് താരം ഒരു അഭിമുഖത്തില് തന്റെ ഇടവേളയെക്കുറിച്ച് പറഞ്ഞത്. ഇപ്പോള് താരത്തിന്റെ തിരിച്ചുവരവിനെക്കുറിച്ചുള്ള അഭ്യൂഹങ്ങളും കേള്ക്കുന്നുണ്ട്. റിതേഷ് ദേശ്മുഖ് ചിത്രം വിസ്ഫോട്ട് മാത്രമല്ല 2005ലെ ഹിറ്റായ നോ എൻട്രിയുടെ തുടര്ച്ചയിലും താരമുണ്ടാകും എന്ന് കേള്ക്കുന്നുണ്ട്. 2010ല് പുറത്തിറങ്ങിയ ദുല്ഹ മില് ഗയേ എന്ന ചിത്രത്തിലാണ് ഫര്ദീൻ അവസാനമായി അഭിനയിച്ചത്.
