ടെന്നീസ് താരമായ സാനിയ മിര്സ മകന്റെ പിറന്നാള് ദിനത്തില് ആശംസകള് അറിയിച്ചു കൊണ്ട് പങ്കുവെച്ച മനോഹരമായ കുറിപ്പാണ് ഇപ്പോള് സോഷ്യല് മീഡിയയില് ശ്രദ്ധ നേടുന്നത്. മകനൊപ്പമുളള ചിത്രങ്ങളും സാനിയ കുറിപ്പിനൊപ്പം പങ്കുവെച്ചു. സുഹൃത്തുക്കളും താരങ്ങളുമടക്കം നിരവധി പേര് സാനിയയുടെ മകന് ആശംസകളറിയിച്ചിട്ടുണ്ട്. തങ്ങളുടെ ജീവിതത്തിലെ ഏറ്റവും തിളങ്ങുന്ന നക്ഷത്രത്തിനു സന്തോഷകരമായ ജന്മദിനം എന്നെഴുതി കൊണ്ടാണ് താരത്തിന്റെ കുറിപ്പ് തുടങ്ങുന്നത്.
എനിക്ക് ചുറ്റും എത്രഇരുട്ടായിരുന്നാലും നിന്റെ പുഞ്ചിരി അതില്ലാതെയാക്കുന്നു. നിന്നെ നല്കിയ സര്വേശ്വരനോട് ഞാന് എന്നും കടപ്പെട്ടിരിക്കും. നിരുപാധികമായ സ്നേഹത്തിന്റെ യഥാര്ത്ഥ അര്ഥമെന്താണെന്ന് എന്നെ കാണിച്ചു തന്നതിന് നന്ദി. എന്റെ കുഞ്ഞേ... എന്റെ ഹൃദയം എന്നും നിനക്കൊപ്പം ഉണ്ടായിരിക്കും. ഓരോ വര്ഷവും ഞാന് നിന്നെ കുറച്ചു കൂടി ചേര്ത്തുപിടിക്കും. ദൈവം നിന്നെ അനുഗ്രഹിക്കട്ടെ എന്നര്ത്ഥമാകുന്ന വരികളാണ് മകന് പിറന്നാള് ആശംസിച്ചു കൊണ്ട് സാനിയ കുറിച്ചിരിക്കുന്നത്.
2010 ഏപ്രില് 12 നായിരുന്നു സാനിയ മിര്സ പാകിസ്ഥാന് ക്രിക്കറ്റ് താരം ശുഐബ് മാലിക്കിനെ വിവാഹം കഴിച്ചത്. 2018 ഒക്ടോബറിലാണ് സാനിയയ്ക്കും ശുഐബിനും മകന് ജനിച്ചത്. ഇസാന് മിര്സ മാലിക് എന്നാണ് കുഞ്ഞിന്റെ പേര്.
