വിവാഹം കഴിയുന്നതോ ഒരു കുഞ്ഞിന്റെ അമ്മ ആകുന്നതോ ഒന്നും സിനിമയില് അഭിനയിക്കുന്നതിന് ഒരു തടസ്സമേ അല്ല എന്ന് കാണിച്ചു തന്ന നടിയാണ് ശിവദ. വിവാഹത്തിന് ശേഷം, ഒരു അമ്മയായതിന് ശേഷം അഭിനയത്തില് സജീവമായ നടി അതും നായികാ നിരയില് തന്നെ. തന്റെ ജീവിതത്തിലെയും സിനിമയിലെയും സന്തോഷങ്ങള് എല്ലാം ഇപ്പോള് ശിവദ ഇന്സ്റ്റഗ്രാമിലൂടെയും യൂട്യൂബിലൂടെയും പങ്കുവയ്ക്കാറുണ്ട്. ജീവിതത്തിലെ ഏറ്റവും വലിയ സന്തോഷങ്ങളിലൊന്ന് സംഭവിച്ചു കഴിഞ്ഞതിനെ കുറിച്ചാണ് ശിവദയുടെ ഏറ്റവും പുതിയ പോസ്റ്റ്.
അതെ ശിവദയും മുരളിയും കുഞ്ഞും പുതിയ വീട്ടിലേക്ക് കയറി താമസിച്ചു. കൊച്ചിയില് പുതുതായി പണിത വീടിന്റെ പാല് കാച്ചല് ചടങ്ങ് നടന്നത് കഴിഞ്ഞ മാസം 22 നാണ്. ഇപ്പോഴാണ് അതിന്റെ വീഡിയോയും വിശേഷങ്ങളും പങ്കുവച്ച് ശിവദ ഇന്സ്റ്റഗ്രാമിലും യൂട്യൂബിലും എത്തിയിരിക്കുന്നത്. ഈ നിമിഷം തനിക്ക് ജീവിത കാലം മുഴുവന് കാത്ത് സൂക്ഷിക്കുന്നതിന് വേണ്ടിയാണ് വീഡിയോ ആക്കി സോഷ്യല് മീഡിയയില് പങ്കുവയ്ക്കുന്നത് എന്ന് നടി പറയുന്നു.
'ഞങ്ങളുടെ ജീവിതത്തിലെ ഒരു പുതിയ മൈല്സ്റ്റോണ് സന്തോഷത്തോടെ അടയാളപ്പെടുത്തുന്നു. ഞങ്ങളുടെ കൂട്, സ്വപ്ന ഭവനം ഒരുങ്ങിക്കഴിഞ്ഞു. പുതിയ പ്രതീക്ഷകളോടുകൂടെയും സ്വപ്നങ്ങളോടുകൂടെയും 2024 ജനുവരി 22 ന് കുടുംബത്തോടൊപ്പം ഞങ്ങള് അത് ആഘോഷിച്ചു. ഞങ്ങളുടെ പുതിയ താമസസ്ഥലത്തിന്റെ ചില മനോഹരമായ ഓര്മകള് ഇതാ. നിങ്ങളുടെ എല്ലാവരുടെയും പ്രാര്ത്ഥന വേണം' എന്ന് വീഡിയോ പങ്കുവച്ച് ശിവദ പറഞ്ഞു.
നിരവധി സെലിബ്രിറ്റികളും ആരാധകരും വീഡിയോയ്ക്ക് താഴെ ശിവദയ്ക്കും കുടുംബത്തിനും ആശംസകള് അറിയിച്ചും, പ്രാര്ത്ഥനയില് ഉള്പ്പെടുത്തിയും കമന്റ് ബോക്സില് എത്തിയിട്ടുണ്ട്. യൂട്യൂബില് പങ്കുവച്ച വീഡിയോയില് ശിവദയുടെ മകളാണ് ശ്രദ്ധ നേടുന്നത്. അമ്മയുടെ ഇടിപ്പില് നിന്ന് മാറാതെ, എല്ലാത്തിലും സജീവ പങ്കാളിയായി കുഞ്ഞ് കൂടെ തന്നെയുള്ളത് കാണാം.
ഫാസിലിന്റെ ലിവിങ് ടുഗെതര് എന്ന ചിത്രത്തിലൂടെ അഭിനയത്തിലേക്ക് വന്നതാണ് ശിവദ. പക്ഷെ കരിയര് ബ്രേക്ക് കിട്ടിയത് ജയസൂര്യയെ നായകനാക്കി രഞ്ജിത്ത് ശങ്കര് സംവിധാനം ചെയ്ത സുസു സുധി വാത്മീകത്തിലൂടെയാണ്. അതിന് ശേഷം വിവാഹ ജീവിതത്തിലേക്ക് കടന്ന ശിവദ സിനിമയിലും സജീവമായി നിന്നു. അതെ കണ്കള് എന്ന തമിഴ് ചിത്രത്തിലെ അഭിനയത്തിന് ഏറെ പ്രശംസകള് നേടിയിരുന്നു. ലക്ഷ്യം, ശിക്കാരി ശംഭു, ട്വല്ത്ത് മാന് തുടങ്ങിയ സിനിമകളിലെ അഭിനയം എല്ലാം ശ്രദ്ധേയമായിരുന്നു.
