പകരക്കാരനില്ലാത്ത ജനകീയ നേതാവും കേരളരാഷ്ട്രീയത്തിലെ അതികായനുമായ ഇ.കെ. നായനാരെപ്പോലെ കേരള ജനത ഇത്രമാത്രം സ്നേഹിച്ച മറ്റൊരു കമ്മ്യൂണിസ്റ്റ് നേതാവ് ചരിത്രത്തിലുണ്ടോ എന്നു തന്നെ സംശയമാണ്. ഈ വിജയദശമി ദിനത്തില് ഇ.കെ. നായനാരുടെ പേര് വീണ്ടും സോഷ്യല് മീഡിയയില് നിറയുകയാണ്. അതിനു കാരണം ജീവിതത്തില് ആരെയും എഴുത്തിനിരുത്താത്ത ഇ കെ നായനാര് ആദ്യമായി ഒരു മൂന്നു വയസ്സുകാരിയെ ആദ്യാക്ഷരം കുറിപ്പിച്ച വാര്ത്ത വീണ്ടും പങ്കുവച്ചതിലൂടെയാണ്. വിജയദശമി ദിനത്തില് ഇ കെ നായനാരുടെ മടിയിലിരുന്ന ആദ്യക്ഷരം കുറിക്കാന് കഴിഞ്ഞതിന്റെ സന്തോഷം പങ്കുവച്ചത് മറ്റാരുമല്ല അവതാരകയും നടിയുമായ എലീന പടിക്കലാണ്. വര്ഷങ്ങള്ക്ക് മുന്പ് ഒരു വിജയദശമി നാളില് ഇ കെ നായനാര് ആദ്യക്ഷരം കുറിപ്പിക്കുന്നതിന്റെ ഫോട്ടോയും പത്രവാര്ത്തയുമടക്കം താരം ഫേസ്ബുക്കില് സന്തോഷം പങ്കിട്ടു. ‘‘ഓർമയിലെ ആദ്യാക്ഷരം....നായനാര് അപ്പൂപ്പന്റെ മടിയില് ഇരുന്ന് ആദ്യക്ഷരം കുറിക്കാനായത് എന്തൊരു ഭാഗ്യമാണ്. നായനാര് അപ്പൂപ്പനും എന്റെ മാതാപിതാക്കള്ക്കും ശാരദ ടീച്ചര്ക്കും നന്ദി പറയുന്നു. സ്നേഹം നിറഞ്ഞ ഈ വ്യക്തികളില് നിന്നുള്ള അനുഗ്രഹവും പ്രാര്ത്ഥനയും എന്നെ നല്ലൊരു വ്യക്തിയാക്കി മാറ്റാൻ സഹായിച്ചു...’’ എലീന കുറിച്ചു. വഴുതക്കാട് ഈശ്വരവിലാസം റോഡിലെ വാടക വീട്ടില് വച്ചായിരുന്നു ഇ കെ നായനാര് മൂന്നു വയസുകാരിയായ എലീനയെ എഴുത്തിനിരുത്തിയത്.
അവിചാരിതമായിട്ടാണെങ്കിലും സ്നേഹപൂര്ണമായ നിര്ബന്ധത്തിന് വഴങ്ങി നായനാര് ആ കൃത്യം ഏറ്റെടുക്കുകയായിരുന്നുവെന്ന് എലീന പങ്കിട്ട പത്ര വാര്ത്തയിലുണ്ട്. ‘ഞാന് തന്നെ വേണോ’ എന്ന് ചോദിച്ച് നായനാര് ഒഴിഞ്ഞുമാറാന് ശ്രമിച്ചെങ്കിലും ഭാര്യ ശാരദടീച്ചര് കൂടി നിര്ബന്ധിച്ചതോടെ നായനാര് ആ ദൗത്യം ഏറ്റെടുക്കുകയായിരുന്നുവെന്നാണ് അന്നത്തെ വാര്ത്തയിലുള്ളത്.
