കണ്ടാല് തീരെ ചെറുത്, എന്നാല് കൈയിലുള്ളതോ ഒരുപിടി നല്ല കഥാപാത്രങ്ങള്. പറഞ്ഞു വരുന്നത് ഒരുപിടി ഹിറ്റ് ചിത്രങ്ങളിലൂടെ പ്രേക്ഷകരുടെ പ്രീതി പിടിച്ചുപറ്റിയ തമിഴ് താരമായ ജാഫര് സാദിഖിനെക്കുറിച്ചാണ്. ലോകേഷ് കനകരാജ് സംവിധാനം ചെയ്ത വിക്രം, തിയേറ്ററില് തരംഗം സൃഷ്ടിക്കുന്ന നെല്സണ്-രജനി ചിത്രം ജയിലര് എന്നിവയിലെല്ലാം ജാഫറിന്റെ കഥാപാത്രങ്ങള് നിറഞ്ഞു നില്ക്കുകയാണ്. സോഷ്യല് മീഡിയയിലും സജീവമായ താരം എല്ലാ വിശേഷങ്ങളും അതിലൂടെ പങ്കിടാറുണ്ട്. ഇപ്പോഴിതാ തന്റെ ജീവിതത്തിലെ ഒരു വിലപ്പെട്ട വസ്തു സ്വന്തമാക്കിയ വിവരം പങ്കുവെച്ചിരിക്കുകയാണ് ജാഫര് സാദിഖ്. ജയിലര് സിനിമയില് ചില പ്രധാനപ്പെട്ട സ്റ്റൈലിഷ് രംഗത്ത് കറുത്ത കണ്ണട ധരിച്ചാണ് നായകൻ രജനികാന്ത് പ്രത്യക്ഷപ്പെടുന്നത്. ചിത്രത്തിന്റെ ട്രെയിലറില് പോലും ആ രംഗം കാണിക്കാറുണ്ട്. ആ കണ്ണട താന് സ്വന്തമാക്കിയെന്ന സന്തോഷമാണ് ജാഫറിനുള്ളത്. സൂപ്പര് താരം ധരിച്ച ഈ കണ്ണട താൻ സ്വന്തമാക്കി എന്നാണ് ജാഫര് സാദിഖ് കുറിച്ചത്. ‘‘ഞാൻ ചോദിച്ചു, അദ്ദേഹം തന്നു... താങ്ക്യൂ മൈ സൂപ്പര്സ്റ്റാര്... ചിത്രങ്ങള് എല്ലാം പറയും...’’ ട്വിറ്ററില് ജാഫര് ട്വീറ്റ് ചെയ്തത് ഇങ്ങനെയാണ്. ഒപ്പം കണ്ണടയുടെ ചിത്രങ്ങളും തന്റെ പഴയ ചിത്രവും ജാഫര് പോസ്റ്റ് ചെയ്തിട്ടുണ്ട്. കഴിഞ്ഞമാസം നാലാം തീയതിയാണ് സൂപ്പര് സ്റ്റാറില് നിന്നുള്ള സമ്മാനം ഏറ്റുവാങ്ങിയതെന്നുള്ള സൂചനയും എക്സില് പങ്കുവെച്ച കുറിപ്പിലുണ്ട്.
Na ketean , avar kuduthutar 04-07-2023 ❤️ Thank you my #superstar @rajinikanth ⭐️ picture says everything,en ellamey :) #jailer #Rajinikanth @sunpictures pic.twitter.com/FW3h38Wjbx
— jaffer sadiq (@JafferJiky) August 22, 2023
പാവ കഥൈകള്, വെന്ത് തണിന്തത് കാട് തുടങ്ങിയവയാണ് ജാഫര് സാദിഖിന്റെ പ്രധാന തമിഴ് ചിത്രങ്ങള്. ഈയിടെ വോയിസ് ഓഫ് സത്യനാഥൻ എന്ന ചിത്രത്തിലൂടെ മലയാളത്തിലും ജാഫറെത്തി. ടൈഗര് മുത്തുവേല് പാണ്ഡ്യനായി രജനികാന്ത് തകര്ത്ത് അഭിനയിക്കുന്ന ജയിലര് സിനിമ ഇപ്പോള് അഞ്ഞുറുകോടി കളക്ഷനും കടന്ന് കുതിക്കുകയാണ്. വില്ലന്വേഷത്തില് വിനായകനെത്തിയ ഈ സിനിമയില് മാത്യു എന്ന കഥാപാത്രമായി മോഹൻലാല്, നരസിംഹയായി ശിവരാജ്കുമാര് എന്നിവര് കാമിയോ വേഷങ്ങളിലെത്തി. രമ്യാ കൃഷ്ണൻ, തമന്ന, സുനില്, വസന്ത് രവി, മിര്ണാ മേനോൻ, ജാക്കി ഷ്റോഫ് എന്നിവരും താരനിരയിലുണ്ടായിരുന്നു. സണ് പിക്ചേഴ്സിന്റെ ബാനറില് കലാനിധി മാരനാണ് ജയിലറിന്റെ നിര്മാണം.
