ഓരോ വ്യക്തിയുടെയും ജീവിതത്തിലെ ഏറ്റവും മനോഹരവും സുപ്രധാനവുമായ നിമിഷമാണ് വിവാഹം. അന്നേ ദിവസം വിവാഹച്ചടങ്ങുകളിലേക്ക് നമ്മുക്ക് വേണ്ടപ്പെട്ടവരെയെല്ലാം ക്ഷണിക്കുകയും വിഭവസമൃദ്ധമായ ഭക്ഷണം ഒരുക്കുകയുമാണ് ചെയ്യാറുള്ളത്. ജീവിതത്തില് എന്നും ഓര്ത്തിരിക്കാനുള്ള സുന്ദരമായ നിമിഷങ്ങളും വിവാഹച്ചടങ്ങുകള് സമ്മാനിക്കാറുണ്ട്. എന്നാല്, അടുത്തിടെ, ഒരു വിവാഹത്തിന് അതിഥികള്ക്ക് സ്വന്തമായി റൊട്ടി തയ്യാറാക്കി കഴിക്കുന്നതിന്റെ ഒരു വീഡിയോ സാമൂഹിക മാധ്യമങ്ങളിലൂടെ പ്രചരിക്കുകയുണ്ടായി. കാഴ്ച്ചക്കാരെ മുഴുവന് വീഡിയോ ആശ്ചര്യപ്പെടുത്തിയിരിക്കുകയാണ്.
@WokePandemic എന്ന ട്വിറ്റര് അക്കൗണ്ടാണ് വീഡിയോ പങ്കുവച്ചിരിക്കുന്നത്. വീഡിയോയില് ''വലിയ പാര്ട്ടികളില് ഇത് പുതിയ കാര്യമാണോ? നിങ്ങളുടെ സ്വന്തം റൊട്ടി ഉണ്ടാക്കുക'' എന്ന ക്യാപ്ഷനോടെയാണ് ഈ വീഡിയോ പോസ്റ്റ് ചെയ്തത്. വീഡിയോയില് കോട്ടും സ്യൂട്ടും ധരിച്ച മധ്യവയസ്കരായ രണ്ട് പുരുഷന്മാര് നോണ്-സ്റ്റിക്ക് തവയില് ചപ്പാത്തി ഉണ്ടാക്കുന്നതാണ് കാണാനാവുന്നത്. അവരുടെ ഒരു കൈയില് ഒരു പ്ലേറ്റ് നിറയെ ഭക്ഷണസാധനങ്ങള് പിടിച്ചിരിക്കുന്നത് കാണാം. മറുകൈകൊണ്ടാണ് പാചകം. വീഡിയോ ദൃശ്യത്തോടൊപ്പം ചേര്ത്തിരിക്കുന്ന മറ്റൊരു കുറിപ്പ് ഇങ്ങനെയാണ്, ''ഒരു വിവാഹത്തില് പങ്കെടുക്കുകയാണെന്നത് ഞാന് മറന്നു. ഇവിടെ എന്റെ ഭക്ഷണം ഞാന് സ്വന്തമായി പാകം ചെയ്യണം.'
നിമിഷ നേരങ്ങള്ക്കുള്ളില് നിരവധി ആളുകളാണ് വീഡിയോ കണ്ടത്. രസകരമായ രീതിയിലാണ് പലരും ഇതിനോട് പ്രതികരിച്ചത്, വളരെ മനോഹരമായ ആചാരം, കഴിച്ച പാത്രം കഴുകിവെപ്പിച്ചിട്ട് കൂടി വിട്ടാല് മതി എല്ലാവരെയും എന്നാണ് വീഡിയോയ്ക്ക് താഴെ ഒരാള് കുറിച്ചത്. വിവാഹങ്ങള്, പാര്ട്ടികള്, മറ്റ് സാമൂഹിക ഒത്തുചേരലുകള് എന്നിവ ഇത്തരം ഇഷ്ടാനുസൃത ഭക്ഷണ ക്രമീകരണങ്ങള് ഒരുക്കുന്ന രീതിയിലേക്ക് ഇപ്പോള് പലയിടങ്ങളിലും മാറിയിട്ടുണ്ട്. പക്ഷേ, അവ അതിഥികള്ക്കിടയില് എത്രത്തോളം സ്വീകാര്യമാകും എന്ന കാര്യം കണ്ടറിയണം.
New thing in big parties ?
Make your own roti pic.twitter.com/8Q9lVuAmFF— Eminent Woke (@WokePandemic) December 1, 2023
