ലിജോ ജോസ് പെല്ലിശ്ശേരി മോഹന്ലാല് കൂട്ടുകെട്ടിലൊരുങ്ങുന്ന ‘മലൈക്കോട്ട വാലിബന്’ പ്രേക്ഷകര് ഏറെ ആവേശത്തോടെ കാത്തിരിക്കുന്ന സിനിമയാണ്. സിനിമയെക്കുറിച്ചുളള ഓരോ അപ്പ്ഡേറ്റുകള്ക്കും വലിയ സ്വീകാര്യതയാണ് കിട്ടുന്നത്. ചിത്രത്തില് മോഹൻലാലിനൊപ്പം മറ്റൊരു പ്രധാന വേഷത്തില് നടൻ ഹരീഷ് പേരടിയും എത്തുന്നുണ്ട്. ഇപ്പോഴിതാ, ഹരീഷ് പേരടി വാലിബനിലെ ഷൂട്ടിംഗ് ലൊക്കേഷൻ അനുഭവങ്ങള് പങ്കുവച്ചതാണ് സോഷ്യല് മീഡിയയില് വൈറലാകുന്നത്. സംവിധായകൻ ലിജോ ജോസ് പെല്ലിശ്ശേരിയെയും ഛായാഗ്രഹകൻ മധു നീലകണ്ഠനെയും കുറിച്ചാണ് ഹരീഷ് പേരടി ഫേസ്ബുക്ക് പോസ്റ്റിലൂടെ പറയുന്നത്. ‘‘ലിജോ ജോസ് പല്ലിശ്ശേരിയും മധു നീലകണ്ഠനും..മലയാളിയുടെ സർവ്വസാധാരണ വസ്ത്രമായ മുണ്ടുമുടുത്ത് ലോക സിനിമയുടെ ഭൂപടത്തിലേക്ക് ദൃശ്യ കവിത ഉണ്ടാക്കുകയാണവർ...അതുകൊണ്ടാണവരുടെ വിരലുകളും കൺപീലികളും മുഖവും കഥാപാത്രങ്ങളുടെ കണ്ണാടിയാവുന്നത്...ക്യാമറക്കുമുന്നിൽ ഈ രണ്ടെണ്ണത്തിനോടും മുട്ടാൻ നല്ല രസമാണ്...നമ്മള് അർജൻറ്റിനയാവുമ്പം ഇവര് ബ്രസിലാവും...ബ്രസിലിന്റെ സ്റ്റൈലാണ്ഇവർക്ക് ഇഷ്ടമെന്ന് കരുതി അടുത്ത കളിക്ക് നമ്മള് ബ്രസിലായാൽ ഇവർ ബ്രസിലും കടന്ന് ഹോളണ്ടാവും...കളി കഴിഞാൽ വിയർത്ത് നിൽക്കുന്ന നമ്മളെ വന്ന് കെട്ടിപിടിക്കും..എന്തിനാണ് കെട്ടിപിടിക്കുന്നത് ഞങ്ങൾ ഗോളൊന്നും അടിച്ചില്ലല്ലോ എന്ന് ചോദിച്ചാൽ ആരും കേൾക്കാതെ ചെവിട്ടിൽ പറയും നല്ല കളിയായിരുന്നു നിങ്ങളുടെതെന്ന്..അപ്പോൾ എന്റെ മനസ്സിൽ ഒരു വെടി പൊട്ടും...ശരിയാണ്..‘കൂടുതൽ ഗോളടിക്കുന്ന മൽസരങ്ങളെക്കാൾ നല്ല കളി സമനിലയാവുന്ന മൽസരങ്ങളാണല്ലോയെന്ന്’...കട്ടക്ക് കട്ട കളിയിൽ മനസ്സ് സന്തോഷമാവും...കളി നിയന്ത്രിക്കാനറിയാവുന്ന പ്രധാന റഫറിയേയും അയാളൊടൊപ്പം എന്തിനും കുടെ നിൽക്കുന്ന ലെൻസ് റഫറിയേയും വല്ലാതെ മിസ്സ് ചെയ്യുന്നു...വാലിബൻ ഓർമ്മകൾ...’’ എന്നാണ് ഹരീഷ് പേരടി ഇവരുടെ ചിത്രത്തിനൊപ്പം കുറിച്ചിരിക്കുന്നത്.
