സ്വതസിദ്ധമായ ശൈലിയില്, ഏതു തരം വേഷങ്ങളും ചെയ്യാൻ പ്രാപ്തനായ, സഹനടനായും, സ്വഭാവനടനായും, ഹാസ്യനടനായും വെള്ളിത്തിരയില് പകരം വെക്കാനില്ലാത്ത കഥാപാത്രങ്ങള് ചെയ്ത താരമാണ് ജോജു ജോർജ്. കരിയറില് ഇരുപത്തിയെട്ടാമത്തെ വർഷത്തിലെത്തി നിൽക്കുമ്പോൾ മറ്റൊരു വേഷം കൂടി അണിയുകയാണ് ജോജു. ആദ്യമായി സംവിധായക കുപ്പായമണിയുകയാണ് താരം. മാസ്സ്, ത്രില്ലർ, റിവെഞ്ച് ഗണത്തിൽ പെട്ട ‘പണി’ എന്ന് പേരിട്ട ചിത്രത്തിന്റെ ഷൂട്ടിംഗ് കഴിഞ്ഞ ദിവസം പൂര്ത്തിയായി. സ്വന്തം രചനയില് ആദ്യ സംവിധാനസംരംഭവവുമായി എത്തുന്നതിന്റെ അടങ്ങാത്ത ആവേശത്തിലാണ് ജോജു ജോർജ്ജ്. ഇപ്പോഴിതാ ഷൂട്ടിംഗ് പൂര്ത്തിയായ സന്തോഷം പങ്കിടുകയാണ് ജോജു. ‘‘എന്റെ മുഴുവൻ അഭിനേതാക്കളുടെയും അണിയറപ്രവർത്തകരുടെയും ഡയറക്ടർ എന്ന നിലയിൽ എന്റെ അനുഭവവും നന്ദിയും വാക്കുകളിലൂടെ പ്രകടിപ്പിക്കാന് എനിക്ക് കഴിയില്ല. നിങ്ങൾ ഓരോരുത്തരും ഇല്ലാതെ ‘പണി’ സിനിമ അപൂർണ്ണമാണ്. എന്റെ ടെക്നീഷ്യൻമാർ, അഭിനേതാക്കൾ, പ്രൊഡക്ഷൻ ടീം, ഡയറക്ഷൻ ടീം ജൂനിയർ ആർട്ടിസ്റ്റുകൾ, എന്റെ സുഹൃത്തുക്കൾ എന്നിവരോട് ഒത്തിരി സ്നേഹം.....നിങ്ങളില്ലാതെ ഇതൊക്കെ നടക്കില്ല, എല്ലാവരെയും സ്നേഹിക്കുന്നു ....ഒരു നടൻ എന്ന നിലയിൽ എന്റെ പ്രിയപ്പെട്ട പ്രേക്ഷകർ എന്നെ പിന്തുണച്ചു, അത് സംവിധായകനായി ഉയരാൻ എനിക്ക്
ആത്മവിശ്വാസം നൽകി, അതൊരു സ്വപ്നമായിരുന്നു ... എന്റെ അനുഭവം, എന്റെ പഠനം, സിനിമയെക്കുറിച്ചുള്ള എന്റെ അറിവ് എന്നിവ ഉപയോഗിച്ച് ഞാൻ എന്റെ പരമാവധി ചെയ്തുവെന്ന് ഞാൻ വിശ്വസിക്കുന്നു...മെയ് മാസത്തോടെ തിയേറ്ററുകളിൽ കാണാം!...ഒരിക്കൽ കൂടി വളരെ നന്ദി...’’ എന്നാണ് മുഴുവന് ക്രൂവിനൊപ്പമുള്ള പാക്ക് അപ്പ് ചിത്രത്തിനൊപ്പം ജോജു കുറിച്ചത്.
‘‘അഭിനയം ഞാൻ ഏറ്റവും ആസ്വദിച്ചു ചെയ്യുന്ന ഒന്നാണ്, കുറച്ചു ടെൻഷൻ നിറഞ്ഞ സമയങ്ങളിലൂടെ കടന്നു പോയെങ്കിലും സംവിധാനവും അത് പോലെ ആസ്വദിച്ചു തന്നെയാണ് ചെയ്യുന്നതും...’’ തന്റെ അഭിനയം നല്കുന്ന ഗ്യാരന്റി താൻ സംവിധാനം ചെയ്ത ഈ സിനിമയ്ക്കും ഉണ്ടെന്നാണ് ജോജു സിനിമയയെക്കുറിച്ച് ഉറപ്പിച്ചു പറയുന്നത്. ജോജു തന്നെയാണ് ചിത്രത്തില് നായകന്. അഭിനയയാണ് നായിക. ഒപ്പം ബിഗ് ബോസ് താരങ്ങളായ സാഗര്, ജുനൈസ് എന്നിവരടങ്ങുന്ന ഒരു വലിയ താരനിര തന്നെയുണ്ട്. ജോജുവിന്റെ തന്നെ നിർമാണ കമ്പനിയായ അപ്പു പാത്തു പപ്പു പ്രൊഡക്ഷന്സിന്റെയും, എഡി സ്റ്റുഡിയോസിന്റെയും ബാനറില് എം. റിയാസ് ആദം, സിജോ വടക്കൻ എന്നിവർ ചേർന്നാണ് ചിത്രം നിർമ്മിക്കുന്നത്. വിഷ്ണു വിജയാണ് സംഗീതം. ജൂനിയര് ആര്ട്ടിസ്റ്റില് നിന്ന് ആരംഭിച്ച ജോജുവിന്റെ കരിയര് ഇപ്പോള് മലയാളവും കടന്ന് അന്യ ഭാഷകളിലേക്കും എത്തി നില്ക്കുകയാണ്. 2018 ല് പുറത്തിറങ്ങിയ 'ജോസഫ്' ആണ് ജോജുവിന്റെ കരിയറില് വലിയൊരു ബ്രേക്ക് ആയത്. 'ജോസഫ്', 'ചോല' എന്നീ ചിത്രങ്ങളിലെ അഭിനയത്തിന് ആ വര്ഷത്തെ മികച്ച സ്വഭാവനടനുള്ള കേരള സംസ്ഥാന ചലച്ചിത്ര പുരസ്കാരവും, ദേശീയ ചലച്ചിത്രപുരസ്കാരത്തില് പ്രത്യേക പരാമര്ശവും ജോസഫിനു ലഭിച്ചു.
