മോഡലിംഗിലൂടെ തുടങ്ങി പിന്നീട് ബോളിവുഡിന്റെ അഭിനയമേഖലയില് ഐറ്റം സോംഗുകളിലൂടെയും സഹനായിക വേഷങ്ങളിലൂടെയും തിളങ്ങിയ താരമാണ് മലൈക അറോറ. ഖാന് കുടുംബത്തിന്റെ മരുമകളായി മാറിയ താരം പിന്നീട് നിരവധി ഹിന്ദി ചിത്രങ്ങളിലൂടെ തിളങ്ങി. അര്ബാസ് ഖാനുമായി വേര്പിരിഞ്ഞ ശേഷവും അഭിനയമേഖലയില് നിറഞ്ഞു നിന്ന താരം ഇപ്പോള് ബോളിവുഡിലെ മുന്നിര നായികയാണ്. പ്രായത്തെ വെല്ലുന്ന ഫിറ്റ്നസുമായി മലൈക സോഷ്യല് മീഡിയയില് നിറഞ്ഞു നില്ക്കാറുണ്ട്. ഡാന്സ് റിയാലിറ്റി ഷോകളിലെ വിധികര്ത്താവായി സജീവമായ താരം നിരവധി സൂപ്പര് ഹിറ്റ് ഗാനങ്ങള്ക്ക് ചുവടുവച്ചിട്ടുണ്ട്. മലൈകയുടെ ഹോട്ട് ഫോട്ടോഷൂട്ടുകളും മറ്റും മിക്കപ്പോഴും വൈറലായി മാറാറുണ്ട്. അതുപോലെ തന്നെ മലൈകയുടെ പ്രണയം എന്നും വാര്ത്തകളില് ഇടം നേടിയിട്ടുണ്ട്. നടന് അര്ജുന് കപൂറുമായുള്ള മലൈകയുടെ പ്രണയം ഏറെ ചര്ച്ചച്ചെയ്യപ്പെട്ടതാണ്. നേരത്തെ വിവാഹിതയും ഒരു മകന്റെ അമ്മയുമായ മലൈക തന്നേക്കാള് പ്രായം കുറഞ്ഞ അര്ജുനുമായി പ്രണയിച്ചത് വാര്ത്തകളില് ഇടം നേടി. ഇരുവര്ക്കും സോഷ്യല് മീഡിയയുടെ അധിക്ഷേപങ്ങളും നേരിടേണ്ടി വന്നു. ഇടയ്ക്ക് ഇവര് പിരിഞ്ഞുവെന്ന വാര്ത്തകളും വന്നു. എന്നാല് രണ്ടുപേരും ഒരുമിച്ചുള്ള ചിത്രങ്ങളും ജന്മദിന ആശംസകളും പങ്കിട്ട് ഈ വാര്ത്തകളൊക്കെ കാറ്റില് പറത്തി. എന്നാല് ഇപ്പോഴിതാ ഈ വിഷയം വീണ്ടുമൊരു ചര്ച്ചയായി മാറിയിരിക്കുകയാണ്. കഴിഞ്ഞ ദിവസം താന് വിധികര്ത്താവായ റിയാലിറ്റി ഷോയില് വച്ച് വിവാഹത്തെക്കുറിച്ച് മലൈക നടത്തിയ പരാമര്ശമാണ് ഇരുവരും പിരിഞ്ഞുവോ എന്ന സംശയം വീണ്ടും ഉയര്ത്താനുള്ള കാരണം.
