ബോളിവുഡിന് ഏറെയിഷ്ടമുള്ള ക്യൂട്ട് കപ്പിള്സാണ് രണ്വീര് സിംഗും ദീപിക പദുകോണും. വര്ഷങ്ങള് നീണ്ട പ്രണയത്തിനൊടുവില് വിവാഹിതരായവരാണ് ഇരുവരും. വര്ഷങ്ങള് നീണ്ട പ്രണയമായിരുന്നെങ്കിലും ഇരുവരുമത് രഹസ്യമാക്കുകയായിരുന്നു. 2013ലാണ് ഇവരുടെ പ്രണയകഥയുടെ ആരംഭം. ഗോലിയോ കി രാസ്ലീല രാം-ലീല എന്ന ചിത്രത്തിന്റെ ചിത്രീകരണ വേളയിലാണ് ഇരുവരും പ്രണയത്തിലാകുന്നത്. 2018ല് ഇറ്റലിയിലെ ലേക് കോമോയില് നടന്ന സ്വകാര്യ ചടങ്ങിലായിരുന്ന ഇരുവരുടെയും വിവാഹം. രണ്ബീര് കപൂറുമായുള്ള പ്രണയം തകര്ന്നശേഷമാണ് ദീപിക രണ്വീര് സിങുമായി പ്രണയത്തിലായത്. ഇപ്പോഴിതാ രഹസ്യമായി വിവാഹ നിശ്ചയം നടത്തിയെന്ന് തുറന്നു പറഞ്ഞിരിക്കുകയാണ് താരം. പ്രമുഖ സംവിധായകന് കരണ് ജോഹര് അവതാരകനായി എത്തുന്ന കോഫി വിത്ത് കരണിലായിരുന്നു ഇവരത് തുറന്നു പറഞ്ഞത്. പ്രപ്പോസ് ചെയ്ത ഉടൻ തന്നെ ദീപികയുമായുള്ള തന്റെ വിവാഹനിശ്ചയം നടത്തിയിരുന്നുവെന്നാണ് രണ്വീര് സിങ് ഷോയില് വെളിപ്പെടുത്തിയത്. 2015ല് താന് ദീപികയെ പ്രപ്പോസ് ചെയതതിന് പിന്നാലെയാണ് വിവാഹനിശ്ചയം നടത്തിയത് എന്നാണ് രണ്വീര് പറഞ്ഞത്. വിവാഹം കഴിക്കുന്നതിന് മൂന്ന് വര്ഷം മുന്പ് വിവാഹനിശ്ചയം നടത്തിയിരുന്നോ എന്ന് കരണ് ദമ്പതികളോട് ചോദിച്ചു. അതിനുള്ള മറുപടി പറഞ്ഞത് രണ്വീറാണ്. ‘‘2015ല് ഞാന് ദീപികയെ പ്രൊപ്പോസ് ചെയ്തതിനു പിന്നാലെയാണ് വിവാഹനിശ്ചയം നടത്തിയത്. മറ്റാരെങ്കിലും ദീപികയെ പ്രപ്പോസ് ചെയ്യുന്നതിനു മുന്പേ ഞാന് ഇഷ്ടം പറയുകയായിരുന്നു. റിസ്ക് എടുക്കാന് തയാറായിരുന്നില്ല...’’ താരം പറയുന്നു. അഡ്വാൻസ് ബുക്കിങ് എന്നാണ് അന്ന് നടന്ന വിവാഹനിശ്ചയത്തെ ദീപിക വിശേഷിപ്പിച്ചത്.
