മലയാളസിനിമയുടെ സ്വകാര്യ അഹങ്കാരമായ മോഹന്‍ലാലിനെക്കുറിച്ചുള്ള എന്തു വാര്‍ത്തകളും പ്രേക്ഷകരും ആരാധകരും ഏറ്റെടുക്കാറുണ്ട്. വില്ലന്‍ വേഷം ചെയ്ത് മഞ്ഞില്‍ വിരിഞ്ഞ പൂക്കളിലൂടെ പ്രേക്ഷകരുടെ വെറുപ്പ് സമ്പാദിച്ച താരം പിന്നീട് സിനിമാപ്രേമികളുടെ സ്വന്തം ലാലേട്ടനായി. ആര്‍ക്കും ചെയ്യാന്‍ കഴിയാത്ത ഒരുപാട് മികച്ച കഥാപാത്രങ്ങളും സിനിമകളും പ്രേക്ഷകര്‍ക്കായി താരം സമ്മാനിച്ചിട്ടുണ്ട്. ആര്‍. സുകുമാരന്‍ സംവിധാനം ചെയ്ത ‘പാദമുദ്ര’ എന്ന സിനിമ മോഹന്‍ലാലിന്റെ കരിയറിലെ മികച്ച ചിത്രങ്ങളിലൊന്നാണ്. ഇപ്പോഴിതാ സിനിമ പുറത്തിറങ്ങി വര്‍ഷങ്ങള്‍ പിന്നിടുമ്പോള്‍ ലൊക്കേഷനില്‍ നടന്ന രസകരമായൊരു സംഭവം പറയുകയാണ് സുകുമാരൻ. ഭാവിയില്‍ താൻ സന്യാസി ആകുമെന്ന് മോഹൻലാല്‍ പഞ്ഞുവെന്ന് സുകുമാരൻ പറയുന്നു.‘‘പാദമുദ്ര എന്ന സിനിമയുടെ ഷൂട്ട് ഒരു മൊട്ടക്കുന്നില്‍ ഉണ്ടായിരുന്നു. രാത്രിയില്‍ ആണ് ഷൂട്ട്. നല്ല നിലാവുണ്ട്. മരങ്ങളൊന്നും ഇല്ലാത്ത പ്രദേശമാണ്. ഷൂട്ടിങ്ങിനുള്ള കാര്യങ്ങള്‍ ചെയ്യുന്നതിനിടയില്‍ ലാല്‍ അവിടെ മണ്ണില്‍ തന്നെ കിടന്നു. ലാലേ.. ഭാവിയില്‍ ലാല്‍ ഒരു സന്യാസി ആകുമെന്ന് ഞാൻ അപ്പോള്‍ പറഞ്ഞു. ഇന്ന് പ്രണവ് മോഹൻലാല്‍ ഒരു സന്യാസിയെ പോലെയാണ്. വിവിധ ദേശങ്ങളില്‍ അയാള്‍ സഞ്ചരിച്ചിട്ടുണ്ട്. ലാലും അന്ന് താൻ സന്യാസി ആകുമെന്ന് പറഞ്ഞു. ഞാൻ ചിരിച്ചു. സാര്‍ ചിരിക്കണ്ട, ഭാവിയില്‍ ഞാൻ ഒരു സന്യാസിയാകും എന്ന് വീണ്ടും ലാല്‍ പറഞ്ഞു...’’ സുകുമാരന്‍ ഓര്‍ത്തെടുക്കുന്നു. അതിന് സാധ്യതയുണ്ടോയെന്ന് അവതാരകന്‍ ചോദിക്കുമ്പോള്‍ ,‘‘പ്രായം ഇത്രയേ ആയിട്ടുള്ളുവല്ലോ, അയാള്‍ക്ക് ഇനിയും സന്യാസി ആകാമല്ലോ. അതിന് തടസമൊന്നും ഇല്ലല്ലോ...’’ എന്നാണ് സുകുമാരന്‍ പറയുന്നത്.
Comments