തന്നെയും ഭാര്യയെയും ചിലര് സോഷ്യല് മീഡിയയിലൂടെ അപമാനിക്കുന്നു എന്ന് ആരോപിച്ച് നടന് നിര്മ്മല് പാലാഴി. ഒരു ഫേസ്ബുക്ക് അക്കൗണ്ടിന്റെ സ്ക്രീന് ഷോട്ട് സഹിതം പങ്കുവച്ചാണ് താരം രംഗത്തെത്തിയിരിക്കുന്നത്.
'ഞാന് എന്റെ പേജില് പല പോസ്റ്റുകളും പങ്കുവക്കാറുണ്ട്. എന്റെ പ്രോഗ്രാം, സിനിമ, എനിക്ക് അടുത്ത ബന്ധമുള്ളവരുടെ പോസ്റ്ററുകള്, എനിക്ക് നേരിട്ട് അറിയാവുന്ന സുഖം ഇല്ലാത്ത ആളുകള്ക്ക് സഹായ അഭ്യര്ത്ഥന... എന്നെ അറിയുന്ന മനസ്സിലാക്കുന്ന ആളുകള് സപ്പോര്ട് ചെയ്യുകയും ഷെയര് ചെയ്യുകയും ചെയ്ത് വരുന്നുണ്ട്.
ഇന്നേവരെ ലൈക്ക് തരുമോ എന്നും ചോദിച്ച് ആരോടും ഇരന്നിട്ടില്ല. എന്റെ സമ്മതമില്ലാതെ എന്റെയും ഭാര്യയുടെയും ഫോട്ടോ വച്ച് ഇങ്ങനെ അപമാനിക്കുന്നത് ശരിയല്ല. എന്നെ ഇഷ്ട്ടമുള്ളവര് കൂടെ നില്ക്കണം എന്ന് അഭ്യര്ത്ഥിക്കുന്നു. എന്നായിരുന്നു താരത്തിന്റെ പോസ്റ്റ്.
സ്വതസിദ്ധമായ അഭിനയശൈലികൊണ്ടും നര്മ്മം കൊണ്ടും മലയാള സിനിമയില് തന്റേതായ ഒരു സ്ഥാനം ഉറപ്പിച്ച താരമാണ് നിര്മല് പാലാഴി. മിമിക്രി രംഗത്തു നിന്നും മലയാള സിനിമയില് എത്തിയ നിര്മല് പാലാഴിയുടെ ഒട്ടുമിക്ക കഥാപാത്രങ്ങളും പ്രേക്ഷകര് സ്വീകരിച്ചതാണ്.
