സിനിമ ചിലര്ക്കൊക്കെ സന്തോഷം നല്കാറുണ്ടെങ്കിലും ഈ മേഖലയിലെത്തി കണ്ണീരുമായി മടങ്ങിയ നിരവധി പേരുണ്ട്. അവരൊക്കെ പലപ്പോഴും ചില പ്രശ്നങ്ങളെ അഭിമുഖീകരിക്കേണ്ടി വരുമ്പോഴാണ് അതുവരെ കണ്ട സിനിമാസ്വപ്നം വേണ്ടെന്നു വയ്ക്കുന്നത്. ഇപ്പോഴിതാ സംവിധാനം തൽക്കാലത്തേക്ക് അവസാനിപ്പിക്കുകയാണെന്ന് എന്ന് സംവിധായകൻ സഞ്ജിത്ത് ചന്ദ്രസേനന് കുറിച്ചിരിക്കുകയാണ്. സോഷ്യൽ മീഡിയയിൽ പങ്കുവച്ച കുറിപ്പിലാണ് സഞ്ജിത്തിന്റെ പ്രതികരണം. സണ്ണി വെയ്ന്, ധ്യാന് ശ്രീനിവാസന് എന്നിവരെ പ്രധാന കഥാപാത്രങ്ങളാക്കി ഒരുക്കിയ ത്രയം, ശ്രീനാഥ് ഭാസി നായകനായ നമുക്ക് കോടതിയില് കാണാം എന്നീ ചിത്രങ്ങളുടെ സംവിധായകനാണ് സഞ്ജിത്ത്. രണ്ട് ചിത്രങ്ങളും ഇനിയും തിയറ്ററുകളില് എത്തിയിട്ടില്ല. എന്തുകൊണ്ട് ഇവ റിലീസ് ചെയ്യപ്പെടുന്നില്ലെന്ന ചോദ്യം താന് നിരന്തരം അഭിമുഖീകരിക്കുന്നുണ്ടെന്നും ഇവ അടുത്ത് തന്നെ റിലീസ് ചെയ്യപ്പെടുമെന്നും സഞ്ജിത്ത് പറയുന്നുണ്ട്.
‘‘കഴിഞ്ഞ ഒരു വര്ഷമായി സിനിമ ചെയ്യാത്തത് എന്തുകൊണ്ട്, ചെയ്ത രണ്ട് സിനിമകള് ഇറങ്ങാത്തത് എന്തുകൊണ്ട് എന്ന ചോദ്യങ്ങള്.. രണ്ട് സിനിമയും കഴിഞ്ഞ് ഇരിക്കുകയാണ്. പ്രശ്നം എന്തുമാവട്ടെ അതൊക്കെ എന്റെ പ്രശ്നങ്ങള് ആയി കണ്ട് ഞാന് സിനിമ തല്ക്കാലത്തേക്ക് നിര്ത്തുകയാണ്. ഞാന് സിനിമയില് വന്നത് വളരെ കഷ്ടപ്പെട്ടാണ്. എന്റെ ആരും തന്നെ സിനിമയില് ഇല്ല. എന്നിട്ടും വളരെ കഷ്ടപ്പെട്ട് ഞാന് എത്തി. ആ യാത്ര അത്ര എളുപ്പമായിരുന്നില്ല.
ഇവിടെവരെയെത്തി തോറ്റ് തിരിച്ചുപോകുന്നത് ശരിയല്ലെന്ന് അറിയാം. പക്ഷേ ഈ മനസിന്റെ ഭാരം ഭയങ്കരമാണ്. പറ്റുന്നില്ല. ജീവിതത്തില് ഒരിക്കല് തോറ്റു എന്ന് തോന്നിയപ്പോള് ജീവിക്കണമെന്ന് തോന്നിയത് സിനിമയില് വന്നപ്പോഴാണ്. ഇനി എന്ത്, എന്തിന് എന്ന ഒരു ചോദ്യം മാത്രം ബാക്കി. ഈ സിനിമകള് അടുത്ത് തന്നെ റിലീസ് ആവും....’’ സഞ്ജിത്ത് കുറിക്കുന്നു.
2022 ഓഗസ്റ്റില് തിയറ്ററുകളിലെത്തുമെന്ന് അറിയിച്ചിരുന്ന ചിത്രമാണ് ത്രയം. മൂന്ന് ഷെഡ്യൂളുകളില് ചിത്രീകരണം പൂര്ത്തിയായ ‘നമുക്ക് കോടതിയില് കാണാം’ എന്ന ചിത്രത്തിന്റെ പാക്കപ്പ് സെപ്റ്റംബര് 25 ന് ആയിരുന്നു. അജിത് വിനായക ഫിലിംസിന്റെ ബാനറില് വിനായക അജിത് ആയിരുന്നു ത്രയത്തിന്റെ നിര്മാണം. ‘നമുക്ക് കോടതിയില് കാണാം’ ചിത്രത്തിന്റെ കഥ, തിരക്കഥ, സംഭാഷണം ആഷിക്ക് അക്ബര് അലിയാണ്. എംജിസി പ്രൈവറ്റ് ലിമിറ്റഡും ഹസീബ്സ് ഫിലിംസും ചേർന്നൊരുക്കുന്നതാണ് ഈ ചിത്രം.
