തമിഴകത്തിന്റെ പ്രിയ നായികയാണെങ്കിലും മലയാള സിനിമയിലൂടെ നായികയായി അരങ്ങേറ്റം കുറിച്ച നായികയാണ് സ്നേഹ. പല മലയാള സിനിമകളിലൂടെയും ഹൃദയം കവർന്നിട്ടുണ്ട് സ്നേഹ. വ്യത്യസ്തമാർന്ന കഥാപാത്രങ്ങളിലൂടെ താരം ആരാധകരെ വിസ്മയിപ്പിച്ചു. തമിഴിൽ മാത്രമല്ല തെലുങ്ക്, മലയാളം സിനിമകളിലും സജീവമായിരുന്നു താരം. അച്ചമുണ്ട് അച്ചമുണ്ട് എന്ന ചിത്രത്തിലൂടെയാണ് സ്നേഹയും ഭർത്താവും നടനുമായ പ്രസന്നയുമായി സൗഹൃദത്തിലാകുന്നത്. പിന്നീട് ഇരുവരും തമ്മിൽ പ്രണയത്തിലായി. ഭർത്താവ് പ്രസന്നയും വില്ലൻ വേഷത്തിലൂടെ മലയാളികളെ അമ്പരപ്പിച്ചിട്ടുണ്ട്. സിനിമയ്ക്ക് അകത്തും പുറത്തും പ്രണയജോഡികളായ താരങ്ങൾ കരിയറിലെ വിജയങ്ങള് പരസ്പരം ആഘോഷിക്കാറുണ്ട്. ഇപ്പോഴിതാ സ്നേഹയുടെ പുതിയ ചുവടുവയ്പ്പിന്റെ സന്തോഷം പങ്കിടുകയാണ് പ്രസന്ന. സ്നേഹയുടെ പുതിയ സില്ക്ക് സാരി സംരംഭത്തിന്റെ തുടക്കത്തിന്റെ കാര്യമാണ് പ്രസന്ന സന്തോഷത്തോടെ കുറിച്ചിരിക്കുന്നത്. ‘‘എന്റെ കണ്ണമ്മ സ്നേഹ ഇന്ന് ഒരു സംരംഭകയായി കാണുന്നതിൽ ഞാൻ ത്രില്ലിലും ആവേശത്തിലുമാണ്, അവൾ തന്റെ ദീർഘകാല സ്വപ്നം അഭിമാനത്തോടെ പ്രഖ്യാപിച്ചു; അവളുടെ സ്വന്തം സിൽക്ക് സാരി സ്റ്റോർ ‘സ്നേഹാലയ സില്ക്ക്സ്’ കണ്ണമ്മയ്ക്ക് ഏറ്റവും നല്ലതു മാത്രം ആശംസിക്കുന്നു. നീ എനിക്ക് നൽകിയ എല്ലാത്തിനും ഇപ്പോൾ തിരിച്ചു കൊടുക്കേണ്ട സമയമാണ്. നീ നേടാൻ ആഗ്രഹിക്കുന്ന എല്ലാ കാര്യങ്ങളിലും നിന്നെ ഞാന് പിന്തുണയ്ക്കും... നിന്നെ സ്നേഹിക്കുകയും നിന്നെക്കുറിച്ച് കൂടുതൽ അഭിമാനിക്കുകയും ചെയ്യുന്നു....’’ എന്നാണ് സ്നേഹയുടെ പുതിയ സംരംഭത്തിന്റെ വീഡിയോയ്ക്കൊപ്പം പ്രസന്ന കുറിച്ചിരിക്കുന്നത്.
