തിയേറ്ററില് മേഖലയില് നിന്നെത്തി സ്വതസിദ്ധമായ അഭിനയശൈലിയിലൂടെ പ്രേക്ഷകമനസ്സിലിടം നേടിയ തെന്നിന്ത്യന് താരമാണ് ഹരീഷ് പേരടി. മലയാളത്തില് മാത്രമല്ല തമിഴിലും താരത്തിന് ഏറെ ആരാധകരുണ്ട്. കാമ്പുള്ള കഥാപാത്രങ്ങള് അഭിനയിക്കുന്ന താരം തന്റെ അഭിപ്രായങ്ങളും നിലപാടുകളും തുറന്നു പറയാറുണ്ട്. അടുത്തിടെ ഒരു ഇംഗ്ലീഷ് പത്രത്തിന് നല്കിയ അഭിമുഖത്തില് സംവിധായകനും ചലച്ചിത്ര അക്കാദമി ചെയര്മാനുമായ രഞ്ജിത്ത് നടന് ഭീമന് രഘുവിനെതിരെ നടത്തിയ പരാമര്ശം ഏറെ വിവാദമായിരുന്നു. മുന്പ് ഒരു പൊതുവേദിയില് മുഖ്യമന്ത്രി പിണറായി വിജയന് സംസാരിക്കുന്ന സമയത്ത് ഭീമന് രഘു എഴുന്നേറ്റ് നിന്നത് പരാമര്ശിച്ചായിരുന്നു രഞ്ജിത്ത് സംസാരിച്ചത്. ഞങ്ങള് ഒക്കെ കളിയാക്കി കൊല്ലാറുള്ള ഒരു മണ്ടനാണ് ഭീമന് രഘു എന്നാണ് രഞ്ജിത്ത് പറഞ്ഞത്. ഇപ്പോഴിതാ ഈ വാര്ത്ത ഷെയര് ചെയ്ത് രഞ്ജിത്തിനെ വിമര്ശിച്ച് രംഗത്ത് വന്നിരിക്കുകയാണ് നടന് ഹരീഷ് പേരടി. ഫേസ്ബുക്ക് കുറിപ്പിലാണ് രഞ്ജിത്തിനെ ഹരീഷ് വിമര്ശിക്കുന്നത്. ‘‘രാജാവിനെ പുകഴ്ത്താൻ പെടാപാടുപെടുന്ന രാജസദസ്സിലെ രണ്ട് മണ്ടൻമാര്ക്കിടയില് ആരാണ് വലിയ മണ്ടൻ എന്ന് മാത്രമേ ഇനി അറിയേണ്ടു. ഒരു മണ്ടന് മറ്റൊരു മണ്ടനെ ഇഷ്ടമല്ലാ എന്ന് പറഞ്ഞവൻ ഏതായാലും മണ്ടനല്ല എന്ന് ഉറപ്പായി . സ്വന്തം മണ്ട എങ്ങിനെ നിങ്ങളെ സഹിക്കുന്നു. മണ്ട സലാം...’’ എന്നാണ് ഹരീഷ് പേരടി കുറിച്ചത്.
മുഖ്യമന്ത്രിയുടെ പ്രസംഗം നടക്കുന്നതിനിടെ ഭീമന് രഘു എഴുന്നേറ്റ് നിന്നതിനെ കുറിച്ച് പറഞ്ഞായിരുന്നു രഞ്ജിത്ത് സംസാരിച്ചത്. അഭിമുഖത്തില് രഞ്ജിത്ത് പറഞ്ഞത് ഇങ്ങനെയായിരുന്നു. ‘‘എനിക്ക് മുഖ്യമന്ത്രിയോടുള്ള ബഹുമാനം അദ്ദേഹം ആ ഭാഗത്തേക്കേ് നോക്കിയില്ല എന്നതാണ്. കാരണം മിസ്റ്റര് രഘൂ നിങ്ങള് അവിടെ ഇരിക്കൂ എന്നു പറഞ്ഞാല് ഇയാള് ആളായി. അങ്ങനെ പുള്ളി ആരെയും ആളാക്കില്ല. സിനിമയില് ഇയാള് ഒരു കോമാളിയാണ്. മസില് ഉണ്ടെന്നേയുള്ളൂ. ഞങ്ങളൊക്കെ എത്ര കാലമായി കളിയാക്കി കൊന്നുകൊണ്ടിരിക്കുന്ന ഒരുത്തനാ. മണ്ടനാണ്....’’ എന്നാണ്.
