അന്താരാഷ്ട്ര വിപണിയില് ഏറെ ആരാധകരുള്ള റോള്സ്് റോയ്സ് കാറുകള്ക്ക് ഇന്ത്യയില് വില തുടങ്ങുന്നത് തന്നെ അഞ്ചുകോടി രൂപയിലാണ്. സെലിബ്രിട്ടികളും വമ്പന് പണക്കാരും ഉള്പ്പെടെ ഇന്ത്യയില് തന്നെ അപൂര്വ്വം വ്യക്തികള്ക്കാണ് ഇത് സ്വന്തമായിട്ടുള്ളതും. എന്നാല് ഇവരില് ഒന്നിലും പെടാത്ത ഒരു കൗമാരക്കാരന് റോള്സ് റോയ്സ് കാര് നാട്ടിന്പുറത്തുകൂടി ഓടിച്ച് ഇന്ത്യയെ തന്നെ ഞെട്ടിച്ചിരിക്കുകയാണ്.
കേരളത്തില് കൗമാരം പിന്നിടാത്ത ഓട്ടോമൊബൈല് പ്രേമി 18 കാരനായ ഹദീഫ് സ്വന്തം പ്രയത്നത്തിന്റെ ഫലമായി റോള്സ് റോയ്സിന്റെ മിനിയേച്ചര് ഉണ്ടാക്കി യൂട്യൂബില് ആള്ക്കാരെ അമ്പരപ്പിച്ചിരിക്കുകയാണ്. 'ട്രിക്സ് ട്യൂബ്' എന്ന യൂട്യൂബ് ചാനലിലൂടെ ഹദീഫിന്റെ കാറിന്റെ കഥയ്ക്ക് ഇതുവരെ കിട്ടിയിരിക്കുന്നത് 300,000-ത്തിലധികം കാഴ്ചക്കാരെയാണ്. മാരുതി 800 കാറിനെയാണ് റോള്സ് റോയ്സാക്കി മാറ്റിയത്. ഉപയോഗിച്ച് ഉപേക്ഷിച്ച കാറുകളില് നിന്നും മെറ്റല് ഷീറ്റും ഘടകങ്ങളും എടുത്ത് വെല്ഡിംഗ് ടെക്നിക്കുകള് അടക്കമുള്ള ജോലികള് ചെയ്തു.
പരിഷ്ക്കരണ പ്രക്രിയയില് ഇയാള്ക്ക് മൊത്തം ചെലവായതാകട്ടെ 45,000 രൂപയും. മാസങ്ങളോളം സൂക്ഷ്മമായ പ്രവര്ത്തനത്തിലൂടെ പുതിയ ബോഡി കിറ്റ് ഉപയോഗിച്ച് മാരുതി 800-ന്റെ ഡിസൈന് പൂര്ണ്ണമായും പരിഷ്കരിക്കുകയായിരുന്നു. കാറിന്റെ ഇന്റീരിയറുകളിലും മുന്വശത്തും അദ്ദേഹം കാര്യമായ മാറ്റങ്ങള് വരുത്തി, യഥാര്ത്ഥ പാനലിന് പകരം ബോള്ഡ്, കൂടുതല് കരുത്തുറ്റ രൂപകല്പ്പനയുള്ള പുതിയ ഒന്ന് നല്കി. ഗ്രില്ലും ഹെഡ്ലൈറ്റുകളും ഐക്കണിക് റോള്സ് റോയ്സ് ശൈലിയില് നിന്ന് പ്രചോദനം ഉള്ക്കൊണ്ട് നിര്മ്മിച്ചെടുത്തു.
കാറുകളോട് അടങ്ങാത്ത അഭിനിവേശമുള്ള ഹദീഫിന് ആഡംബര വാഹനങ്ങളുടെ തനിപ്പകര്പ്പുകള് സൃഷ്ടിക്കുന്നതില് അസാധാരണ മികവുണ്ട്. കഴിവും കാണിക്കുന്നു. തന്റെ റോള്സ് റോയ്സിന് ലോഗോ പോലും ഹദീഫ് തയ്യാറാക്കി. അതേസമയം വാഹന പരിഷ്കരണത്തിലേക്കുള്ള ഹദീഫിന്റെ ആദ്യ സംരംഭമല്ല ഇത്. മുമ്പ് അദ്ദേഹം ഒരു മോട്ടോര് സൈക്കിള് എഞ്ചിന് ഉപയോഗിച്ചു ഒരു ജീപ്പ് നിര്മ്മിച്ചിരുന്നു.
