മമ്മൂട്ടിയെ കേന്ദ്രകഥാപാത്രമാക്കി റോബി വര്ഗീസ് രാജ് ഒരുക്കിയ കണ്ണൂര് സ്ക്വാഡ് തിയേറ്ററുകളില് എത്തിയിട്ട് മൂന്നാഴ്ച പിന്നിടാന് ഒരുങ്ങുമ്പോള് ആഗോള ബോക്സ് ഓഫീസില് നിന്ന് ചിത്രം എത്ര നേടി എന്ന് അറിയാനുള്ള ആകാംഷയിലാണ് ആരാധകര്. ഇപ്പോഴിതാ നിര്മ്മാതാക്കളായ മമ്മൂട്ടി കമ്പനി കണക്കുകള് ഔദ്യോഗികമായി പുറത്തുവിട്ടിരിക്കുകയാണ്.ചിത്രം മൂന്ന് വാരം പിന്നിടാനൊരുങ്ങുമ്പോള് ആഗോള ബോക്സ് ഓഫീസില് നിന്ന് ഇതുവരെ നേടിയത് 75 കോടി ആണെന്നാണ് നിര്മ്മാതാക്കള് അറിയിക്കുന്നത്.
സെപ്റ്റംബര് 28 നായിരുന്നു ചിത്രം റിലീസ് ചെയ്തത്. തുടക്കത്തില് കുറച്ച് തിയേറ്ററുകളില് മാത്രം റിലീസ് ചെയ്ത കണ്ണൂര് സ്ക്വാഡ് പിന്നീട് തിേയറ്ററുകളുടെയും സ്ക്രീനുകളുടെയും ഷോയുടെയുമൊക്കെ എണ്ണം കൂട്ടുകയായിരുന്നു. റിലീസ് ദിവസം തന്നെ 2.40 കോടി രൂപ കളക്ഷന് നേടിയിരുന്നു ചിത്രം.ഇതോടെ എക്കാലത്തെയും മലയാള സിനിമകളുടെ വിജയ പട്ടികയില് ഏഴാം സ്ഥാനം കൈവരിക്കാന് ചിത്രത്തിനു സാധിച്ചു.
നവാഗതനായ റോബി വര്ഗീസ് രാജ് സംവിധായകനാകുന്ന ആദ്യ ചിത്രമാണിത്. എഎസ്ഐ ജോര്ജ് മാര്ട്ടിനായി മമ്മൂട്ടി എത്തുന്ന ചിത്രം ഇന്വെസ്റ്റിഗേഷന് ത്രില്ലര് വിഭാഗത്തില് പെടുന്ന ഒന്നാണ്. കാസര്ഗോഡ് നടക്കുന്ന ഒരു കുറ്റകൃത്യം നടത്തിയ പ്രതികളെ പിടിക്കാന് ജോര്ജും സംഘവും ഇന്ത്യയൊട്ടാകെ നടത്തുന്ന യാത്രയില് നിന്നാണ് ചിത്രത്തിന്റെ കഥ പറച്ചില് രൂപപ്പെടുത്തിയിരിക്കുന്നത്. മമ്മൂട്ടിയ്ക്കൊപ്പം വിജയരാഘവന്, റോണി ഡേവിഡ്, മനോജ് കെയു, അസീസ് നെടുമങ്ങാട്, ദീപക് തുടങ്ങി നിരവധി പേര് അഭിനയിച്ച ചിത്രത്തിന്റെ തിരക്കഥ ഒരുക്കിയിരിക്കുന്നത് മഹമ്മദ് ഷാഫിയും റോണിയും ചേര്ന്നാണ്.
