മമ്മൂട്ടിയുടെ ഗാനഗന്ധവർവനിലും മോഹൻലാലിന്റെ ദൃശ്യം രണ്ടാം ഭാഗത്തിലും വക്കീലായി വന്ന് പ്രേക്ഷക പ്രശംസ ഏറ്റുവാങ്ങിയ നടിയാണ് യഥാർത്ഥ ജീവിതത്തിലും വക്കീലായ ശാന്തി മായദേവി. ഇപ്പോഴിതാ ലോകേഷ് കനകരാജ്- വിജയ് കൂട്ടുക്കെട്ടിലിറങ്ങിയ ലിയോയിൽ തെന്നിന്ത്യൻ സൂപ്പർ താരം വിജയിയുടെ വക്കീൽ വേഷത്തിൽ തിളങ്ങിയിരിക്കുകയാണ് ശാന്തി മായദേവി.
ജീത്തു ജോസഫ്- മോഹൻലാൽ ചിത്രം റാമിന്റെ ചിത്രീകരണത്തിനിടെ ശാന്തിയ്ക്ക് പരിക്കേറ്റിരുന്നു. അതിന്റെ ശസ്ത്രക്രിയ കഴിഞ്ഞ് വീൽചെയറിൽ റസ്റ്റ് എടുക്കുമ്പോഴാണ് ലിയോ സിനിമയിലേക്ക് വിളി വന്നതെന്ന് ശാന്തി പറയുന്നു.
‘ആ സമയത്ത് എഴുന്നേറ്റ് നിൽക്കാൻ പോലും സാധിക്കുമായിരുന്നില്ല. അത് അവരോട് പറഞ്ഞു. പക്ഷേ ചിത്രത്തിന്റെ ലൊക്കേഷൻ കശ്മീരിലേക്ക് മാറ്റി ചിത്രീകരണം തുടങ്ങാൻ വൈകിയതാണ് എനിക്ക് അനുഗ്രഹമായത്. ഒരു തരത്തിൽ പറഞ്ഞാൽ ആ വിളിയാണ് പരുക്ക് വേഗത്തിൽ ഭേദമാക്കിയത് എന്ന് പറയാം. കശ്മീരിലും പിന്നെ ചെന്നൈയിലുമായിട്ടാണ് എന്റെ ഭാഗങ്ങൾ ചിത്രീകരിച്ചത്. സ്വന്തമായി ഡബ് ചെയ്യാനും സാധിച്ചു.
സത്യത്തിൽ ദളപതിയുടെ വക്കീൽ വേഷം ചെയ്യണമെന്ന് മുൻപ് തന്നെ ആഗ്രഹമുണ്ടായിരുന്നു. സമയമായപ്പോൾ അതങ്ങനെ സംഭവിച്ചു. അമിതാഭ് ബച്ചൻ, രജനീകാന്ത്, സൂര്യ അങ്ങനെ ആഗ്രഹങ്ങളുടെ പട്ടികയിൽ ഇനിയും താരങ്ങളുണ്ട്’ ശാന്തി നല്കിയ അഭിമുഖത്തില് പറഞ്ഞു.
ജീത്തു ജോസഫ്- മോഹൻലാൽ കൂട്ടുക്കെട്ടിലിറങ്ങുന്ന ഏറ്റവും പുതിയ ചിത്രം നേരിന്റെ തിരക്കഥാകൃത്ത് കൂടിയാണ് ശാന്തി മായദേവി.