ഒരു ഡാന്സ് റിയാലിറ്റി ഷോയ്ക്കിടെ സഹ വിധികര്ത്താവായ ഫറ ഖാന് മലൈകയോട് വീണ്ടുമൊരു കല്യാണത്തിന് തയ്യാറാണോ എന്ന് ചോദിക്കുകയായിരുന്നു. ‘2024 ല് ഒരു സിംഗിള് പേരന്റ് ആക്ട്രസ്സില് നിന്ന് ഡബിള് പേരന്റ് ആക്ട്രസ്സായി മാറാന് താത്പര്യമുണ്ടോ’ എന്നാണ് ഫറ ഖാന് ചോദിച്ചത്. ‘ആരെങ്കിലും ഉണ്ടെങ്കില് കല്യാണത്തിന് ഞാന് നൂറു ശതമാനം തയ്യാറാണ്’ എന്നാണ് മലൈക നല്കിയ മറുപടി. ‘ആരെ വേണമെങ്കിലും വിവാഹം കഴിക്കാമോ’ എന്നായി ഫറയുടെ അടുത്ത ചോദ്യം. ‘ഞാന് തയ്യാറാണ്’ മലൈക വ്യക്തമാക്കി. ആര് ചോദിച്ചാലും യെസ് പറയുമോ എന്ന് കൂടെയുണ്ടായിരുന്നവര് ചോദിച്ചപ്പോള് അതെ എന്നായിരുന്നു മലൈകയുടെ മറുപടി. ഇതോടെയാണ് മലൈകയും അര്ജുനും പിരിഞ്ഞുവോ എന്ന സംശയം സോഷ്യല് മീഡിയയില് ചര്ച്ചയായത്. ആരാധകരെല്ലാം ഈ സംശയം കമന്റുകളിലൂടെ ചോദിക്കുന്നുമുണ്ട്.
കഴിഞ്ഞ ദിവസമാണ് മലൈകയുടെ മുന് ഭര്ത്താവായ നടന് അര്ബ്ബാസ് ഖാന് വീണ്ടും വിവാഹിതനായത്. വിവാഹത്തില് അര്ബ്ബാസിന്റേയും മലൈകയുടേയും മകന് പങ്കെടുത്തിരുന്നു.
നാലു വര്ഷങ്ങള്ക്കു മുമ്പാണ് ഏറെനാളത്തെ അഭ്യൂഹങ്ങള്ക്ക് ഒടുവില് തങ്ങള് പ്രണയത്തിലാണെന്ന് മലൈകയും അര്ജുനും അറിയിക്കുന്നത്. അര്ബ്ബാസുമായുള്ള വിവാഹ ബന്ധം അവസാനിപ്പിച്ച ശേഷമാണ് മലൈക അര്ജുനുമായി പ്രണയത്തിലാകുന്നത്. ഈയ്യടുത്ത് മലൈകയുമായുള്ള പ്രണയം അര്ജുന് അവസാനിപ്പിച്ചുവെന്ന് കേട്ടിരുന്നു. സോഷ്യല് മീഡിയ താരം കുഷ കപിലയുമായി അര്ജുന് പ്രണയത്തിലായെന്നും റിപ്പോര്ട്ടുകളുണ്ടായിരുന്നു. എന്നാല് ഈ വാര്ത്ത നിഷേധിച്ച് കുഷ രംഗത്തെത്തി. ബോളിവുഡിന്റെ സൂപ്പര്താരമാണ് മലൈക അറോറ. ബോളിവുഡിലെ പ്രമുഖ നിര്മ്മാതാവായ ബോണി കപൂറിന്റെ മകനാണ് അര്ജുന്. ഇഷഖ്സാദെ ആയിരുന്നു അര്ജുന്റെ അരങ്ങേറ്റ ചിത്രം. നിരവധി ഹിറ്റുകളുടെ ഭാഗമായി മാറാന് അര്ജുന് സാധിച്ചിട്ടുണ്ട്. ദ ലേഡി കില്ലര് ആണ് അര്ജുന്റെ ഒടുവില് പുറത്തിറങ്ങിയ സിനിമ. മേരി പത്നി ക റീമേക്ക്, സിംഗം എഗെയ്ന് എന്നിവയാണ് അര്ജുന്റേതായി വരാനിരിക്കുന്ന സിനിമകള്.
