തമിഴകത്താണ് തിളങ്ങുന്നതെങ്കിലും മലയാളത്തിലൂടെ സിനിമാമേഖലയില് അരങ്ങേറ്റം കുറിച്ച താരമാണ് വിക്രം. ചിയാന് വിക്രം അഭിനയിച്ച എല്ലാ മലയാള സിനിമകളും പ്രേക്ഷകര് ഇന്നും ഓര്ത്തുവയ്ക്കുന്നതാണ്. ഇപ്പോഴിതാ ചിയാന് വിക്രത്തിന്റെ ആരാധകര്ക്ക് ഒരു സന്തോഷ വാര്ത്ത പങ്കിട്ടിരിക്കുകയാണ് സംവിധായന് ആര്.എസ്.വിമല്. വിക്രം നായകനാകുന്ന ‘സൂര്യപുത്ര മഹാവീര് കര്ണ’ ചിത്രത്തിന്റെ ചിത്രീകരണം ഉടന് ആരംഭിക്കുമെന്ന് വിമല് തന്നെയാണ് ഫെയ്സ് ബുക്ക് പോസ്റ്റിലൂടെ പങ്കിട്ടത്. കര്ണനിലൂടെ മഹാഭാരത കഥ അവതരിപ്പിക്കുന്നതാണ് ചിത്രത്തിന്റെ പ്രമേയം. ‘സൂര്യപുത്രന് കര്ണന് റോളിങ് സൂണ്’ എന്ന ക്യാപ്ഷനും നല്കി വിക്രത്തിന്റെ ചിത്രത്തോടൊപ്പം സംവിധായകന് വിമല് പങ്കിട്ടു.
പൃഥ്വിരാജിനെ നായകനാക്കി 2018ല് പ്രഖ്യാപിച്ച ചിത്രമാണ് കര്ണന്. പിന്നീട് വിക്രത്തെ നായകനാക്കി മലയാളത്തിലും തമിഴിലും ഹിന്ദിയിലും കര്ണന് ഒരുക്കുമെന്ന് പ്രഖ്യാപിക്കുകയായിരുന്നു വിമല്. സിനിമയുടെ ഏതാനും ഭാഗങ്ങള് കുറച്ചു നാള് മുന്പ് ചിത്രീകരിച്ചിരുന്നു. പിന്നീട് കോവിഡും ലോക്ഡൗണുമായതോടെ ചിത്രീകരണം മുടങ്ങിയിരുന്നു. പിന്നാലെ കര്ണനില് നിന്ന് വിക്രം പിന്മാറിയെന്ന വാര്ത്തകളും പുറത്തുവന്നിരുന്നു.
