കായികപ്രേമികള്ക്ക് ഏറെയിഷ്ടമുള്ള താരദമ്പതിമാരായിരുന്നു സാനിയ മിര്സയും ഷൊയ്ബ് മാലിക്കും. ഇവര് തമ്മില് പിരിയാനൊരുങ്ങുന്നു എന്ന വാര്ത്ത കുറച്ചു നാളുകളായി മാധ്യമങ്ങളില് നിറയാറുണ്ട്. ഇരുവരും ഇത് സംബന്ധിച്ച് ഔദ്യോഗിക സ്ഥിരീകരണം നടത്തിയിട്ടില്ലെങ്കിലും സാനിയയും മാലിക്കും വേര്പിരിഞ്ഞാണ് താമസിക്കുന്നത് എന്നാണ് റിപ്പോര്ട്ട്. സാനിയ മിര്സയുടേയും ഷൊയ്ബ് മാലിക്കിന്റെ ചില സോഷ്യല് മീഡിയ ഇടപെടലുകളും വിവാഹ മോചന വാര്ത്തകള്ക്ക് ബലം കൂട്ടിയിരുന്നു. ഇപ്പോഴിതാ സാനിയ-ഷൊയ്ബ് വിവാഹമോചനത്തില് ഞെട്ടിക്കുന്ന വെളിപ്പെടുത്തല് നടത്തിയിരിക്കുകയാണ് പാക് മുന് മന്ത്രിയും രാഷ്ട്രീയ നേതാവുമായ ഫിര്ദൗസ് ആഷിഖ് അവാന്. ‘ഹസ്ന മന ഹേ’ എന്ന ഷോയില് സംസാരിക്കുമ്പോഴായിരുന്നു ഫിര്ദൗസിന്റെ പ്രതികരണം.
2010 ല് ആയിരുന്നു സാനിയ മിര്സ-ഷൊയ്ബ് മാലിക്ക് വിവാഹം. ഇന്ത്യ, പാകിസ്ഥാന് സ്വദേശികളും സെലിബ്രിറ്റികളും ആയതിനാല് തന്നെ ഇരുവരുടേയും വിവാഹം ഏറെ ശ്രദ്ധയാകര്ഷിച്ചിരുന്നു. പാകിസ്ഥാന് മുന് വാര്ത്താവിതരണ മന്ത്രി കൂടിയായ ഫിര്ദൗസും ഹൈദരാബാദില് നടന്ന ദമ്പതികളുടെ ആഡംബര വിവാഹത്തില് പങ്കെടുത്തിരുന്നു. എന്നാല് അന്ന് തന്നെ തനിക്ക് ഈ വിവാഹ ബന്ധം അധികകാലം മുന്നോട്ട് പോകില്ലെന്ന് തോന്നിയിരുന്നു എന്നാണ് ഫിര്ദൗസ് പറയുന്നത്. ‘‘ആ ദിവസം തന്നെ താന് ഷൊയ്ബിന്റെ ചെവിയില് മകനേ, നീ കുടുങ്ങിപ്പോയി എന്ന് മന്ത്രിച്ചിരുന്നു. റിസപ്ഷന്റെ സാഹചര്യമാണ് എന്റെ ഉള്ളില് അത്തരം ഒരു ചിന്ത ഉടലെടുക്കാന് കാരണമായത്. ഇരുവരുടേതും പ്രണയ വിവാഹമായിരുന്നു. മറ്റ് പ്രശ്നങ്ങള് ഒഴിവാക്കാന് പാകിസ്ഥാനിലോ ഇന്ത്യയിലോ ജീവിക്കാതെ ദുബായില് ജീവിക്കാനാണ് സാനിയ മിര്സയും ഷൊയ്ബ് മാലിക്കും തീരുമാനിച്ചത്. എന്നാല് ഇതൊന്നും അവരുടെ ദാമ്പത്യത്തെ സഹായിച്ചില്ല. തങ്ങളുടെ മകന് ഇസാന് മിര്സ മാലിക്കിനൊപ്പം താമസിക്കുന്ന ദുബായിലെ അവരുടെ ജീവിതം ദാമ്പത്യത്തിന് ഗുണകരമായ സംഭാവന ചെയ്തിട്ടില്ല...’’ ഫിര്ദൗസ് പറയുന്നു. സാനിയയും മാലിക്കും വിവാഹത്തോട് അനുബന്ധിച്ച് സിയാല്കോട്ടില് നടത്തിയ റിസപ്ഷനില് അതിഥിയായി എത്തിയ ഫിര്ദൗസ് ആഷിഖ് അവാന് സാനിയ മിര്സയ്ക്ക് സ്വര്ണ്ണകിരീടം സമ്മാനിച്ചിരുന്നു.
2018 ല് ആണ് സാനിയ മിര്സയ്ക്കും ഷൊയ്ബ് മാലിക്കിനും ഇഹ്സാന് മിര്സ മാലിക്ക് എന്ന ആണ്കുഞ്ഞ് പിറന്നത്. ഇഹ്സാന്റെ നാലാം പിറന്നാളിന് ഇരുവരും ഒരുമിച്ച് എത്താത്തതാണ് ഇവരുടെ പ്രശ്നങ്ങള് പുറത്തറിയാനുള്ള കാരണം. പിന്നീട് സാനിയയും മാലിക്കും ഒരു ചാനല് പരിപാടിയുടെ ഭാഗമായല്ലാതെ ഒന്നിച്ച് ഒരു വേദിയില് എത്തിയിട്ടില്ല. ഇരുവരും മകന്റെ ചിത്രം സോഷ്യല് മീഡിയയില് പങ്കുവയ്ക്കുമെങ്കിലും ഒരുമിച്ചുള്ള ചിത്രങ്ങള് കാണാറില്ല. അടുത്തിടെ ഷൊയ്ബ് മാലിക്ക് തന്റെ സോഷ്യല് മീഡിയ പ്രൊഫൈലില് നിന്ന് ഹസ്ബന്ഡ് ടു എ സൂപ്പര് വുമണ് സാനിയ മിര്സ എന്നത് നീക്കം ചെയ്തിരുന്നു.
