കുട്ടികളെ സംബന്ധിച്ച് ജീവിതത്തിലെ ഏറ്റവും സുപ്രധാന നിമിഷമാണ് തങ്ങളുടെ പിറന്നാള് ദിനങ്ങള്. കാരണം അന്നേ ദിവസം തങ്ങളുടെ പ്രിയപ്പെട്ടവരുടെ പക്കല് നിന്ന് എന്തെങ്കിലും മനോഹരമായ സമ്മാനങ്ങള് അവര് ഏറെ പ്രതീക്ഷിക്കാറുണ്ട്. സാധാരണയായി കുട്ടികള്ക്ക് ഏറ്റവും ഇഷ്ടമുള്ളതും വിലപ്പിപ്പുള്ളതുമായ വസ്തുക്കളാണ് മാതാപിതാക്കളാണ് നല്കാറുള്ളത്. എന്നാല് ഇതില് നിന്നെല്ലാം വ്യത്യസ്തമായി ഇവിടെ ഒരു പെണ്കുട്ടിക്ക് ഒരു സമ്മാനം ലഭിച്ചു. ഇത് പ്രിയപ്പെട്ടവരാരും അവള്ക്കുവേണ്ടി നല്കിയതല്ല. മറിച്ച് അവള് തന്നെ കണ്ടെത്തിയ ഒന്നാണ്. എന്താണന്നല്ലേ? കോടികള് വിലമതിക്കുന്ന ഒരു വജ്രമാണ് അത്.
ലോകത്തെ ഒരു കുഞ്ഞിനെയും ഇതുവരെ തേടിയെത്താത്ത സമ്മാനമാണ് ഈ പെണ്കുട്ടിയെ തേടിയെത്തിത്. യുഎസ്സിലാണ് ഈ വിചിത്ര സംഭവം നടന്നത്. ആസ്പെണ് ബ്രൗണ് എന്ന ഏഴ് വയസ്സുകാരി അര്ക്കന്സാസിലെ മര്ഫ്രീസ്ബോറോയിലെ ക്രേറ്റര് ഓഫ് ഡയമണ്ട്സ് സ്റ്റേറ്റ് പാര്ക്കില് പിറന്നാള് ആഘോഷിക്കുകയായിരുന്നു. ആ സമയത്താണ് 2.95 കാരറ്റുള്ള ഗോള്ഡന് ബ്രൗണ് ഡയമണ്ട് അവള് കണ്ടെത്തിയത്. പാര്ക്കില് നിന്നുള്ള ഔദ്യോഗിക അറിയിപ്പ് അനുസരിച്ച്, ഈ വര്ഷം പാര്ക്കില് അതിഥിയായി എത്തിയ ആള്ക്ക് കിട്ടുന്ന രണ്ടാമത്തെ വലിയ വജ്രമാണ് ഇത്. മാര്ച്ചില് കണ്ടെത്തിയ 3.29 കാരറ്റ് ബ്രൗണ് ഡയമണ്ട് മാത്രമാണ് ഇതിനേക്കാള് വലുതായി രേഖപ്പെടുത്തിയിട്ടുള്ളത്. പാര്ക്ക് പത്രക്കുറിപ്പില് പറയുന്നത്, ബ്രൗണ് അവളുടെ അച്ഛനും മുത്തശ്ശിക്കും ഒപ്പം പിറന്നാള് ആഘോഷിക്കുന്നതിന് വേണ്ടി പാര്ക്കില് എത്തി. തിരച്ചിലില് പ്രദേശത്തിന്റെ വടക്കുകിഴക്ക് ഭാഗത്തുള്ള ഒരു സ്ഥലത്ത് നിന്ന് അവള് ഒരു പയറിന്റെ വലിപ്പത്തിലുള്ള ഒരു വജ്രം കണ്ടെടുക്കുകയായിരുന്നു എന്നാണ്.
പെണ്കുട്ടി കണ്ടെടുത്തത് വജ്രം തന്നെയാണ് എന്ന് പാര്ക്ക് സ്ഥിരീകരിച്ചിട്ടുണ്ട്. സമീപ വര്ഷങ്ങളിലായി തങ്ങള് കണ്ടതില് വച്ച് ഏറ്റവും മനോഹരമായ പൂര്ണതയുള്ള വജ്രമാണ് ഇത് എന്ന് പാര്ക്കിന്റെ അസിസ്റ്റന്റ് സൂപ്രണ്ട് വെയ്മണ് കോക്സ് പറഞ്ഞു. ദിവസവും ഒന്നോ രണ്ടോ അതിഥികള് എങ്കിലും ഇവിടെ വജ്രം കണ്ടെത്താറുണ്ട് എന്ന് പാര്ക്ക് അധികൃതര് പറയുന്നു. ആദ്യമായി ഒരു കര്ഷകനാണ് ഇവിടെ വജ്രങ്ങള് കണ്ടെത്തുന്നത്. ഇതുവരെയായി 75,000 വജ്രങ്ങളെങ്കിലും കണ്ടെത്തി കഴിഞ്ഞു എന്നും പാര്ക്ക് അധികൃതര് പറഞ്ഞു. ഏതായാലും ഈ സംഭവം അറിഞ്ഞ് പലരും ഞെട്ടിയിരിക്കുകയാണ്. ഇനി ഇപ്പോള് പാര്ക്ക് സന്ദര്ശിക്കാന് നിരവധി ആളുകള് എത്തിച്ചേരുമെന്ന കാര്യത്തില് തര്ക്കമില്ല.