കരണ് ജോഹര് അവതാരകനാകുന്ന ജനപ്രിയ ടെലിവിഷൻ ഷോയാണ് കോഫി വിത്ത് കരണ്. ഡിസ്നി ഹോട്ട്സ്റ്റാര് എന്ന ഒടിടി പ്ലാറ്റ്ഫോമിലൂടെയാണ് ഈ ചാറ്റ് ഷോ പ്രേക്ഷകരിലേക്ക് എത്തുന്നത്. ഇതിന്റെ എട്ടാമത്തെ സീസണിലാണ് താരദമ്പതിമാര് അതിഥികളായി എത്തുന്നത്. എട്ടാം സീസണിന്റെ ഏറ്റവും പുതിയ പ്രൊമോയിലാണ് ആദ്യം അതിഥികളായി എത്തുന്നത് ബോളിവുഡിലെ ഏറ്റവും കൂടുതല് ആരാധകരുള്ള താരദമ്പതികളായ രണ്വീര് സിങും ദീപിക പദുകോണുമാണെന്ന് കാണിക്കുന്നത്. വിവാഹവുമായി ബന്ധപ്പെട്ടതടക്കമുള്ള ഇതുവരെ വെളിപ്പെടുത്താത്ത ചില കാര്യങ്ങളും ദമ്ബതികള് കോഫി വിത്ത് കരണ് ഷോയില് വെളിപ്പെടുത്തുന്നത് പ്രമോയില് കാണാം.
റോക്കി ഔര് റാണി കി പ്രേം കഹാനിയിലെ രണ്വീറിന്റെ കഥാപാത്രത്തിന്റെ പേരാണ് റോക്കി രണ്ധാവ. ദീപിക എപ്പോഴെങ്കിലും റോക്കി രണ്ധാവയുമായി ഡേറ്റ് ചെയ്യുമോ എന്നും കരണ് ചോദിക്കുന്നുണ്ട്. താൻ റോക്കി രണ്ധാവയെ വിവാഹം കഴിച്ചുവെന്നാണ് ദീപിക പറഞ്ഞ മറുപടി. രണ്വീറിനെ കൂടാതെ വേറെ ആരുമായിട്ടാണ് മികച്ച കെമിസ്ട്രിയുണ്ടെന്ന് കരുതുന്നതെന്ന് കരണ് ചോദിച്ചപ്പോഴും കൃത്യമായ മറുപടി ദീപിക നല്കി. അതിശയകരമായ ഒരു കെമിസ്ട്രി ഹൃത്വിക്കുമായി എനിക്കുണ്ടെന്ന് ഞാൻ കരുതുന്നു. അത് എല്ലാവരും കാണാനിരിക്കുന്നതേയുള്ളു എന്നായിരുന്നു ദീപികയുടെ മറുപടി. ഫൈറ്ററില് ഇരുവരും ഒന്നിച്ചഭിനയിക്കുന്നുണ്ട്.
സ്റ്റാര് വേള്ഡിലൂടെ 2004ലാണ് കോഫി വിത്ത് കരണ് ആദ്യം പ്രദര്ശിപ്പിച്ചത്. ‘‘എന്റെ പ്രിയപ്പെട്ട രണ്വീര് സിങിനും ദീപിക പദുകോണിനുമൊപ്പം കോഫി വിത്ത് കരണിന്റെ പുതിയ സീസണ് കിക്ക്സ്റ്റാര്ട്ട് ചെയ്യുന്നതില് ഞാൻ വളരെ ആവേശത്തിലാണ്...’’ എന്നാണ് കരണ് ജോഹര് പ്രമോ വീഡിയോ പങ്കുവെച്ച് കുറിച്ചത്. ആദ്യമായാണ് കപ്പിളായി ദീപികയും രണ്വീറും കോഫി വിത്ത് കരണിലേക്ക് എത്തുന്നത്. സ്വര്ഗത്തില് വെച്ച് കൂട്ടിച്ചേര്ത്ത ബന്ധമാണ് ദീപികയും രണ്വീറുമെന്നാണ് ആരാധകര് കമന്റിടുന്നത്. ഡിസ്നി പ്ലസ് ഹോട്ട്സ്റ്റാറിലൂടെ ഒക്ടോബര് 26ലാണ് കോഫി വിത്ത് കരണ് പ്രക്ഷേപണം ചെയ്യുക.
