തെന്നിന്ത്യയില് മാത്രമല്ല ബോളിവുഡിലും തന്റെ സാന്നിധ്യം കൊണ്ട് പ്രേക്ഷകമനസ്സ് കീഴടക്കിയ ഇന്ത്യന് താരമാണ് ശോഭന. മലയാളത്തിന്റേത് എന്നല്ല ഇന്ത്യന് സിനിമയുടെ തന്നെ സ്വകാര്യ അഹങ്കാരമായ ശോഭനയ്ക്ക് ഏത് ഭാഷയില് ആണെങ്കിലും ഏത് കഥാപാത്രമാണെങ്കിലും അതിനനുസരിച്ച് മാറാന് കഴിയും. അഭിനയത്തില് മാത്രമല്ല സൗന്ദര്യത്തിലും നൃത്തത്തിലുമെല്ലാം തന്റെ പ്രാവീണ്യം തെളിയിച്ചിട്ടുണ്ട് താരം. മലയാളികളുടെ നായിക സങ്കല്പ്പങ്ങളില് ഈ താരത്തിനുള്ള സ്ഥാനം ചെറുതൊന്നുമല്ല. ശോഭനയെ പോലെ മറ്റൊരു നടി ഉണ്ടോയെന്ന് ചോദിച്ചാല് ഇല്ല എന്നു തന്നെയാകും പ്രേക്ഷകരുടെ മറുപടി. ഇന്നത്തെ യുവനടിമാരില് പലര്ക്കും കഴിയാത്തതാണ് പതിനാലാം വയസില് ഏപ്രില് പതിനെട്ട് എന്ന സിനിമയില് ശോഭന പ്രേക്ഷകരെ വിസ്മയിപ്പിച്ച ആ ഭാര്യവേഷം. റച്ച് വര്ഷങ്ങളായി ശോഭന അഭിനയത്തില് സജീവമായി ഇല്ലെങ്കിലും സോഷ്യല്മീഡിയയില് ആക്ടീവാണ്. തന്റെ ശിഷ്യരുമൊത്തുള്ള നൃത്ത പരിശീലന വീഡിയോകളാണ് സോഷ്യല്മീഡിയ പേജില് ശോഭന ഏറെയും പങ്കുവെക്കുന്നത്. ഫോട്ടോ ഷൂട്ട് ചിത്രങ്ങളും പ്രോഗ്രാമുകളുടെ വിശേഷങ്ങളും എല്ലാം പങ്കുവെയ്ക്കാറുള്ള താരം സ്വകാര്യ ജീവിതം സോഷ്യല്മീഡിയ വഴി പരസ്യപ്പെടുത്താറില്ല. അതുകൊണ്ടു തന്നെ മറ്റ് സെലിബ്രിറ്റികള് നേരിടുന്ന തരത്തിലുള്ള നെഗറ്റീവുകളോ സ്വകാര്യ ജീവിതത്തെ കീറിമുറിച്ചുള്ള ചോദ്യങ്ങളോ ശോഭനയ്ക്ക് കേള്ക്കേണ്ടി വരാറില്ല. ഇപ്പോഴിതാ തനിക്ക് സോഷ്യല്മീഡിയയില് നെഗറ്റീവ് കമന്റുകള് വരുന്നത് ഏത് വിഷയത്തിന്റെ പേരിലാണെന്നതിനെ കുറിച്ച് ശോഭന പറഞ്ഞ കാര്യങ്ങളാണ് വൈറലാകുന്നത്. നെഗറ്റീവ് കമന്റുകള് കുറവാണെന്നും വരുന്നതില് ഏറെയും പ്രായം തോന്നുന്നു എന്ന തരത്തിലുള്ളതാണെന്നും ശോഭന പറയുന്നു.
