നാടകരംഗത്തും സിനിമാരംഗത്തും ഒരുപോലെ സജീവമായ താരമാണ് സജിത മഠത്തിൽ. സോഷ്യൽ മീഡിയയിൽ നിറഞ്ഞു നിൽക്കുന്ന താരം എല്ലാ വിശേഷങ്ങളും അഭിപ്രായങ്ങളും അതിലൂടെ കുറിക്കാറുണ്ട്. ഇപ്പോഴിതാ പ്രശസ്ത മലയാള സാഹിത്യകാരി പി വത്സലയെ അനുസ്മരിക്കുകയാണ് താരം. "ആദ്യം പരിചയപ്പെട്ട എഴുത്തുകാരി. നടക്കാവ് സക്കൂളിൽ വെച്ചാണ് നേരിട്ട് കാണുന്നത്. നെല്ല് വായിച്ചാണ് ആരാധികയാവുന്നത്! തിരുനെല്ലിക്ക് പോകുന്നത് അങ്ങിനെയാണ് . വെള്ളിമാടുകുന്ന് കാലത്ത് ആ വീട്ടിൽ പല കാര്യങ്ങളുമായി ചെന്നിട്ടുണ്ട്. അമ്മയോടുള്ള സ്നേഹം എന്നോടും കാണിച്ചിട്ടുണ്ട്. പുസ്തകങ്ങൾക്കിടയിരിക്കുന്ന ഒരു സ്ത്രീയെ ഞാനാദ്യമായി കാണുന്നത് അങ്ങിനെയാണ്. ടീച്ചർക്ക് വിട !..." എന്നാണ് പി. വത്സലയുടെ ചിത്രത്തിനൊപ്പം സജിത മഠത്തിൽ കുറിച്ചത്.
85 വയസായ പി വത്സല ഹൃദയാഘാതത്തെ തുടര്ന്നാണ് അന്തരിച്ചത്. വിവാഹശേഷം വയനാട്ടിലേക്ക് താമസം മാറ്റിയ എഴുത്തുകാരി അവിടെവച്ചാണ് ആദിവാസി സമൂഹങ്ങളുടെ കഥ പറയുന്ന, ഒട്ടേറെ നിരൂപക പ്രശംസ നേടിയ നെല്ല് എഴുതിയത്. രാമു കാര്യാട്ട് അത് സിനിമയാക്കിയപ്പോള് വത്സല അതിന് തിരക്കഥയൊരുക്കി.
