കൊല്ലം: സ്കൂള് കലോത്സവത്തില് ഹയര് സെക്കന്ഡറി വിഭാഗം മാര്ഗം കളിയില് കോഴിക്കോട് സെന്റ് ജോസഫ് ആംഗ്ളോ ഇന്ത്യന് ഗേള്സ് എച്ച്.എസ്.എസ്. ടീം എ ഗ്രേഡ് നേടിയപ്പോള് ടീം അംഗമായ റിയ തെരേസ് സെബാസ്റ്റിയന്റെ വേദന നൊമ്പരമായി.
ഒരാഴ്ച മുന്പാണ് റിയയുടെ നെഞ്ചില് മുഴ കണ്ടത്. കടുത്ത വേദനയും. കഴിഞ്ഞ ദിവസം മുതല് കടുത്ത ജലദോഷവും വന്നു. പ്ലസ്ടു വിദ്യാര്ഥിനിയായ റിയയുടെ അവസാന സ്കൂള് കലോത്സവമാണിത്. ആരോഗ്യപ്രശ്നം കണക്കിലെടുത്ത് ഒഴിഞ്ഞ് മാറിയാല് മറ്റു ടീമംഗങ്ങളുടെ അവസരം കൂടി നഷ്ടമാകുമല്ലോയെന്നു കരുതിയാണ് മത്സരത്തില് പങ്കെടുത്തത്. വേദന കടിച്ചമര്ത്തി വേദിയില് കയറി.
വേദനയും ജലദോഷവും കാരണം മത്സരശേഷം റിയ വേദിയില് കുഴഞ്ഞുവീഴുകയും ചെയ്തു. ഒടുവില് ഫലപ്രഖ്യാപനം വന്നപ്പോള് ടീമിന് എ ഗ്രേഡിന്റെ തിളക്കം. കോഴിക്കോട് സിവില് സ്റ്റേഷനു സമീപം താമസിക്കുന്ന സെന്റ് ജോസഫ് ബോയ്സ് എച്ച്.എസ്.എസിലെ അധ്യാപകനായ സെബാസ്റ്റിയന് ജോണിന്റെയും ദേവഗിരി സാവിയോ എച്ച്.എസ്.എസിലെ അധ്യാപികയായ നിഷാ ജോണിന്റെയും മകളാണു റിയ.
പഠനത്തിലും കലയിലും മിടുക്കിയായ റിയ കലോത്സവത്തില് നിന്നു െഗെഡ്സിന്റെ വാല്യുവേഷന് ക്യാമ്പിലേക്കാണ് നേരെ പോകുന്നത്. നെഞ്ചിലെ മുഴയ്ക്കു തിങ്കളാഴ്ച ശസ്ത്രക്രിയയ്ക്കു വിധേയയാകും.
