കാലിഫോർണിയയിൽ നിന്നുമുള്ള ഒരു സ്ത്രീക്കുണ്ടായ വിചിത്രമായ അനുഭവങ്ങളാണ് ഇപ്പോള് പുറത്തുവരുന്നത്. എല്ലാ ദിവസവും രാത്രിയിൽ ഇവരുടെ വീട്ടിൽ നിന്നും തട്ടലും മുട്ടലും അപരിചിതമായ ശബ്ദങ്ങളും കേള്ക്കുന്നുവെന്നാണ് ആഷ്ലി ഗാർഡിനോ എന്ന സ്ത്രീ പറയുന്നത്. വീട്ടിൽ നടന്ന തികച്ചും വിചിത്രമായ സംഭവങ്ങൾ ഇവര് ടിക്ടോക്കിലൂടെയാണ് പങ്കുവച്ചത്.
മൂന്ന് മാസത്തോളമാണ് ഇവരുടെ വീടിന്റെ ബേസ്മെന്റിൽ ഒരു അപരിചിതൻ ഒളിച്ച് കഴിഞ്ഞത്. ആദ്യം ആഷ്ലി കരുതിയിരുന്നത് വീടിന്റെ മുകൾ ഭാഗത്ത് നിന്നുമാണ് ശബ്ദം കേൾക്കുന്നത് എന്നാണ്. എന്നാൽ, ഒരു ദിവസം ഒരു കൈ വീടിന്റെ ബേസ്മെന്റിലെ ഒരു ദ്വാരത്തിൽ നിന്നും പുറത്ത് വരുന്നത് കണ്ടതോടെയാണ് ആഷ്ലിക്ക് കാര്യം മനസിലായത്. പേടിച്ചെങ്കിലും ഒടുവില് ഇവര് പോലീസിൽ വിവരമറിയിച്ചു. തുടര്ന്ന് പോലീസ് എത്തി ഇയാളെ അറസ്റ്റ് ചെയ്തു.
നേരത്തെ ജയിലിലായിരുന്ന ഇയാള് പരോളിൽ ഇറങ്ങിയപ്പോഴാണ് തന്റെ വീട്ടിൽ കഴിഞ്ഞത്. നേരത്തെയും പലരുടേയും വീടുകളിൽ ഇതുപോലെ കഴിഞ്ഞിട്ടുണ്ടെന്നും ഇയാൾ മയക്കുമരുന്നിന് അടിമയാണെന്നും ആഷ്ലി വ്യക്തമാക്കി. പോലീസ് ഇയാളെ കൊണ്ടുപോയി എങ്കിലും അതിന് ശേഷം മനസമാധാനമായി ഉറങ്ങാൻ സാധിച്ചില്ല എന്നും ആഷ്ലി പറഞ്ഞു. ടിക്ടോക്കിൽ 60 മില്ല്യൺ ആളുകളാണ് വീഡിയോ കണ്ടത്.
