ഹിറ്റ് ചിത്രമായ 'അഞ്ചാം പാതിര’ക്ക് ശേഷം മിഥുൻ മാനുവൽ തോമസ് തിരക്കഥയൊരുക്കി അരുൺ വർമ്മ സംവിധാനം ചെയ്യുന്ന സിനിമയാണ് ഗരുഡന്. സുരേഷ് ഗോപി, ബിജുമേനോന്, സിദ്ദിഖ് എന്നിവരടങ്ങുന്ന ഒരു വലിയ ടീം ഈ സിനിമയ്ക്കുള്ളിലുണ്ട് എന്നതു തന്നെയാണ് പ്രേക്ഷകര് ഈ സിനിമയെ ആവേശത്തോടെ കാത്തിരിക്കാനുള്ള കാരണം. സിനിമയുടെ പ്രൊമോഷന്റെ ഭാഗമായി ഈ ടീം പല സ്ഥലത്തും ആരാധകരെ കാണാനെത്തുന്നുണ്ട്. ഇപ്പോഴിതാ ഗരുഡന് ടീം ദുബായില് എത്തിയപ്പോള് സിദ്ദിഖ് പറഞ്ഞ കാര്യങ്ങളാണ് പ്രേക്ഷകര് ഏറ്റെടുത്തിരിക്കുന്നത്. ഒരുപാട് സന്തോഷത്തോടെയും അഭിമാനത്തോടെയും ദുബായിലെ മലയാളികള്ക്ക് മുന്നില് നില്ക്കുന്നതെന്ന് സിദ്ദിഖ് പറയുന്നു. ‘‘ഗരുഡന് എന്ന സിനിമ നവംബര് 3 നാണ് റിലീസ് ചെയ്യുന്നത്. സുരേഷ്ഗോപിയുടെ അതിശക്തമായ ഒരുപാട് കഥാപാത്രങ്ങള് കണ്ടിട്ടുണ്ട്. അതുപോലെ തന്നെ വളരെ വ്യത്യസ്തമായ പുതുമയുള്ള ഒരു കഥാപാത്രമായി ഗരുഡനായി സുരേഷ് ഗോപി പറന്നിറങ്ങുകയാണ്. അതില് ഏതെങ്കിലും മരത്തില് ഞാനുമുണ്ടാകും. മുന്പത്തെ കാലം പോലെയല്ല. മുന്പൊക്കെ ഒരു സിനിമ ഇറങ്ങിക്കഴിഞ്ഞാല് അതിന്റെ പരസ്യം പത്രത്തിലോ ടിവിയിലോ കൊടുത്താല് പ്രേക്ഷകരത് തിയേറ്ററില് വന്നു കണ്ടു കൊള്ളും. ഇന്നിപ്പോള് അങ്ങനെയല്ല. നിങ്ങളുടെ മുന്നിലെത്തി നിങ്ങളോട് സിനിമയെക്കുറിച്ച് പറയണം. സിനിമ നിങ്ങള് കാണണമെന്ന് അഭ്യര്ത്ഥിക്കണം. അങ്ങനെയേ പ്രേക്ഷകരെ തിയേറ്ററില് എത്തിക്കാന് കഴിയൂ. ആദ്യ ദിവസം തിയേറ്ററില് പ്രേക്ഷകരെത്തി സിനിമയ്ക്ക് കൈയടി നല്കുമ്പോഴാണ് സിനിമ വിജയിക്കുന്നത്. അതുകൊണ്ട് നിങ്ങള് ഈ സിനിമ കാണാന് എത്തണമെന്ന് അഭ്യര്ത്ഥിക്കുന്നു...’’ സിദ്ദിഖ് പറയുന്നു. നിറഞ്ഞ കൈയടിയോടെയാണ് സിദ്ദിഖിന്റെ ഓരോ വാക്കുകളും പ്രേക്ഷകര് ഏറ്റെടുത്തത്.
സുരേഷ് ഗോപിയും ബിജു മേനോനും സിദ്ദിഖും ഒന്നിക്കുന്ന ചിത്രം ‘ഗരുഡൻ’ ന്റെ ട്രെയിലർ തന്നെ പ്രേക്ഷകനിൽ ആകാംഷ ഉണർത്തുന്നതാണ്. നീതി നിഷേധിച്ചവന്റെയും നീതി നടപ്പാക്കുന്നവന്റെയും പോരാട്ടങ്ങളാണ് ട്രെയിലറിൽ ഉടനീളമുള്ളത്. പഴയ സുരേഷ് ഗോപി ചിത്രങ്ങളെ ഓർമ്മിപ്പിക്കും വിധം കാക്കി അണിഞ്ഞ് ആക്ഷൻ ഹീറോയെ ചിത്രത്തിലൂടനീളം കാണാമെന്ന പ്രതീക്ഷയും ട്രെയിലർ നൽകുന്നുണ്ട്.
