തമിഴകത്തിന്റെ ഇളയദളപതി വിജയ് യുടെ സിനിമകള്ക്ക് എന്നും ആരാധകര് ഏറെയാണ്. താരത്തിന്റെ ഏറ്റവും പുതിയ ചിത്രം ‘ലിയോ’ തിയേറ്ററില് മികച്ച അഭിപ്രായം നേടി കോടികള് ലാഭം കൊയ്യുകയാണ്. വിജയ് യുടെ സിനിമകള് തിയേറ്ററില് കാണുക എന്നതിനെക്കാളേറെ ആഗ്രഹമാണ് മിക്കവര്ക്കും താരത്തിനൊപ്പം സ്ക്രീന്സ്പേസ് ഷെയര് ചെയ്യുക എന്നത്. ലിയോ സിനിമ കണ്ടവരാരും വിജയ് യുടെ മകളായി അഭിനയിച്ച കുഞ്ഞ് ഇയലിനെ മറന്നു കാണാനിടയില്ല. ഇപ്പോഴിതാ സിനിമയിലെ മകളെ സക്സസ് മീറ്റിനിടെ വേദിയിലെത്തി വാരിയെടുത്ത് സ്നേഹ ചുംബനം നല്കുന്ന വിജയ് യുടെ വീഡിയോയാണ് സോഷ്യല് മീഡിയയിലൂടെ വൈറലാകുന്നത്.
വേദിയില് വച്ച് സിനിമയെക്കുറിച്ചും പ്രേക്ഷകര് സ്വീകരിച്ചതിനെക്കുറിച്ചും ഇയല് സംസാരിച്ചു. ഇതിനിടയില് വേദിയില് നന്ദി പറഞ്ഞു കൊണ്ടിരിക്കുവേ ഇയല് വികാരാധീനിതയായി വിതുമ്പി കരഞ്ഞു. ഇതോടെ അവതാരക വിജയ്യുടെ അടുത്തേക്ക് പോയിക്കൊള്ളൂ എന്ന് ഇയലിനോട് പറഞ്ഞപ്പോഴേക്കും അവിടെ ഇരിക്കുന്നുണ്ടായിരുന്ന വിജയ് വേദിയിലേക്ക് എത്തി. ഓടിയെത്തിയ വിജയ് ഇയലിനെ വാരിയെടുത്ത് വേദിയിലേക്ക് നടന്നു. പിന്നീട് ഇയല് സംസാരിച്ചത് വിജയ് യുടെ കൈകളില് ഇരുന്നാണ്. സംസാരത്തിനൊടുവില് ഇയല് വിജയ്ക്ക് കവിളത്ത് ഉമ്മ നല്കി. തിരിച്ച് വിജയ് യും ഇയലിന് സ്നേഹ ചുംബനം നല്കുകയും ചെയ്തു. തമിഴ് നടനായ അര്ജുനന്റെ മകളാണ് ഇയല്. ‘‘ഇനിയും വിജയുടെ സിനിമകളില് അഭിനയിക്കണമെന്നാണ് ആഗ്രഹം...’’ എന്നാണ് ഇയല് പറഞ്ഞത്. അതിനുള്ള ഉറപ്പ് വിജയ് നല്കുകയും ചെയ്തു. സക്സസ് മീറ്റിന് എത്തിയ കാണികള് ഈ നിമിഷം കയ്യടികളുടെയാണ് സ്വീകരിച്ചത്. സിനിമയില് മലയാളിതാരമായ മാത്യൂവാണ് വിജയ് യുടെ ചെറുപ്പകാലം അഭിനയിച്ചത്. സക്സസ് മീറ്റില് മലയാളിതാരം മാത്യുവും വേദിയിലുണ്ടായിരുന്നു. ഈ നിമിഷങ്ങളെല്ലാം ക്യാമറയില് പകര്ത്തുന്ന ഇയലിന്റെ അമ്മ അവസാനം സന്തോഷം കൊണ്ട് കണ്ണ് നിറയ്ക്കുന്നതും വീഡിയോയിലുണ്ട്.
