കൊളാര്: രണ്ടു മാസത്തിനിടയില് കര്ണാടകയില് നിന്നും വീണ്ടും ദുരഭിമാനകൊലയുടെ റിപ്പോര്ട്ടുകള്. ദളിത് യുവാവുമായി പ്രണയത്തിലായതിന് 19 കാരിയെ ഓട്ടോക്കാരനായ പിതാവ് കൊലപ്പെടുത്തി. കോളാര് താലൂക്കിലെ തോട്ടി ഗ്രാമത്തില് വെള്ളിയാഴ്ച പുലര്ച്ചെയായിരുന്നു സംഭവം. തൊട്ടടുത്ത ഗ്രാമത്തില് താമസിക്കുന്ന ഒരു മെക്കാനിക്കാണ് പെണ്കുട്ടിയുടെ കാമുകന്.
പെണ്കുട്ടിയെ കൊലപ്പെടുത്തിയ ശേഷം മൃതദേഹം കുഴിച്ചുമൂടുകയും ചെയ്തു. വിവരം പോലീസിലോ തൊട്ടടുത്തുള്ള ഗ്രാമത്തിലെ തങ്ങളുടെ ബന്ധുക്കള് പോലും അറിയാതെ കുടുംബം കാത്തുസൂക്ഷിച്ചെങ്കിലും സുഗാതുര് ഔട്ട്പോസ്റ്റിലെ ഒരു പോലീസ് കോണ്സ്റ്റബളിന് വിവരം കിട്ടുകയും അയാള് കോളാറിലെ പോലീസ് സൂപ്രണ്ട് എം. നാരായണയെ അറിയിക്കുകയുമായിരുന്നു.
വിവരം കിട്ടിയ എസ്.പി. ഉടന് കോളാറിലെ ലോക്കല് പോലീസിനെ വിവരം അറിയിക്കുകയും പോലീസ് അന്വേഷണം ആരംഭിക്കുകയുമായിരുന്നു. പോലീസ് ടീം എത്തിയപ്പോള് തന്നെ പിതാവ് വെങ്കിടേഷ് ഗൗഡ കുറ്റം സമ്മതിച്ചു. വെങ്കിടേഷിന് പുറമേ സഹോദരങ്ങളായ മോഹന്, ചൗഡേ ഗൗഡ എന്നിവരും അറസ്റ്റിലായിട്ടുണ്ട്. വെങ്കിടേഷിന്റെ മകള് രമ്യ ആലേരിയില് നിന്നുള്ള ദളിത് യുവാവുമായിട്ടാണ് പ്രണയത്തിലായത്.
ബന്ധം അവസാനിപ്പിക്കാന് പിതാവ് അനേകം തവണ മകളോട് പറയുകയും ചെയ്തിരുന്നു. എന്നാല് മകള് ബന്ധത്തില് നിന്നും പിന്മാറാന് ഒരുക്കുമായിരുന്നില്ല. വീടിന് സമീപത്തെ ഒരു ഫാക്ടറിയില് ആയിരുന്നു പെണ്കുട്ടി ജോലി ചെയ്തിരുന്നത്. ഒരു സ്വകാര്യ കമ്പനിയിലെ മെക്കാനിക്കാണ് പയ്യന്. ഒരു മാസം മുമ്പാണ് ഇരുവരുടേയും പ്രണയവിവരം പെണ്ണിന്റെ വീട്ടുകാര് അറിഞ്ഞത്. ബന്ധം വേണ്ടെന്ന് പറഞ്ഞപ്പോള് താന് എന്തുവന്നാലും ദളിത് യുവാവിനൊപ്പം പോകുമെന്നായിരുന്നു പെണ്കുട്ടി പറഞ്ഞത്.
പ്രതിയുടെ വെളിപ്പെടുത്തലിന്റെ അടിസ്ഥാനത്തില് മൃതദേഹം പുറത്തെടുക്കുകയും താലൂക്ക് മജിസ്ട്രേറ്റിന്റെ സാന്നിദ്ധ്യത്തില് ഞായറാഴ്ച രാവിലെ പോസ്റ്റുമാര്ട്ടത്തിന് വിധേയമാക്കുകയും ചെയ്തു. കൊലപാതകം, തെളിവ് നശിപ്പിക്കല് എന്നിങ്ങനെ പലതരം കുറ്റം ചുമത്തിയിട്ടുണ്ട്. ഇതേ ഗ്രാമത്തില് തന്നെയുള്ള ദളിത് യുവാവുമായി പ്രണയത്തിലായതിന്റെ പേരില് ബാംഗര്പേട്ട് താലൂക്കിലെ ബോഡാഗുര്ക്കി ഗ്രാമത്തിലെ 20 കാരിയെ പിതാവ് കൊലപ്പെടുത്തിയത് ജൂണ് 27 നായിരുന്നു.
