മലയാള സിനിമാപ്രേക്ഷകര്‍ ഏറെ ആവേശത്തോടെയാണ് പൃഥ്വിരാജിന്റെ സംവിധാനത്തില്‍ പിറക്കുന്ന എമ്പുരാനു വേണ്ടി കാത്തിരിക്കുന്നത്. മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്ത ലൂസിഫറിന്റെ രണ്ടാം ഭാഗമാണ് എമ്പുരാന്‍. അതിന്റെ ഓരോ അപ്ഡേറ്റുകളും പ്രേക്ഷകര്‍ നിമിഷനേരം കൊണ്ട് ആഘോഷമാക്കാറുണ്ട്. ഇപ്പോഴിതാ എമ്പുരാന്റെ ചിത്രീകരണത്തിന്റെ ഇടവേളയില്‍ ആന്ധ്രപ്രദേശിലെ കര്‍ണൂലിലെ സിദ്ധഗഞ്ച് ആശ്രമത്തില്‍ സന്ദര്‍ശനം നടത്തിയ മോഹന്‍ലാലിന്റെ ചിത്രങ്ങളാണ് ആരാധകര്‍ ഏറ്റെടുത്തിരിക്കുന്നത്. ഗുരുജി അവധൂത നാദാനന്ദയ്‌ക്കൊപ്പം മോഹന്‍ലാല്‍ ചിലവഴിച്ച നിമിഷങ്ങളാണ് ചിത്രങ്ങളിലുള്ളത്.
എഴുത്തുകാരനും തിരക്കഥാകൃത്തുമായ ആര്‍. രാമാനന്ദാണ് ചിത്രങ്ങള്‍ സോഷ്യല്‍ മീഡയയില്‍ പങ്കുവച്ചത്. രാമാനന്ദും മോഹന്‍ലാലിനൊപ്പമുണ്ട്. ആശ്രമത്തില്‍ എത്തിയ മോഹന്‍ലാല്‍ ഗുരുജിക്കൊപ്പം ക്ഷേത്രദര്‍ശനം നടത്തുന്നതും ഭക്ഷണം കഴിക്കുന്നതും ഉള്‍പ്പെടെയുള്ള ചിത്രങ്ങള്‍ ഇക്കൂട്ടത്തിലുണ്ട്. ‘‘നാദത്തിലുണ്ടാം നമ:ശിവായപ്പൊരുൾ അവധൂത നാദാനന്ദജീ മഹാരാജിനൊപ്പം ...കർണൂൽ ...’’എന്ന കുറിപ്പിനൊപ്പമാണ് രാമാനന്ദ് ചിത്രങ്ങള്‍ പങ്കുവച്ചത്.
‘എമ്പുരാനെ’ ക്കൂടാതെ ‘മലൈക്കോട്ടെ വാലിബന്‍’, ‘ബറോസ്’, ‘നേര്’ എന്നിവയാണ് മോഹന്‍ലാലിന്റേതായി റിലീസിനൊരുങ്ങുന്ന ചിത്രങ്ങള്‍. മോഹന്‍ലാല്‍ ആദ്യമായി സംവിധാനം ചെയ്യുന്ന ബറോസ് മാര്‍ച്ച്‌ 28നാണ് റിലീസ് ചെയ്യുന്നത്. പൃഥ്വിരാജ് സംവിധാനം ചെയ്യുന്ന എമ്പുരാന്റെ അടുത്ത ഷെഡ്യൂള്‍ ജനുവരിയില്‍ അമേരിക്കയില്‍ ആരംഭിക്കും. തുടര്‍ന്ന് യു.കെയിലും അബുദാബിയിലും ചിത്രീകരണം നടക്കും. ഡല്‍ഹിയിലും ലഡാക്കിലുമായിരുന്നു ആദ്യ ഷെഡ്യൂള്‍.
Comments