ഇരിങ്ങാലക്കുട: വിവാഹ വിരുന്നിനിടെ അഞ്ചു വയസ്സുകാരിയുടെ കയ്യില് ഐസ്ക്രീം പുരട്ടി മോഷണം. കത്തീഡ്രല് പാരീഷ് ഹാളില് നടന്ന സല്ക്കാരത്തിനിടെയായിരുന്നു സംഭവം. ഇരിങ്ങാലക്കുട സ്വദേശി മാര്ട്ടിന്റെ അഞ്ചു വയസ്സുള്ള മകളുടെ മാലയും വളകളുമാണ് മോഷണം പോയത്. അഞ്ച് പവനുള്ള മാലയും നാലു വളകളുമാണ് നഷ്ടമായത്. കുട്ടിയുടെ കയ്യില് ഐസ്ക്രീം പുരട്ടിയ ശേഷം കഴുകി തരാമെന്ന് പറഞ്ഞ് കൊണ്ടു പോയ ശേഷം ആഭരണങ്ങളുമായി കടന്നു കളയുകയായിരുന്നു.
ആദ്യം ഒരു പ്രാവശ്യം ഇയാള് കുട്ടിയുടെ കയ്യില് ഐസ്ക്രീം പറ്റിച്ചെങ്കിലും അമ്മ കൊണ്ടു പോയി കഴുകി കൊടുത്തു. എന്നാല് വീണ്ടും പുരട്ടുകയായിരുന്നു. വിവാഹ ക്യാമറയില് ഇയാളെ കുട്ടിയുടെ അമ്മ തിരിച്ചറിഞ്ഞിട്ടുണ്ട്. ഇയാള്ക്കു വേണ്ടിയുള്ള തിരച്ചില് ആരംഭിച്ചിട്ടുണ്ട്. ജില്ലയുടെ വിവിധ ഭാഗങ്ങളില് ഇത്തരം ആഘോഷങ്ങളില് മോഷണങ്ങള് നടന്നിട്ടുള്ളതായി വിവരം ലഭിച്ചിട്ടുണ്ടെന്ന് പോലീസ് പറഞ്ഞു.
