പൊതുപ്രവര്ത്തകനായ ജോസ് കെ.മാണിയുടെ ഭാര്യയായ നിഷ ജോസ് കെ.മാണി സാമൂഹിക സേവനം തന്റെ ജീവിതത്തിന്റെ ഭാഗമായിട്ടാണ് കാണുന്നത്. സാമൂഹിക പ്രവര്ത്തകയായ നിഷ എല്ലാ വിശേഷങ്ങളും സോഷ്യല് മീഡിയയിലൂടെ പങ്കിടാറുണ്ട്. ഇപ്പോഴിതാ തനിക്ക് അർബുദ രോഗമുണ്ടെന്ന് തിരിച്ചറിഞ്ഞെന്നും ശസ്ത്രക്രിയയ്ക്ക് വിധേയമായെന്നും വ്യക്തമാക്കിയിരിക്കുകയാണ് നിഷ ജോസ്. രോഗലക്ഷണങ്ങൾ ഒന്നും ഇല്ലായിരുന്നെന്നും മാമോഗ്രാം വഴിയാണ് രോഗം കണ്ടെത്തിയതെന്നും നിഷ സോഷ്യല് മീഡിയയിലൂടെ പറഞ്ഞു. കുടുംബത്തിന്റെ പിന്തുണയും ശക്തിയും അര്ബുദത്തെ പ്രതിരോധിക്കാനുള്ള പ്രചോദനമായെന്ന് നിഷ ജോസ് പറഞ്ഞു. ‘‘ജൂൺ 19, 2013; ഞാനൊരു ഹെയർ ഡൊണേഷൻ വിഗ് ഡൊണേഷൻ മൂവ്മെന്റ് തുടങ്ങിയ ദിവസമാണ്. അതിന് ശേഷം ഒത്തിരി രോഗികളെ കണ്ടു, അവരെ സഹായിച്ചു. കൂടാതെ കാൻസർ അവയർനെസ് ക്യാമ്പുകൾ നടത്താൻ പറ്റി. സെൽഫ് എക്സാമിനേഷന്റെയും മാമോഗ്രാമിന്റെയും ആവശ്യകത ആളുകളെ മനസ്സിലാക്കി കൊടുക്കാറുണ്ട്...’’
എല്ലാ വര്ഷവും മാമോഗ്രാം ചെയ്യാറുണ്ടായിരുന്നു. അങ്ങനെയാണ് സ്തനാര്ബുദം കണ്ടെത്തിയതെന്നും നിഷ പറയുന്നു. സർജറി ചെയ്തെന്നും തനിക്ക് യാതൊരു വിധത്തിലുള്ള രോഗലക്ഷണങ്ങളും ഉണ്ടായിരുന്നില്ലെന്നും നിഷ വിഡിയോയിൽ വ്യക്തമാക്കി. ‘‘എനിക്ക് രണ്ട് ഭാഗ്യമാണ് ഉള്ളത്. ഒന്ന് കുടുംബത്തിന്റെ സപ്പോർട്ട്. ജോസ് എല്ലാ സമയത്തും എന്റെ കൂടെ ഉണ്ടായിരുന്നു. കുടുംബാംഗങ്ങളും ഒപ്പം നിന്നു. പിന്നെ എന്റെ ഉള്ളിലുള്ള സ്ട്രെങ്ത്ത്. എത്രയോ രോഗികളെ കാണുന്നുണ്ട്. ആ ഒരു സ്ട്രെങ്ത്ത് ദൈവം തന്നതുകൊണ്ട് കാൻസറിനെ കീഴടക്കിയിട്ടേ ഉള്ളു കാര്യം ഇനി’. നിഷ വീഡിയോയിലൂടെ പറഞ്ഞു. ‘താങ്കളുടെ സ്വകാര്യ ജീവിതത്തിലെ ഈ വേദനജനകമായ നിമിഷം ജനനന്മയ്ക്കായി പൊതുജനങ്ങളിലേക്ക് എത്തിച്ചതിൽ അഭിനന്ദനങ്ങൾ, പ്രാര്ത്ഥന എപ്പോഴുമുണ്ട്...’ എന്നൊക്കെയാണ് വീഡിയോ കണ്ട് പലരുമിടുന്ന കമന്റുകള്.
