തെന്നിന്ത്യയിലും ബോളിവുഡിലും ഒരുപോലെ തിളങ്ങി നിന്ന താരമാണ് ശ്രീദേവി കപൂര്. ശ്രീദേവിയുടെ മകളെന്ന ലേബലിലാണ് മകളായ ജാന്വി കപൂറിനെ പ്രേക്ഷകര് അറിഞ്ഞു തുടങ്ങിയത്. പക്ഷേ പിന്നീട് ബോളിവുഡില് തന്റേതായ ഒരു സ്ഥാനവും ഇടവും നേടിയെടുക്കാന് ജാന്വിക്ക് കഴിഞ്ഞിട്ടുണ്ട്. അഭിനയിക്കുന്ന സിനിമകളിലെല്ലാം തന്റേതായ ഒരു ഐഡന്റിറ്റി കാത്തുസൂക്ഷിക്കാന് ശ്രീദേവിക്ക് കഴിഞ്ഞു. ഇപ്പോഴിതാ ആ യാത്ര അത്ര എളുപ്പമായിരുന്നില്ല എന്ന് തുറന്നു പറയുകയാണ് ജാന്വി കപൂര്. ശ്രീദേവിയുടെ മകളാകുക എന്നത് അത്ര എളുപ്പമുള്ള കാര്യമല്ലെന്നാണ് ജാൻവി പറയുന്നത്. ‘‘ശ്രീദേവിയുടെ മകളാകുക എന്നത് ഈ ഇന്ഡസ്ട്രിയില് പിടിച്ചു നില്ക്കുമ്പോള് അത്ര എളുപ്പമുള്ള കാര്യമല്ല. ഈ വിഷയത്തിൽ ഞാൻ എപ്പോഴും സമ്മർദ്ദം നേരിട്ടിട്ടുണ്ട്. എന്റെ ആദ്യ ചിത്രം ‘ധടക്’ പുറത്തിറങ്ങിയപ്പോൾ അമ്മ ശ്രീദേവി കപൂറുമായി എന്നെ ഒരുപാട് താരതമ്യം ചെയ്തു.
ആദ്യ സിനിമ കിട്ടിയതു പോലും ശ്രീദേവി കപൂറിന്റെ മകളായതു കൊണ്ടാണെന്ന് എല്ലാവരും പറഞ്ഞിരുന്നു. അതുകൊണ്ട് എന്റെ മനസ്സില് ഞാനുറപ്പിച്ചു, മമ്മയുടെ സഹായം ഒരിക്കലും തേടില്ല എന്ന്. മമ്മ ഏതു തരത്തിലുള്ള അഭിനയമാണോ കാഴ്ചവച്ചിരുന്നത്, അതില് നിന്നും നേരെ എതിരായിട്ട് മാത്രമേ ഞാന് അഭിനയിക്കൂ എന്ന് ഉറപ്പിച്ചു. മമ്മ സെറ്റില് വരണ്ട, എനിക്ക് മമ്മയുടെ സഹായം വേണെന്ന് പറഞ്ഞു. ഇപ്പോള് ഓര്ക്കുമ്പോള് അതൊരു വലിയ മണ്ടത്തരമായിരുന്നുവെന്ന് മനസ്സിലാകുന്നു. എത്രയൊക്കെ മാറിയാലും ഞാന് എപ്പോഴും മമ്മയുടെ മകളാണ്, ആ സത്യത്തില് നിന്ന് ഒരിക്കലും ഒളിച്ചോടാന് എനിക്ക് കഴിയില്ല. ആളുകളുടെ പരിഹാസങ്ങള് ഞാന് ഒരു ആവശ്യമില്ലാതെ മുഖവിലയ്ക്ക് എടുത്തതാണെന്ന് പിന്നിടെനിക്ക് മനസ്സിലായി. സത്യത്തില് മമ്മ എനിക്കൊപ്പം സെറ്റില് വരാനും എന്നെ സഹായിക്കാനും ഒരുപാട് ആഗ്രഹിച്ചിരുന്നു. എന്റെ ജീവിതത്തിലെ ഏറ്റവും വലിയ തെറ്റായി അത് മാറി, ഒരിക്കലും തിരുത്താനാവാത്ത തെറ്റ്. ഇപ്പോള് ഞാന് ശരിക്കും ആഗ്രഹിക്കുന്നുണ്ട്, മമ്മ എനിക്കൊപ്പം സെറ്റില് വന്നിരുന്നെങ്കില്, എന്നെ സപ്പോര്ട്ട് ചെയ്തിരുന്നെങ്കിലെന്ന്....’’ ഇടറുന്ന സ്വരത്തില് ജാന്വി പറഞ്ഞു.
