തിരുവനന്തപുരം: ഇന്നും സംസ്ഥാനത്ത് ഒറ്റപ്പെട്ടയിടങ്ങളില് ശക്തമായ മഴയ്ക്ക് സാധ്യത. ഒരു ജില്ലകളിലും ഇതുവരെ പ്രത്യേക മഴ മുന്നറിയിപ്പ് ഇല്ലെങ്കിലും ഉച്ചയ്ക്ക് ശേഷം മഴ സജീവമായേക്കും. ഇടമിന്നലോട് കൂടിയ മഴയ്ക്കാണ് സാധ്യത. ഒരു ചക്രവാതച്ചുഴി തെക്കന് തമിഴ്നാടിന് മുകളിലായി നിലനില്ക്കുന്നുണ്ട്. അതേ സമയം മറ്റൊരു ചക്രവാതച്ചുഴി തെക്ക് - പടിഞ്ഞാറന് ബംഗാള് ഉള്ക്കടലില് നിലനില്ക്കുന്നുണ്ട്. ആലപ്പുഴ, എറണാകുളം എന്നീ ജില്ലകളിലെ ഒറ്റപ്പെട്ടയിടങ്ങളില് വരും മണിക്കൂറില് 40 കി.മീ വരെ വേഗത്തില് വീശിയടിക്കുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഞായര് തിങ്കള് ദിവസങ്ങളില് ശക്തമായ മഴയ്ക്ക് സാധ്യതയുണ്ടെന്ന് പ്രവചനം.
കേരള തീരത്ത് ഇന്ന് (27-10-2023) രാത്രി 11.30 വരെ 1.2 മുതല് 1.8 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു.
