കൊച്ചി: കരുവന്നൂര് ബാങ്ക് തട്ടിപ്പ് കേസില് സ്വത്തുവിവരങ്ങള് കൈമാറാന് സി പി എം സംസ്ഥാന കമ്മിറ്റിയംഗം എം കെ കണ്ണന് ഇ ഡി അനുവദിച്ച സമയ പരിധി ഇന്ന് അവസാനിക്കും. കരുവന്നൂരിലെ കളളപ്പണ ഇടപാടില് എം കെ കണ്ണന് ഏതെങ്കിലും വിധത്തിലുളള പങ്കുണ്ടോയെന്നാണ് പരിശോധനയുടെ ഭാഗമായിട്ടാണ് കണ്ണനോട് ഇക്കാര്യം ആവശ്യപ്പെട്ടിരിക്കുന്നത്.
രണ്ടുതവണ സ്വത്തുവിവരങ്ങള് സംബന്ധിച്ച കാര്യം അറിയിക്കാന് ആവശ്യപ്പെട്ടെങ്കിലും വഴങ്ങിയിരുന്നില്ല. ആദായ നികുതി രേഖകള്, സ്യയാര്ജിത സ്വത്തുക്കള്, കുടുംബാഗങ്ങളുടെ ആസ്തി വകകള് എന്നിവയെല്ലാം അറിയിക്കാനാണ് നിര്ദേശം. അന്വേഷണത്തോട് സഹകരിച്ചില്ലെങ്കില് ശക്തമായ നടപടികളുണ്ടാകുമെന്നാണ് എന്ഫോഴ്സ്മെന്റ് വൃത്തങ്ങള് പറയുന്നത്.
തൃശൂര് കോ ഓപ്പറേറ്റീവ് ബാങ്ക് പ്രസിഡന്റും കേരളാ ബാങ്ക് വൈസ് പ്രസിഡന്റുമാണ് സി പി എം നേതാവായ എം കെ കണ്ണന്. കണ്ണന് പ്രസിഡന്റായി തുടരുന്ന തൃശൂര് കോ -ഓപ്പറേറ്റീവ് ബാങ്കിലാണ് കരുവന്നൂര് കേസിലെ മുഖ്യപ്രതി സതീഷ് കുമാര് മിക്ക ഇടപാടും നടത്തിയിട്ടുള്ളത്. കോടികളുടെ ഇടപാട് രേഖകള് ഈ ബാങ്കില് കഴിഞ്ഞ ദിവസം നടത്തിയ റെയിഡില് പിടിച്ചെടുത്തിരുന്നു.
കരുവന്നൂരിലെ തട്ടിപ്പില് ബന്ധമുണ്ടെന്ന സംശയത്തിലാണ് കരുവന്നൂര് കള്ളപ്പണയിടപാടുമായി ബന്ധപ്പെട്ട കേസ് അന്വേഷണത്തില് എന്ഫോഴ്സ്മെന്റ് ഡയറക്ട്രറേറ്റ് കണ്ണനേയും നോട്ടമിട്ടത്. ഇതുമായി ബന്ധപ്പെട്ട് വിശദാംശങ്ങള് തേടാന് കണ്ണനെ വിളിച്ചുവരുത്തി ചോദ്യം ചെയ്യുകയുമുണ്ടായി. ഇതിന് പിന്നാലെയാണ് സ്വത്ത് വിവരം ഹാജരാക്കാന് നിര്ദ്ദേശം നല്കിയത്.
