വ്യത്യസ്തതയുണര്ത്തുന്ന ലക്ഷകണക്കിന് വീഡിയോകളാണ് ഓരോ ദിവസവും സമൂഹ മാധ്യമങ്ങളിലൂടെ വൈറലായിക്കൊണ്ടിരിക്കുന്നത്. എന്നാല് ഇതില് ഏറെ ആരാധകരുള്ളത് ഭക്ഷണങ്ങളെ സംബന്ധിക്കുന്ന വീഡിയോകള്ക്കായിരിക്കും. കാരണം വിവിധ സ്ഥലങ്ങളിലെ വിഭവങ്ങള് അറിയാനും ട്രെന്ഡിംഗ ഫുഡ് പരിചയപ്പെടാനും പുതിയ രുചിക്കൂട്ടുകള് പരീക്ഷിക്കാനും എല്ലാവര്ക്കും വളരെ താത്പര്യമാണ്. അതേസമയം ഭക്ഷണം സംബന്ധിച്ച വീഡിയോകള്ക്ക് ഇടയ്ക്ക് വിമര്ശനവും നേരിടാറുണ്ട്. ഇതുപോലൊരു വീഡിയോയിലേക്കാണിനി നിങ്ങളുടെ ശ്രദ്ധ ക്ഷണിക്കുന്നത്. ഒരു സ്ട്രീറ്റ് ഫുഡിനെ സംബന്ധിക്കുന്ന വീഡിയോയാണ് ഇത്.
വീഡിയോയില് ഒരു സ്ട്രീറ്റ് സ്റ്റാളില് ഭീമമായ അളവില് ചിക്കന് വേവിച്ച് മസാലയും മറ്റ് കൂട്ടുമെല്ലാം ചേര്ത്ത് ഒരു സ്പെഷ്യല് ഷവര്മ്മയാണ് തയ്യാറാക്കുന്നത്. 100 കിലോ ചിക്കനാണ് ഇത്തരത്തില് തയ്യാറാക്കിയെടുക്കുന്നതത്രേ. ഇത് വീഡിയോയ്ക്കൊപ്പമുള്ള അടിക്കുറിപ്പിലാണ് സൂചിപ്പിച്ചിട്ടുള്ളത്. മാത്രമല്ല 'ഹൈജീനിക് ഷവര്മ്മ' അഥവാ വൃത്തിയോടെ തയ്യാറാക്കുന്ന ഷവര്മ്മ എന്നും അടിക്കുറിപ്പില് ചേര്ത്തിട്ടുണ്ട്.
എന്നാല് അതേസമയം വീഡിയോ കാണുമ്പോള് ഇത് അത്രമാത്രം വൃത്തിയിലും സൂക്ഷ്മതയിലും അല്ല തയ്യാറാക്കുന്നത് എന്നാണ് അധിക കമന്റുകളിലും ആളുകള് കുറിച്ചിട്ടുള്ളത്. കാണുമ്പോള് കഴിക്കാന് തോന്നുന്നില്ല എന്നും, ഇതാണോ വൃത്തിയുള്ള ഷവര്മ്മ എന്നുമെല്ലാം പലരും വിമര്ശനസ്വരത്തില് കമന്റില് ചോദിക്കുന്നു. ചിലര്ക്കാണെങ്കില് ഇത് ആരോഗ്യകരമായ രീതിയില് അല്ല തയ്യാറാക്കുന്നത് എന്നതാണ് പ്രശ്നം. എന്തായാലും നെഗറ്റീവ് കമന്റുകള് കുറച്ചധികം കിട്ടിയാലും വീഡിയോയ്ക്ക് നല്ല ശ്രദ്ധ കിട്ടിയിട്ടുണ്ട്. അതേസമയം വീഡിയോയിലെ ഷവര്മ്മ കണ്ട് ഇഷ്ടപ്പെട്ടവരുമുണ്ട് കെട്ടോ. പലരും ഈ കടയുടെ വിലാസം ചോദിക്കുന്നുണ്ട്. പോയി കഴിക്കാന് ആഗ്രഹമുണ്ടെന്ന് പ്രകടിപ്പിച്ചവരും ഏറെ.
