മലയാളത്തില് മാത്രമല്ല തമിഴിലും തിളങ്ങി നില്ക്കുന്ന താരമാണ് പ്രിയങ്ക നായര്. മലയാളിയായ പ്രിയങ്ക ‘വെയില്’ എന്ന തമിഴ് ചിത്രത്തിലൂടെയാണ് വെള്ളിത്തിരയില് അരങ്ങേറ്റം കുറിച്ചത്. പിന്നീട് സുരേഷ് ഗോപി നായകനായ ‘കിച്ചാമണി എംബിഎ’ എന്ന ചിത്രത്തിലൂടെയാണ് മലയാളത്തില് അഭിനയിച്ചു തുടങ്ങിയത്. മലയാളത്തില് നായികയായും സഹനടിയായുമൊക്കെ പ്രിയങ്ക തിളങ്ങി. ഒരുപിടി ശ്രദ്ധേയ സിനിമകളിലൂടെ പ്രേക്ഷകര്ക്ക് സുപരിചിതയായ താരം വിവാഹത്തോടെ ചെറിയൊരു ഇടവേളയെടുത്തിരുന്നു. തമിഴ് നടനും സംവിധായകനുമായ ലോറൻസ് റാം ആയിരുന്നു പ്രിയങ്കയുടെ ഭര്ത്താവ്. 2012 ല് വിവാഹിതരായ ഇരുവരും 2015 ല് വേര്പിരിഞ്ഞു. അതോടെ കരിയറിനൊപ്പം തന്നെ പ്രിയങ്കയുടെ സ്വകാര്യ ജീവിതം പലപ്പോഴും ചര്ച്ചയായിത്തുടങ്ങി. പ്രിയങ്കയ്ക്ക് ഒരു മകനാണ് ഉള്ളത്. മകന് വേണ്ടിയാണു താൻ ജീവിക്കുന്നതെന്ന് പ്രിയങ്ക പറഞ്ഞിട്ടുണ്ട്. ഇപ്പോഴിതാ മകനെ കുറിച്ചും മകന് വേണ്ടി സിനിമകള് ചെയ്യുന്നതിനെക്കുറിച്ചും പറയുകയാണ് പ്രിയങ്ക.
‘‘കുഞ്ഞായിരുന്ന സമയത്ത് ലൊക്കേഷനിലേക്ക് കൊണ്ട് പോകുമായിരുന്നു. കുറേദിവസം ഞാന് ഷൂട്ടിലാണെങ്കില് ഇടയ്ക്ക് അവന് ലൊക്കേഷനിലേക്ക് വരും. കുറച്ചുമുന്പ് വരെ നല്ല ഗ്യാപ്പെടുത്താണ് സിനിമകള് ചെയ്തിരുന്നത്. മോന്റെ വളര്ച്ചയില് അമ്മയുടെ പ്രസന്സ് ഉണ്ടാവണം എന്ന് നിര്ബന്ധമായിരുന്നു. ഇപ്പോള് അവന് കുറച്ചൂടെ വലുതായി. ഇത് അമ്മയുടെ ജോലിയാണെന്ന് അവനറിയാം. ഷൂട്ട് കഴിഞ്ഞ് വരുമ്പോള് വീട്ടിലുണ്ടാക്കിയ ഭക്ഷണം തന്നെ വേണമെന്നുണ്ട്. അമ്മേ, ഞാന് അവിടെ വന്നിട്ടേ കഴിക്കുള്ളൂ എന്ന് വിളിച്ച് പറയാറുണ്ട്. ഒരു കഞ്ഞി കിട്ടിയാലും ഞാന് ഹാപ്പിയാണ്. വീട്ടിലെപ്പോഴും മൂന്നാല് കറികളുണ്ടാവും. പച്ചക്കറി കുറേ കഴിപ്പിക്കാനുള്ള അടവുകളിലൊന്നാണ് അത്. ചോറും തൈരും കൊടുത്താലും ടേസ്റ്റോടെ കൊടുക്കണമെന്നാണ്. നല്ല കുത്തരിച്ചോറും പരിപ്പും നെയ്യുമുണ്ടെങ്കില് എനിക്ക് വേറെ കറികളൊന്നും വേണ്ട. അച്ഛന്റെ ഇഷ്ടം എനിക്ക് കിട്ടി. നേരത്തെ മോനത് ഇഷ്ടമായിരുന്നില്ല. ഇപ്പോള് ഇഷ്ടമാണ്. ഈ നിമിഷം പ്രിയപ്പെട്ടവരുടെ കൂടെ കഴിയുക, അടുത്ത മോമെന്റില് എന്താണെന്ന് നമുക്കറിയില്ലല്ലോ. അതിന് ഞാൻ എപ്പോഴും ശ്രദ്ധിക്കാറുണ്ട്...’’ പ്രിയങ്ക പറയുന്നു.
ടി.വി.ചന്ദ്രന് സംവിധാനം ചെയ്ത വിലാപങ്ങള്ക്കപ്പുറം എന്ന ചിത്രത്തിലൂടെ 2008 ല് മികച്ച നടിക്കുളള സംസ്ഥാന പുരസ്കാരം പ്രിയങ്ക നേടി. നിരവധി പരമ്പരകളിലും ടെലിവിഷൻ പ്രോഗ്രാമുകളിലും പ്രിയങ്ക സാന്നിധ്യം അറിയിച്ചിരുന്നു. ഇപ്പോള് പൂര്ണമായും സിനിമയിലാണ് താരം ശ്രദ്ധ കേന്ദ്രീകരിച്ചിരിക്കുന്നത്. അന്താക്ഷരി, ട്വല്ത്ത് മാന്, കടുവ തുടങ്ങി കഴിഞ്ഞ വര്ഷം പുറത്തിറങ്ങിയ ചില മലയാള ചിത്രങ്ങളില് പ്രിയങ്ക പ്രധാന വേഷത്തില് എത്തിയിരുന്നു. മോഹൻലാല്-ജീത്തു ജോസഫ് ചിത്രം റാം അടക്കം മൂന്ന് ചിത്രങ്ങളാണ് അണിയറയില് ഉള്ളത്. ഇതിലൊന്ന് തമിഴ് ചിത്രമാണ്. അനൂപ് മേനോൻ നായകനായ വരാല് ആണ് പ്രിയങ്കയുടേതായി ഒടുവില് റിലീസ് ചെയ്ത സിനിമ.