‘‘കമന്റുകള് വായിക്കാറില്ലെന്ന് കരുതേണ്ട. എല്ലാ കമന്റുകളും വായിക്കുന്ന കൂട്ടത്തിലാണ് ഞാന്. നെഗറ്റീവ് വരാറില്ല. അതറിയാന് ഞാന് കമന്റുകള് വായിക്കാറുണ്ടോ എന്ന് ചിലര് ചോദിക്കും. അതെ ഞാന് എല്ലാ കമന്റുകളും വായിക്കാറുണ്ട്. അതുകൊണ്ട് തന്നെ കൃത്യമായി പറയാനും സാധിക്കും. എന്നെ കുറിച്ച് വരുന്ന നെഗറ്റീവ് കമന്റുകള് പ്രായം തോന്നുന്നു, പ്രായമായല്ലോ എന്നൊക്കെയാണ്. അത് കാണുമ്പോള് പ്രത്യേകിച്ചൊന്നും തോന്നാറില്ല. ഒന്നുമല്ലെങ്കിലും പ്രായമാവുന്നതില് ഞാന് അനുഗ്രഹീതയാണല്ലോ...’’ ശോഭന പറയുന്നു.
ഒരു അവാര്ഡ് ഷോയില് പങ്കെടുക്കാൻ എത്തിയപ്പോഴാണ് താരം സോഷ്യല്മീഡിയ നെഗറ്റീവ് കമന്റുകളെ കുറിച്ച് പ്രതികരിച്ചത്. വിവാഹിതയല്ലാത്ത ശോഭനയ്ക്ക് അനന്ത നാരായണി എന്നൊരു ദത്തുപുത്രിയാണുള്ളത്. മകളുടെ സ്വകാര്യതയ്ക്ക് പ്രാധാന്യം കൊടുക്കുന്ന ശോഭന കുഞ്ഞിന്റെ ചിത്രങ്ങള് പങ്കിടാറില്ല.
അടുത്തിതെ തന്റെ ഫാഷന് സങ്കല്പത്തെ കുറിച്ച് ഒരു റിയാലിറ്റി ഷോയില് ശോഭന സംസാരിച്ച വീഡിയോയും വൈറലായിരുന്നു. ഫാഷന് എന്ന് പറയുന്നത് സൗന്ദര്യം മാത്രമല്ലെന്നും ഒരാളുടെ സ്വഭാവം കൂടിയാണെന്നുമാണ് വൈറല് വീഡിയോയില് ശോഭന പറഞ്ഞത്. ‘‘നമ്മള് ഫാഷന് മാഗസിന് നോക്കും. ബ്ലൗസിന്റെ ഡിസൈന് നോക്കും. പക്ഷെ എന്നെ സംബന്ധിച്ച് നമ്മള് എന്തിലാണ് കംഫര്ട്ടബിള് അതാണ് ഫാഷന്. എന്റെ ഈ സാരി നല്ലതാണ്. ഞാന് ധരിച്ചിരിക്കുന്ന ഈ ചെരുപ്പിന്റെ വില 250 രൂപയാണ്. ഈ ഫാഷനിലാണ് ഞാന് കംഫര്ട്ടബ്ള്...’’ എന്നാണ് ശോഭന പറഞ്ഞത്. നിലപാടിന്റെ കാര്യത്തില് അന്നും ഇന്നും നേരെ വാ നേരെ പോ രീതിയാണ് ശോഭനയ്ക്ക്. തിര, വരനെ ആവശ്യമുണ്ട് എന്നീ സിനിമകളിലാണ് ഏറ്റവും ഒടുവില് പ്രേക്ഷകര് ശോഭനയെ കണ്ടത്. രജിനികാന്ത് മുതല് മോഹൻലാലും മമ്മൂട്ടിയും വരെ ശോഭനയുടെ ജോഡികളായിട്ടുണ്ട്. അത്രയേറെ മനോഹരമായ നിരവധി കഥാപാത്രങ്ങള് ശോഭനയുടെ അഭിനയ മികവില് പിറന്നതുകൊണ്ടാണ് ഇന്നും ശോഭനയുടെ സിനിമകള്ക്ക് വേണ്ടി ആളുകള് കാത്തിരിക്കുന്നത്.
