ബോക്സ് ഓഫീസില് വന് കുതിപ്പാണ് ലോകേഷ്- വിജയ് കൂട്ടുക്കെട്ടിലിറങ്ങിയ 'ലിയോ' നടത്തികൊണ്ടിരിക്കുന്നത്. ഇന്ത്യന് സിനിമയില് സമീപകാലത്ത് ലഭിച്ച ഏറ്റവും ഉയര്ന്ന ഓപ്പണിംഗ് കളക്ഷന് ആയിരുന്നു ലിയോക്ക് ലഭിച്ചത്. ഷാരൂഖ് ഖാന് ചിത്രങ്ങളായ 'പഠാന്', 'ജവാന്' എന്നീ ചിത്രങ്ങളെ പിന്നിലാക്കിയാണ് ലിയോയുടെ കുതിപ്പ്.
ഇപ്പോഴിതാ നാലുദിവസം കൊണ്ട് 48.5 മില്ല്യണ് ഡോളറാണ് (400 കോടി രൂപ) വേള്ഡ് വൈഡ് കളക്ഷനായി ലിയോ നേടിയത്. ലിയനാര്ഡോ ഡികാപ്രിയോയെ നായകനാക്കി മാര്ട്ടിന് സ്കോര്സസെ സംവിധാനം ചെയ്ത 'കില്ലേഴ്സ് ഓഫ് ദി ഫ്ലവര് മൂണ്' എന്ന ചിത്രത്തിന്റെ കളക്ഷനെയാണ് ലിയോ ആഗോള ബോക്സ്ഓഫീസില് പിന്നിലാക്കിയിരിക്കുന്നത്. അമേരിക്കന് മാഗസിനായ ''വെറൈറ്റി'യാണ് എക്സില് കണക്കുകള് പങ്കുവെച്ചിരിക്കുന്നത്. 44 മില്ല്യണ് ഡോളറാണ് കില്ലേഴ്സ് ഓഫ് ദി ഫ്ലവര് മൂണ് ഇതുവരെ നേടിയത്.
Vijay's 'Leo' Beats Leonardo DiCaprio's 'Killers of the Flower Moon' at Weekend Global Box Office https://t.co/N4cETQQt8Y
— Variety (@Variety) October 23, 2023
ആദ്യ ദിവസം മാത്രം 145 കോടി രൂപയാണ് വേള്ഡ് വൈഡ് കളക്ഷന് ആയി ലിയോ നേടിയത്. ഇത് നിലവിലുള്ള മറ്റെല്ലാ തെന്നിന്ത്യന് സിനിമകളേക്കാളും വളരെയേറെ മുന്നിലാണ്. എല്ലാ തിയേറ്ററുകളിലും ഹൌസ്ഫുള് ഷോകളാണ് നടന്നുകൊണ്ടിരിക്കുന്നത്.
തൃഷ, സഞ്ജയ് ദത്ത്, അര്ജുന് സര്ജ, ഗൗതം മേനോന്, മിഷ്കിന്, മാത്യു തോമസ്, മന്സൂര് അലി ഖാന്, പ്രിയ ആനന്ദ്, സാന്ഡി, ജനനി, അഭിരാമി വെങ്കിടാചലം, ബാബു ആന്റണി എന്നിവരാണ് ചിത്രത്തിലെ മറ്റ് താരങ്ങള്. സെവന് സ്ക്രീന് സ്റ്റുഡിയോ, ദി റൂട്ട് എന്നിവയുടെ ബാനറുകളില് ലളിത് കുമാറും ജഗദീഷ് പളനിസാമിയും ചേര്ന്നാണ് ലിയോ നിര്മിച്ചത്.
