ഒറ്റപ്പാലത്ത് പോലീസ് വാഹനത്തിന് നേരെ അതിക്രമം. പോലീസ് സ്റ്റേഷന് പുറത്ത് പാതയോരത്ത് നിര്ത്തിയിട്ടിരുന്ന പോലീസ് വാഹനത്തിന് നേരെയാണ് യുവാവ് അതിക്രമം നടത്തിയത്. സംഭവത്തില് വാണിയംകുളം മാന്നനൂര് സ്വദേശി ശ്രീജിത്തിനെ പോലീസ് അറസ്റ്റ് ചെയ്തു.
കഴിഞ്ഞ ദിവസം ഉച്ചയോടെയാണ് ഒറ്റപ്പാലം സ്റ്റേഷന് സമീപം ആര്എസ് റോഡില് സംഭവം നടന്നത്. സ്റ്റേഷനില് ജില്ലാ പോലീസ് മേധാവി ഉള്പ്പെടെ പങ്കെടുക്കുന്ന പൊതു ചടങ്ങ് കാരണം സ്റ്റേഷന് പുറത്തായിരുന്നു വാഹനം നിര്ത്തിയിട്ടിരുന്നത്. ഇതുവഴി യാത്ര ചെയ്യുകയായിരുന്ന ശ്രീജിത്ത് ബൈക്ക് നിര്ത്തി പോലീസ് വാഹനത്തിനടുത്തെത്തി കയ്യിലുണ്ടായിരുന്ന ഹെല്മറ്റ് ഉപയോഗിച്ച് വാഹനത്തിന് മുന്നിലെ ചില്ല് അടിച്ചു തകര്ക്കുകയായിരുന്നു.
യുവാവിനെ പോലീസുകാര് ഓടിയെത്തിയാണ് പിടിച്ചു മാറ്റിയത്. യുവാവ് മദ്യലഹരിയിലായിരുന്നുവെന്ന് പോലീസ് പറയുന്നു. ഇയാള്ക്കെതിരെ പൊതുമുതല് നശിപ്പിക്കല് ഉള്പ്പെടെയുളള വകുപ്പുകള് ചുമത്തിയാണ് കേസെടുത്തിരിക്കുന്നത്.
